ໃນສະພາບການພັດທະນາຢ່າງຕໍ່ເນື່ອງຂອງເຕັກໂນໂລຊີດິຈິຕອນ ແລະ ນະວັດຕະກໍາ ໄດ້ເຮັດໃຫ້ການຜະລິດ, ການບໍລິການ ແລະ ການບໍລິຫານ ຫັນໄປສູ່ດີຈີຕອນຫຼາຍຂື້ນ. ຫຼາຍປະເທດ ໄດ້ຊຸກຍູ້-ສົ່ງເສີມນັກຄົ້ນຄວ້າ, ນັກພັດທະນາ ແລະ ບັນດາບໍລິສັດທາງດ້ານໄອຊີທີ, ດິຈິຕອນ, ນະວັດຕະກໍາ, ສະຕາດອັບ (startup) ໄດ້ພັດທະນາໂຕເອງດ້ວຍຫຼາຍຮູບແບບ ແລະ ໜຶ່ງໃນຮູບແບບການສົ່ງເສີມ ກໍຄື ການຈັດແຂ່ງຂັນໄອຊີທີ, ດິຈິຕອນ, ນະວັດຕະກໍາ ແລະ ສະຕາດອັບ ໃນລະດັບປະເທດ ຫຼື ສາກົນ. ສຳລັບ ສປປ ລາວ, ກະຊວງ ເຕັກໂນໂລຊີ ແລະ ການສື່ສານ ໃນນາມອົງການຈັດຕັ້ງຄຸ້ມຄອງມະຫາພາກ ທາງດ້ານໄປສະນີ, ໂທລະຄົມ, ໄອຊີທີ ແລະ ດິຈິຕອນ ກໍໄດ້ຈັດການແຂ່ງຂັນລາວດິຈິຕອນອາວອດ ທົ່ວປະເທດຄັ້ງນີ້ ເປັນຄັ້ງທີ 6 ຫຼັງຈາກທີ່ໄດ້ຮັບຜົນສຳເລັດຈາກການຈັດງານ Lao ICT Award and Innovation ໃນ 5 ຄັ້ງຜ່ານມາ. ເປົ້າໝາຍ ແມ່ນເພື່ອຊຸກຍູ້-ສົ່ງເສີມໃຫ້ບັນດານັກພັດທະນາ, ບໍລິສັດທາງດ້ານໄອຊີທີ, startup ໃນລາວ, ສ້າງຊື່ສຽງຜະລິດຕະພັນຂອງຕົນໃຫ້ກັບຄົນລາວ ແລະ ສາມາດບໍລິການອອກສູ່ສາກົນ. ພ້ອມນັ້ນ, ກໍສົ່ງເສີມໃຫ້ຄົນລາວໄດ້ນຳໃຊ້ການບໍລິການໄອຊີທີ, ດິຈິຕອນ ແລະ ນະວັດຕະກໍາ ຂອງຄົນລາວເອງ.
ການຈັດການແຂ່ງຂັນ Lao Digital Award ກໍເປັນແຜນງານໜຶ່ງທີ່ນອນໃນແຜນພັດທະນາ ຂະແໜງການເຕັກໂນໂລຊີ ແລະ ການສື່ສານ ໂດຍໄດ້ຮັບການອະນຸມັດຈາກຄະນະພັກກະຊວງ ເຕັກໂນໂລຊີ ແລະ ການສື່ສານໃນການຈັດຕັ້ງປະຕິບັດຢ່າງເປັນເອກະພາບ ໂດຍມີຄະນະຮັບຜິດຊອບ ທີ່ປະກອບມີທັງພະນັກງານໃນກະຊວງເຕັກໂນໂລຊີ ແລະ ການສື່ສານ, ຕາງໜ້າສະມາຄົມການຄ້າໄອຊີທີລາວ, ສະມາຄົມທຸລະກິດໜຸ່ມ, ທຸລະກິດສະຕາດອັບ ແລະ ອາຈານ ຈາກມະຫາວິທະຍາໄລແຫ່ງຊາດ, ຕາງໜ້າຈາກບໍລິສັດໄອຊີທີ ແລະ ບັນດາຜູ້ໃຫ້ບໍລິການໂທລະຄົມ ເພື່ອເຮັດໃຫ້ຄະນະຮັບຜິດຊອບດ່ັງກ່າວ ສາມາດເຄື່ອນໄຫວຢ່າງສະດວກ, ສ້າງຫຼັກການການແຂ່ງຂັນຢ່າງຖືກຕ້ອງ ແລະ ສອດຄ່ອງກັບ ຫຼັກການການແຂ່ງຂັນຂອງອາຊຽນ ເຮັດໃຫ້ການແຂ່ງຂັນໃນຄັ້ງນີ້ ເປັນທຳ ແລະ ໂປ່ງໃສ.
ງານແຂ່ງຂັນ Lao Digital Award ປະຈໍາປີ 2024 ໃນຄັ້ງນີ້ ໄດ້ຈັດຂຶ້ນພາຍໃຕ້ງານສັບປະດາດິຈິຕອນ ຫຼື Digital Week 2024 ໃນລະຫວ່າງວັນທີ 10 – 14 ມັງກອນ 2024. ທີ່ເປັນງານໃຫຍ່ລະດັບປະເທດ ແລະ ມີຜູ້ເຂົ້າຮ່ວມແຂ່ງຂັນ ທີ່ມາຈາກ 40 ພາກສ່ວນ ເປັນຕົ້ນແມ່ນ ຈາກພາກລັດ, ລັດວິສາຫະກິດ, ນິຕິບຸກຄົນ, ບຸກຄົນ ແລະ ນັກສຶກສາ ຊຶ່ງແບ່ງໝວດແຂ່ງຂັນອອກເປັນ: ໝວດກ່ຽວກັບພາກລັດ ຫຼື ສາທະລະນະ, ໝວດກ່ຽວກັບພາກເອກະຊົນ, ໝວດຜະລິດຕະພັນສະຕາດອັບ ແລະ ໝວດນັກພັດທະນາ, ແນວຄວາມຄິດໃໝ່-ສ້າງສັນ, ເວທີນັກສຶກສາ. ພ້ອມກັນນັ້ນ, ເວທີແຫ່ງນີ້ ຈະເປັນເວທີແຫ່ງການຄັດເລືອກເອົາຜະລິດຕະພັນທີ່ດີເດັ່ນ ເພື່ອເປັນຕົວແທນ ຂອງ ສປປ ລາວ ເຂົ້າຮ່ວມແຂ່ງຂັນງານລະດັບພາກພື້ນ ແລະ ສາກົນໃນຕໍ່ໜ້າ.
ໃນໄລຍະ 1ປີ ຜ່ານມາ ພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໄດ້ສຸມໃສ່ໃນການພັດທະນາລະບົບດິຈິຕອນ ຕາມທ່າແຮງ, ຄວາມອາດສະມາຕົວຈີງ ເພື່ອປະກອບສ່ວນເຂົ້າໃນວຽກງານການຫັນເປັນດິຈິຕອນຂອງແຂວງ ຊື່ງໄດ້ພັດທະນາລະບົບໂປຣແກຣມຈຳນວນໜື່ງເຊັ່ນ:
- ລະບົບໂປແກມອອກອານຸຍາດ ICT ແບບອອນລາຍ;
- ລະບົບລົງຄະແນນສຽງສະພາປະຊາຊົນ ແບບເອເລັກໂຕຣນິກ;
- ລະບົບການຈັດການເຂົ້າການ-ເລີກການຂອງພະນັກງານ;
- ລະບົບຕິດຕາມ ເສົາສັນຍານໂທລະສັບ (BTS) ແລະ ຈຸດພິກັດບ້ານທີ່ຍັງບໍ່ທັນມີສັນຍານໂທລະສັບ;
- ລະບົບແພລດຟອມ ເວັບໄຊ ອົງການຈັດຕັ້ງລັດ ຂັ້ນແຂວງ.
ໃນກງານແຂ່ງຂັນ Lao Digital Award ປະຈໍາປີ 2024 ໃນຄັ້ງນີ້ ພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໄດ້ສົ່ງຜະລິດຕະພັນ ເຂົ້າແຂ່ງຂັນໃນ ໝວດຜະລິດຕະພັນ ພາກລັດ ຈຳນວນ 02 ຜະລິດຕະພັນ ຄື: 1.ລະບົບໂປແກມອອກອານຸຍາດ ICT ແບບອອນລາຍ ພັດທະນາລະບົບໂດຍ ທ່ານ ພູຄຳ ມະນີວັນ ຂະແໜງເຕັກໂນໂລຊີ ແລະ ນະວັດຕະກຳ ແລະ ລະບົບລົງຄະແນນສຽງສະພາປະຊາຊົນ ແບບເອເລັກໂຕຣນິກ ພັດທະນາລະບົບໂດຍ ທ່ານ ແກ່ນຈັນ ຫຼໍ່ບຸນທຳ ຂະແໜງດິຈິຕອນ ແລະ ຄວາມປອດໄພໄຊເບີ. ຜ່ານການຄັດເລືອກໃນຮອບທຳອິດ ທັງ 02 ຜະລິດຕະພັນ ແມ່ນຖືກຄັດເລືອກເຂົ້າແຂ່ງຂັນໃນຮອບສຸດທ້າຍ ແຂ່ງຂັນ Lao Digital Award ປະຈໍາປີ 2024 ໃນຄັ້ງວັນທີ 11 ມັງກອງ 2024 ໃນງາານ Digital Week 2024 ທີ່ນະຄອນຫຼວງວຽງຈັນ. ຊື່ງຜົນການຄັດເລືອກ ຜະລິດຕະພັນ ລະບົບໂປຣແກມອອກອານຸຍາດ ICT ແບບອອນລາຍ ຂອງພະແນກ ຕສ ແຂວງອຸດົມໄຊ ສາມາດຍາດໄດ້ລາງວັນຮອງຊະນະເລີດອັນດັບ 1 ຂອງໝວດຜະລິດຕະພັນ ພາກລັດ, ຮັບໃບກຽດຕິຄຸນ ແລະ ເງີນລາງວັນ ຈຳນວນ 13 ລ້ານກີບ. ລາງວັນຊະນະເລີດໄດ້ແກ່ ລະບົບຄັງສຳເນົາເອກະສານແບບເອເລັກໂຕຼນິກ (E-BOOK) ຂອງສະຖາບັນຄົ້ນຄ້ວານຳໃຊ້ເຕັກໂນໂລຊີອັດສະລິຍະ ແລະ ຮອງຊະນະເລີດອັນດັບ 2 ໄດ້ແກ່ ລະບົບຖານຂໍ້ມູນການທ່ອງທ່ຽວແບບເອເລັກໂຕຼນິກ ຂອງ ສປປລາວ ສະຖາບັນຄົ້ນຄ້ວານຳໃຊ້ເຕັກໂນໂລຊີອັດສະລິຍະ.
ຈາກຜົນງານດັ່ງກ່າວໄດ້ສະແດງໃຫ້ເຫັນວ່າຈາກຄວາມເອົາໃຈໃສ່ຊຸກຍູ້, ສົ່ງເສີມຊີ້ນຳ-ນຳພາຂອງການນຳພາທຸກຂັ້ນຕໍ່ກັບວຽກງານເຕັກໂນໂລຊີ ແລະ ການສື່ສານ ເວົ້າລວມ ເວົ້າສະເພາະກໍຄືວຽກງານການຫັນເປັນດິຈິຕອນ ໂດຍຫັນເອົາທ່າແຮງ, ຄວາມອາດສາມາດບົ່ມຊ້ອນທີ່ມີຢູ່ ມາໝູນໃຊ້ເຂົ້າໃນວຽກງານຕົວຈິງ ສົ່ງຜົນສະທ້ອນເຮັດໃຫ້ຄ່ອຍໆ ເກີດຄວາມສຳເລັດເທື່ອລະໜ້ອຍ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງ ກໍຄືປະເທດຊາດ ຊຶ່ງຜົນສຳເລັດໂດຍພື້ນຖານນີ້ ມັນຍັງສະທ້ອນໃຫ້ສັງຄົມ ກໍຄືນັກພັດທະນາ, ນັກຮຽນນັກສຶກສາ ກໍຄືປະຊາຊົນບັນດາເຜົ່າ ໂດຍສະເພາະແມ່ນຂັ້ນທອ້ງຖີ່ນ ເຫັນໄດ້ຄວາມສຳຄັນ, ເປັນຕົ້ນແບບ, ເປັນແຮງໃຈ ໃນການສຶກສາຮ່ຳຮຽນ-ຄົ້ນຄວ້າ, ພັດທະນາດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳ ນຳໃຊ້ເຂົ້າໃນການພັດທະນາວຽກງານຂົງເຂດຕ່າງໆ ໃນຕໍ່ໜ້າເທື່ອລະກ້າວ.
ບົດຂ່າວໂດຍ: ອານົງສັກ ສັນຕິສຸກ
ຂໍ້ມູນຈາກ: Lao Digital Award
