ພິທີ ມອບ ໃບຢັ້ງຢືນ ຂໍ້ແຂ່ງຂັນ 4 ບຸກ ປະຈໍາປີ 2024 ໃຫ້ແກ່ ຄະນະຊາວຫນຸ່ມ ຫນ່ວຍຮາກຖານ ພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ຈັດຂຶ້ນໃນຕອນເຊົ້າ ວັນທີ 26 ທັນວາ 2024 ທີ່ຫ້ອງປະຊຸມຂອງຕົນ ໂດຍການເປັນປະທານ ຂອງສະຫາຍ ຕຸ້ຍລີ ຕົວຢົງຈີ ເລຂາຄະນະຊາວຫນຸ່ມ ຫນ່ວຍຮາກຖານ ພະແນກ ເຕັກໂນໂລຊີ ແລະ ການສື່ສານ ແຂວງ, ເປັນກຽດເຂົ້າຮ່ວມໂດຍ ສະຫາຍ ນາງ ປິ່ນຄໍາ ອຸ່ນລະຄອນ ເລຂາຄະນະພັກຮາກຖານ, ເລຂາໜ່ວຍພັກ, ຫົວໜ້າ ພະແນກ ເຕັກໂນໂລຊີ ແລະ ການສື່ສານ ແຂວງ, ມີສະຫາຍ ນາງ ມະນີຈູ່ ຢາຈົງວາ ຮອງເລາຂາ ຄະນະບໍລິຫານງານຊາວຫນຸ່ມແຂວງ ພ້ອມດ້ວຍແຂກເຊີນຈາກຄະນະຊາວໜຸ່ມຫນ່ວຍຮາກຖານອ້ອມຂ້າງ ແລະ ສະມາຊິກຊາວໜຸ່ມພາຍໃນຫນ່ວຍ ເຂົ້າຮ່ວມ ທັງໝົດ 16 ສະຫາຍ, ຍິງ 9 ສະຫາຍ.
ໃນພິທີ ໄດ້ສະຫລຸບຕີລາຄາ ຜົນການເຄື່ອນໄຫວ ຈັດຕັ້ງປະຕິບັດວຽກງານ ຂໍ້ແຂ່ງຂັນ 4 ບຸກ ໃນຕະຫລອດໄລຍະ 1 ປີຜ່ານມາ ໂດຍຍົກ ດ້ານດີ,ຜົນງານ,ດ້ານອ່ອນແລະ ຂໍ້ຄົງຄ້າງຕ່າງໆ ຂອງວຽກງານແຕ່ລະດ້ານ ເຊິ່ງສາມາດຕີລາຄາຜົນສຳເລັດ: ບຸກດ້ານແນວຄິດ ປະຕິບັດໄດ້ 9,3%, ບຸກດ້ານການຝຶກຝົນຫລໍ່ຫລອມຕົນເອງ ປະຕິບັດໄດ້ 9,5%, ບຸກດ້ານການຈັດຕັ້ງ ປະຕິບັດໄດ້ 9,2% ແລະ ບຸກດ້ານການສ້າງວິຊາຊີບ ແລະ ວຽກເຮັດງານທຳ ປະຕິບັດໄດ້ 9,5%. ຕໍ່ກັບຜົນງານ ຈຶ່ງເຮັດໃຫ້ ສະມາຊິກຊາວຫນຸ່ມ ຫນ່ວຍຮາກຖານ ພະແນກ ເຕັກໂນໂລຊີ ແລະ ການສື່ສານ ມີຜົນງານດີເດັ່ນ ໃນການປະກອບສ່ວນເຂົ້າໃນການເຄື່ອນໄຫວ ຈັດຕັ້ງປະຕິບັດວຽກງານ ຂໍ້ແຂ່ງຂັນ 4 ບຸກ ປະຈຳປີ 2024 ໄດ້ຮັບໃບຍ້ອງຍໍ ຈາກຄະນະບໍລິຫານງານຊາວຫນຸ່ມແຂວງ ຈຳນວນ 13 ສະຫາຍ, ຍິງ 7 ສະຫາຍ ເປັນກຽດມອບໂດຍສະຫາຍ ນາງ ປິ່ນຄໍາ ອຸ່ນລະຄອນ ເລຂາຄະນະພັກຮາກຖານ, ເລຂາໜ່ວຍພັກ, ຫົວໜ້າ ພະແນກ ເຕັກໂນໂລຊີ ແລະ ການສື່ສານ ແຂວງ ແລະ ຍັງໄດ້ມອບ ໃບຢັ້ງຢືນ 4 ບຸກ ປະຈຳປີ 2024 ໃຫ້ກຽດມອບໂດຍ ສະຫາຍ ນາງ ມະນີຈູ່ ຢາຈົງວາ ຮອງເລາຂາ ຄະນະບໍລິຫານງານຊາວຫນຸ່ມແຂວງ.
ຕອນທ້າຍ ຍັງໄດ້ຮັບຟັງຄຳເຫັນໂອ້ລົມ ຂອງສະຫາຍ ນາງ ມະນີຈູ່ ຢາຈົງວາ ຮອງເລາຂາ ຄະນະບໍລິຫານງານຊາວຫນຸ່ມແຂວງ ເຊິ່ງກ່ອນອື່ນ ສະຫາຍໄດ້ຍ້ອງຍໍຊົມເຊີຍຕໍ່ກັບຜົນງານທີ່ ຄະນະຊາວຫນຸ່ມ ຫນ່ວຍຮາກຖານ ຍາດມາໄດ້ໃນຫຼາຍດ້ານທີ່ພົ້ນເດັ່ນ; ນອກນັ້ນ ຍັງໄດ້ເນັ້ນໃຫ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ສະມາຊິກພາຍໃນໜ່ວຍ, ສືບຕໍ່ຮັກສາມູນເຊື້ອ ແລະ ເສີມຂະຫຍາຍຜົນງານຂອງຕົນ ປັບປຸງແບບແຜນວິທີການເຮັດວຽກງານໃຫ້ເປັນລະບົບ ຕິດພັນກັບຂະບວນການຂອງຊາວໜຸ່ມຢ່າງເປັນປົກກະຕິ, ສ້າງຂະບວນການຕ່າງໆເພື່ອຕ້ອນຮັບວັນສຳຄັນຂອງຊາດ ຂອງພັກ ແລະ ຈັດຕັ້ງປະຕິບັດໃຫ້ບັນລຸຕາມລະດັບຄາດໝາຍ ທີ່ວາງໄວ້ຢ່າງມີຄຸນນະພາບທີ່ດີໃນຕໍ່ໜ້າ.
