ໃນຕອນບ່າຍຂອງວັນທີ 9 ຕຸລາ 2023 ນີ້, ທີ່ຫ້ອງປະຊຸມພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ໄດ້ຈັດພິທີປາຖະກະຖາ ວັນໄປສະນີໂລກ ຄົບຮອບ 149 ປີ( 9 ຕຸລາ 1874 – 9 ຕຸລາ 2023 ). ໃຫ້ກຽດເປັນປະທານໂດຍ ທ່ານ ສົມບູນ ມະນີ ເລຂາຄະນະພັກຮາກຖານ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ມີຄະນະພະແນກ, ບັນດາທ່ານຄະນະອຳນວຍການສາຂາບໍລິສັດ ແລະ ພະນັກງານ ໄປສະນີ, ໂທລະຄົມມະນາຄົມ ແລະ ອິນເຕີເນັດ ແລະ ພະນັກງານ ພະແນກ ຕສ ເຂົ້າຮ່ວມຢ່າງພ້ອມພຽງ.

ໃນພິທີຄັ້ງນີ້, ທ່ານ ສົມບູນ ມະນີ ເລຂາຄະນະພັກຮາກຖານ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໄດ້ເລົ່າມູນເຊື້ອວັນໄປສະນີໂລກ ຊຶຶ່ງໄດ້ສະແດງໃຫ້ຮູ້ເຖິງປະຫວັດຄວາມເປັນມາ ແລະ ຄວາມສຳຄັນຂອງການບໍລິການໄປສະນີໂລກ ແລະ ເຜີຍແຜ່ບົດຖະແຫຼງການຂອງຂອງ ທ່ານ ມາຊາຮິໂກະ ເມໂຕກິ (Mr. Masahiko METOKI) ອະທິບໍດີ ສະຫະພາບໄປສະນີສາກົນ ຊຶ່ງມິເນື້ອໃນດັ່ງນິ້:

ການສະເຫຼີມສະຫຼອງວັນໄປສະນີໂລກ ວັນທີ 9 ຕຸລາ 2023 ພາຍໃຕ້ຄຳຂັວນ ‘‘ຮ່ວມກັນສ້າງຄວາມໄວ້ວາງໃຈ: ຮ່ວມແຮງຮ່ວມໃຈ ເພື່ອອະນາຄົດທີ່ປອດໄພ ແລະ ເຊື່ອມໂຍງເຖິງກັນ’’

ຫ້ອງການໄປສະນີ ເຮັດໜ້າທີ່ເປັນສູນກາງທີ່ສໍາຄັນ ສຳລັບຊຸມຊົນ ໃນການຕິດຕໍ່ສື່ສານ ລວມທັງການເຊື່ອມໂຍງເຖິງກັນ ດ້ວຍການເຂົ້າເຖິງການບໍລິການທີ່ສຳຄັນທາງດ້ານການສື່ສານ, ການຄ້າ, ສັງຄົມ, ການເງິນ, ດິຈິຕອນ ແລະ ເປັນຜູ້ໃຫ້ບໍລິການສາທາລະນະແຕ່ພຽງຜູ້ດຽວຢູ່ໃນເຂດຫ່າງໄກສອກຫຼີກ. ຕະຫຼອດໄລຍະປະຫວັດສາດທີ່ຜ່ານມາໃນແຕ່ລະວັນ ພະນັກງານໄປສະນີໄດ້ຕ້ອນຮັບ ແລະ ໃຫ້ບໍລິການຜູ້ຄົນທີ່ໜ້າປະຕູຫ້ອງການຂອງຕົນດ້ວຍຄວາມຍິ້ມແຍ້ມແຈ່ມໃສ ເພື່ອສ້າງຄວາມໄວ້ວາງໃຈ ແກ່ຊຸມຊົນ ດ້ວຍດີຕະຫຼອດມາ.

ພື້ນຖານຄວາມສໍາເລັດຂອງການໄປສະນີ ໃນຖານະຜູ້ໃຫ້ບໍລິການນັ້ນ ແມ່ນຂຶ້ນຢູ່ກັບຄວາມໄວ້ວາງໃຈທີ່ໄດ້ຮັບຈາກຜູ້ຄົນທົ່ວໂລກ ຕະຫຼອດຫຼາຍສະຕະວັດທີ່ຜ່ານມາ. ໃນປັດຈຸບັນ ມີພະນັກງານໄປສະນີຫຼາຍກວ່າ 5 ລ້ານຄົນ ໄດ້ຮັບຄວາມໄວ້ວາງໃຈຈາກສັງຄົມ ຕໍ່ການບໍລິການໄປສະນີ, ນັບຕັ້ງແຕ່ການຮັບ-ສົ່ງຂໍ້ຄວາມ, ຂອງຂັວນ ແລະ ສິນຄ້າ ໄປຈົນເຖິງ ເງິນ ແລະ ຢາປົວພະຍາດ.

ຄວາມໄວ້ວາງໃຈນີ້ ໄດ້​ຮັບ​ການ​ປູກຈິດສຳນຶກດ້ວຍຄວາມມຸ້ງໝັ້ນທີ່ແນ່ນອນ ໃນເລື່ອງ​​ຄວາມ​ປອດ​ໄພ​ ແລະ​ ການຮັກສາຄວາມ​ສະຫງົບ. ພະນັກງານໄປສະນີ ໄດ້ທຸ້ມເທເຫື່ອແຮງຂອງຕົນຢ່າງບໍ່ຮູ້ອິດຮູ້ເມື່ອຍ ເພື່ອຮັບປະກັນຄວາມປອດໄພໃນການຂັບຂີ່ຕາມທ້ອງຖະໜົນ, ຈັດຝຶກອົບຮົມສຳລັບພະນັກງານຂັບລົດຂົນສົ່ງ ແລະ ປະຕິບັດມາດຕະການຮັກສາຄວາມປອດໄພເພື່ອຮັບປະກັນບໍ່ໃຫ້ມີສິນຄ້າອັນຕະລາຍຢູ່ໃນວົງຈອນການບໍລິການ ລວມທັງການປົກປ້ອງສິດຂອງພະນັກງານ ແລະ ຜູ້ໃຊ້ບໍລິການ. ນອກຈາກນັ້ນ, ໃນຊ່ວງເວລາທີ່ເກີດໄພພິບັດ ຫຼື ເກີດຄວາມຂັດແຍ່ງ, ໄປສະນີ ກໍໄດ້ໃຫ້ການຊ່ວຍເຫຼືອ ໂດຍການກະກຽມວັດຖຸສິ່ງຂອງ ແລະ ການບໍລິການສຸກເສີນ ໃຫ້ແກ່ຜູ້ທີ່ຕ້ອງການຄວາມຊ່ວຍເຫຼືອ ແລະ ໃນທຸກຄັ້ງໄປສະນີຈະເປັນຜູ້ທຳອິດ ທີ່ໃຫ້ການຊ່ວຍເຫຼືອໃນສະຖານະການເຫຼົ່ານີ້.

ໄປສະນີ ສາມາດນຳໃຊ້ຄວາມສໍາພັນຂອງຕົນ ພາຍໃຕ້ຄວາມໄວ້ວາງໃຈທີ່ມີຢູ່ ເພື່ອຊ່ວຍຫຼຸດຜ່ອນຊ່ອງວ່າງທີ່ຜູ້ຄົນຈໍານວນຫຼາຍພັນລ້ານຄົນ ກຳລັງປະເຊີນໜ້າຢູ່ ເປັນຕົ້ນແມ່ນ​ ການແບ່ງປັນດິຈິຕອນ ດ້ວຍການເຊື່ອມຕໍ່ເຄືອຂ່າຍການບໍລິການພື້ນຖານ ເຂົ້າກັບວົງຈອນດິຈິຕອນ ທີ່ມີລາຄາແພງ. ໃນປັດຈຸບັນ ໄປສະນີ ກຳລັງເລີ່ມດໍາເນີນການຫັນເປັນດິຈິຕອນ ຄັ້ງໃຫຍ່ ເພື່ອນໍາສະເໜີການບໍລິການອອນລາຍທີ່ມີຄວາມປອດໄພ ຢູ່ໃນຍຸກອຸດສະຫະກຳ 4.0.

ສະຫະພາບໄປສະນີສາກົນ ໄດ້ເປັນເພື່ອນຮ່ວມງານ ທີ່ທຸ່ມເທເຫື່ອແຮງໃນການສ້າງເຄືອຂ່າຍລະດັບໂລກ ທີ່ປອດໄພ ແລະ ເຊື່ອມຕໍ່ກັນ ຊຶ່ງໄດ້ສະໜອງການບໍລິການໃຫ້ແກ່ຜູ້ຄົນຫຼາຍກວ່າ 8 ພັນລ້ານຄົນໃນແຕ່ລະວັນ ດ້ວຍການບໍລິການທີ່ທັນສະໄໝ, ປອດໄພ ແລະ ເປັນສ່ວນໜຶ່ງທີ່ສໍາຄັນໃນການປ່ຽນແປງຄັ້ງນີ້.

ເຖິງຢ່າງໃດກໍຕາມ ຍັງມີຫ້ອງການໄປສະນີເກືອບ 100,000 ແຫ່ງ ຈາກຈຳນວນທັງໝົດ 650,000 ແຫ່ງ ໃນທົ່ວໂລກ ຍັງຂາດໂຄງລ່າງພື້ນຖານທາງດ້ານອິນເຕີເນັດ ຊຶ່ງເປັນການຈໍາກັດການບໍລິການທີ່ໄປສະນີ ສາມາດສະໜອງໄດ້ ໂດຍຜ່ານຊ່ອງທາງດິຈິຕອນ ເຊິ່ງໝາຍຄວາມວ່າຊຸມຊົນທີ່ໃຊ້ບໍລິການຢູ່ຫ້ອງການໄປສະນີ 100,000 ແຫ່ງນັ້ນຍັງຂາດໂອກາດໃນການເຂົ້າເຖິງການບໍລິການທາງດິຈິຕອນການເງິນ, ລວມທັງການບໍລິການທີ່ຫຼາກຫຼາຍ ທີ່ໄປສະນີ ສາມາດໃຫ້ບໍລິການໄດ້. ຊຶ່ງການໃຫ້ບໍລິການເຫຼົ່ານີ້ ພວກເຮົາຈະຕ້ອງໝັ້ນໃຈວ່າ ປະຊາຊົນ ແລະ ຫົວໜ່ວຍທຸລະກິດຕ່າງໆ ສາມາດເຂົ້າເຖິງສິດຜົນປະໂຫຍດຢ່າງເຕັມຮູບແບບ ໃນຍຸກເສດຖະກິດດິຈິຕອນ. ດັ່ງນັ້ນ, ສະຫະພາບໄປສະນີສາກົນ ຈຶ່ງໄດ້ກໍານົດເປົ້າໝາຍຄື: ພວກເຮົາຕ້ອງແນ່ໃຈວ່າ ຫ້ອງການໄປສະນີແຕ່ລະແຫ່ງ ສາມາດເຂົ້າເຖິງອິນເຕີເນັດໄດ້ຢ່າງພຽງພໍ ພາຍໃນປີ 2030 ເພື່ອປັບປຸງການເຊື່ອມໂຍງທາງດິຈິຕອນ ຂອງຊຸມຊົນທີ່ດ້ອຍໂອກາດເຫຼົ່ານີ້.

ສະຫະພາບໄປສະນີສາກົນ ບໍ່ພຽງແຕ່ຈະສ້າງຄວາມເຊື່ອໝັ້ນວ່າຫ້ອງການໄປສະນີທັງໝົດ ສາມາດເຂົ້າເຖິງອິນເຕີເນັດໄດ້ຢ່າງພຽງພໍເທົ່ານັ້ນ ແຕ່ຍັງສຸມໃສ່ປະຕິບັດວຽກງານ ເພື່ອສ້າງຄວາມແນ່ໃຈວ່າ ຫ້ອງການໄປສະນີ ບໍ່ວ່າຈະນ້ອຍ ຫຼື ໃຫຍ່ ກໍໃຫ້ສາມາດເຂົ້າເຖິງເຄື່ອງມື ແລະ ເຕັກໂນໂລຊີທີ່ທັນສະໄໝ ໃນລາຄາທີ່ເໝາະສົມ ເພື່ອສົ່ງເສີມການຄ້າເອເລັກໂຕຣນິກ, ລັດຖະບານເອເລັກໂຕຣນິກ ແລະ ບໍລິການທາງການເງິນເອເລັກໂຕຣນິກ ອີກດ້ວຍ.

ໃນຄຳຂັວນທີ່ວ່າ “ຮ່ວມກັນສ້າງຄວາມໄວ້ວາງໃຈ” ແມ່ນຮຽກຮ້ອງໃຫ້ລັດຖະບານແຕ່ລະປະເທດ ແລະ ຜູ້ໃຫ້ບໍລິການໄປສະນີຂອງຕົນຈົ່ງໃຫ້ການສະໜັບສະໜູນການພັດທະນາອະນາເຂດໄປສະນີ ດິຈິຕອນດຽວ ເພື່ອໃຫ້ສອດຄ່ອງກັບເຄືອຂ່າຍການບໍລິການພື້ນຖານ ທີ່ມີມາຫຼາຍສະຕະວັດແລ້ວ.

ວັນໄປສະນີໂລກໃນປີນີ້ ຂ້າພະເຈົ້າ ຂໍຮຽກຮ້ອງມາຍັງບັນດາທ່ານ ຈົ່ງເຮັດວຽກຮ່ວມກັບສະຫະພາບໄປສະນີສາກົນ ເພື່ອໃຫ້ແນ່ໃຈວ່າ ຜູ້ຄົນທີ່ຢູ່ທຸກຫົນແຫ່ງ ບໍ່ຈໍາເປັນຕ້ອງມາຊອກຫາຫ້ອງການໄປສະນີ ຕາມພື້ນທີ່ຂອງຕົນຕໍ່ໄປອີກແລ້ວ ແຕ່ເປັນການຄົ້ນຫາໂດຍຜ່ານທາງດິຈິຕອນ. ຂໍໃຫ້ພວກເຮົາຈົ່ງເຮັດວຽກຮ່ວມກັນ ເພື່ອສ້າງໂລກທີ່ທຸກຄົນສາມາດໄດ້ຮັບຜົນປະໂຫຍດຈາກການບໍລິການ ດິຈິຕອນ ແລະ ການບໍລິການພື້ນຖານ ທີ່ມີຄວາມປອດໄພ ຊຶ່ງເຄືອຂ່າຍໄປສະນີທົ່ວໂລກຂອງພວກເຮົົາ ສາມາດໃຫ້ບໍລິການໄດ້.

ວິດີໂອຖະແຫຼງການ:  https://g-drive.gov.la/index.php/s/8wfaeeB4Y33NdzJ

ຂຽນຂ່າວໂດຍ: ອານົງສັກ ສັນຕິສຸກ