ໃນວັນທີ 28 ກັນຍາ 2026, ຢູ່ທີ່ຫ້ອງປະຊຸມພະແນກເຕັກໂນໂລຊີ ແລະ ການສື່ສານ (ຕສ) ແຂວງອຸດົມໄຊ ໄດ້ດຳເນີນກອງປະຊຸມປະເມີນຜົນການຈັດຕັ້ງປະຕິບັດວຽກງານ ແລະ ຄັດເລືອກຍ້ອງຍໍຜົນງານ ປະຈຳປີ 2026 ຂອງພະນັກງານ-ລັດຖະກອນ ຂັ້ນຄະນະພະແນກ ຢ່າງເປັນທາງການ. ກອງປະຊຸມຄັ້ງນີ້ ດຳເນີນພາຍໃຕ້ການເປັນປະທານຂອງ ທ່ານ ນາງ ປິ່ນຄຳ ອຸ່ນລະຄອນ ຫົວໜ້າພະແນກ ຕສ ແຂວງ, ໂດຍມີບັນດາຄະນະພະແນກ, ຫົວໜ້າຂະແໜງ ແລະ ຮອງຫົວໜ້າຂະແໜງ ພາຍໃນພະແນກ ເຂົ້າຮ່ວມຢ່າງພ້ອມພຽງ.
ຈຸດປະສົງສຳຄັນຂອງກອງປະຊຸມ ແມ່ນເພື່ອເປັນການສະຫຼຸບຕີລາຄາ ແລະ ທົບທວນຄືນການຈັດຕັ້ງປະຕິບັດວຽກງານ ໃນຕະຫຼອດໄລຍະ 1 ປີຜ່ານມາ ຂອງຄະນະພະແນກແຕ່ລະທ່ານ. ໃນກອງປະຊຸມ ໄດ້ພ້ອມກັນຄົ້ນຄວ້າ, ສົນທະນາ ແລະ ຍົກໃຫ້ເຫັນເຖິງໝາກຜົນແຫ່ງຄວາມສຳເລັດ, ຜົນງານອັນພົ້ນເດັ່ນໃນຫຼາຍດ້ານ, ພ້ອມທັງຊີ້ໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໃນການປະຕິບັດໜ້າທີ່ການເມືອງ ທີ່ພັກ-ລັດ ມອບໝາຍໃຫ້ ໂດຍສະເພາະແມ່ນການນຳພາ-ຊີ້ນຳ ວຽກງານການພັດທະນາເຕັກໂນໂລຊີ, ການສື່ສານ ແລະ ການຊຸກຍູ້ວຽກງານຫັນເປັນລັດຖະບານດິຈິຕອນ ຂອງແຂວງ.
ພ້ອມດຽວກັນນັ້ນ, ກອງປະຊຸມຍັງໄດ້ດຳເນີນການທາບທາມ ແລະ ປະເມີນຜົນບຸກຄົນບົນພື້ນຖານຫຼັກການລວມສູນປະຊາທິປະໄຕ, ຮັບປະກັນຄວາມພາວະວິໄສ, ໂປ່ງໃສ ແລະ ຍຸຕິທຳ ເພື່ອຄັດເລືອກເອົາຜູ້ທີ່ມີຜົນງານດີເດັ່ນ ໃນການປະຕິບັດວຽກງານ ປະຈຳປີ 2026. ການປະເມີນຜົນ ແລະ ຄັດເລືອກບຸກຄົນ ເພື່ອສະເໜີຮັບການຍ້ອງຍໍໃນຄັ້ງນີ້ ແມ່ນໄດ້ຈັດຕັ້ງປະຕິບັດຢ່າງເຂັ້ມງວດ ຕາມລະບຽບກົດໝາຍວ່າດ້ວຍພະນັກງານ-ລັດຖະກອນ ເຊິ່ງເປັນການສ້າງແຮງຈູງໃຈ, ຊຸກຍູ້ສົ່ງເສີມ ໃຫ້ພະນັກງານ-ລັດຖະກອນທຸກສະຫາຍ ມີຄວາມຫ້າວຫັນບຸກບືນ, ພັດທະນາຕົນເອງ ແລະ ຍົກສູງປະສິດທິພາບໃນການເຮັດວຽກງານວິຊາສະເພາະ ເພື່ອກະກຽມຄວາມພ້ອມຮອບດ້ານ ໃນການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2027 ໃຫ້ຍາດໄດ້ຜົນສຳເລັດໃໝ່ ທີ່ໃຫຍ່ຫຼວງກວ່າເກົ່າ.
