ໃນຕອນເຊົ້າຂອງວັນທີ 11 ຕຸລາ 2023 ທ່ານ ອອ່ນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ ໄດ້ລົງມາເຄື່ອນໄຫວຊຸກຍູ້ວຽກງານຢູ່ເຕັກໂນໂລຊີ ແລະ ການສື່ສານ ທີ່ພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໂດຍມີທ່ານຫົວໜ້າພະແນກ, ຄະນະພະແນກ, ຄະນະອຳນວຍການສາຂາບໍລິສັດໄປສະນີ, ໂທລະຄົມມະນາຄົມ ແລະ ອິນເຕີເນັດ, ພະນັກງານ-ລັດຖະກອນ ພະແນກ ຕສ ແລະ ພະນັກງານສາຂາບໍລິສັດໄປສະນີ, ໂທລະຄົມມະນາຄົມ ແລະ ອິນເຕີເນັດ ເຂົ້າຮ່ວມຢ່າງພ້ອມພຽງ.
ໃນໂອກາດດັ່ງກ່າວນີ້, ທ່ານ ສົມບູນ ມະນີ ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໄດ້ລາຍງານສະພາບການເຄື່ອນໄຫວຈັດຕັ້ງປະຕິບັດວຽກງານ ເຕັກໂນໂລຊີ ແລະ ການສື່ສານ ໃນໄລຍະ 09 ເດືອນຜ່ານມາ ແລະ ທິດທາງແຜນການ 03 ເດືອນທ້າຍປີ 2023 ຊຶ່ງໄດ້ຍົກໃຫ້ເຫັນຜົນສໍາເລັດຂອງ , ວຽກງານຈຸດສຸມພັດທະນາຂົງເຂດວຽກງານ ເຕັກໂນໂລຊີ ແລະ ການສື່ສານ, ວຽກງານ ສ້າງ ແລະ ປັບປຸງນິຕິກໍາໃຕ້ກົດໝາຍ,ວຽກງານການຫັນເປັນດິຈິຕອນ ໂດຍສະເພາະແມ່ນການພັດທະນາລະບົບບໍລິຫານ ແລະ ບໍລິການລັດແບບດິຈິຕອນ, ການຄຸ້ມຄອງຫົວໜ່ວຍທຸລະກິດໄປສະນີ, ໂທລະຄົມມະນາຄົມ ແລະ ອິນເຕີເນັດ ແລະ ການຜັນຂະຫຍາຍ ແລະ ຈັດຕັ້ງປະຕິບັດ 2 ວາລະແຫ່ງຊາດ.
ພາຍຫຼັງຮັບຟັງການລາຍງານ, ທ່ານ ອອ່ນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ ກໍໄດ້ມີຄຳເຫັນເຈາະຈີ້ມຕໍ່ ພະນັກງານ-ລັດຖະກອນ ໃນການຈັດຕັ້ງປະຕິບັດວຽກງານຂອງ ພະແນກ ເຕັກໂນໂລຊີ ແລະ ການສື່ສານ ແລະ ການດຳເນິນທຸລະກິດ ຂອງບັນດາບໍລິສັດໄປສະນີ, ໂທລະຄົມມະນາຄົມ ແລະ ອິນເຕີເນັດ, ຊຶ່ງກໍມີບັນດາພະນັກງານ-ລັດຖະກອນ, ບັນດາບໍລິສັດ ລາຍງານ, ຊີ້ແຈງ ແລະ ຂໍທິດຊີ້ນຳ. ຫຼັງຈາກນັ້ນ ທ່ານ ຮອງເຈົ້າແຂວງອຸດົມໄຊ ໄດ້ສັງລວມ ແລະ ມີຄຳເຫັນໂອ້ລົມ ແລະ ໃຫ້ທິດຊີ້ນຳຕໍ່ກອງປະຊຸມ ໃນການຈັດຕັ້ງປະຕິບັດວຽກງານໃນຕໍ່ໜ້າ. ທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດທີ່ພະແນກ ເຕັກໂນໂລຊີ ແລະ ການສື່ສານ ແຂວງ ແລະ ການດຳເນີນທຸລະກິດຂອງບັນດາບໍລິສັດໄປສະນີ, ໂທລະຄົມມະນາຄົມ ແລະ ອິນເຕີເນັດ ຍາດມາໄດ້ໃນໄລຍະຜ່ານມາ ແລະ ໃຫ້ຮັກສາມູນເຊື້ອອັນດີງາມຕໍ່ໄປເລື້ອຍໆ. ພ້ອມນັ້ນ, ທ່ານຍັງໄດ້ເນັ້ນໜັກໃຫ້ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ພາຍໃນພະແນກ, ຕສ ຂັ້ນເມືອງ, ພະນັກງານສາຂາບໍລິສັດ ຢ່າງເປັນປົກກະຕິ, ສືບຕໍ່ພົວພັນປະສານງານ, ຊ່ວຍເຫຼືອເຊິ່ງກັນ ແລະ ກັນ, ຮັກສາຄວາມສາມັກຄີພາຍໃນໃຫ້ແໜ້າແຟ້ນກວ່າເກົ່າ ແລະ ໃຫ້ທິດຊີ້ນຳວຽກງານຂອງແຕ່ລະຂະແໜງການ ພາຍໃນພະແນກ ຕສ ແລະ ສາຂາບໍລິສັດ ສຸມໃສ່ການປະຕິບັດວຽກງານວິຊາສະເພາະໃນຄວາມຮັບຜິດຊອບຂອງຕົນໃຫ້ບັນລຸຕາມລະດັບຄາດໝາຍທີ່ວາງໄວ້ດ້ວຍຄວາມຮັບຜິດຊອບສູງ.
