ເພື່ອເປັນການຈັດຕັ້ງປະຕິບັດ ແລະ ຜັນຂະຫຍາຍວິໄສທັດ ກໍຄືຍຸດທະສາດການຫັນເປັນດິຈິຕອນ ຂອງ ສປປ ລາວ ໃຫ້ກາຍເປັນຮູບປະທຳ, ໃນວັນທີ 18 ມິຖຸນາ 2026 ຜ່ານມານີ້, ພະແນກເຕັກໂນໂລຊີ ແລະ ການສື່ສານ (ຕສ) ແຂວງອຸດົມໄຊ ໄດ້ຈັດຊຸດຝຶກອົບຮົມພາຍໃຕ້ຫົວຂໍ້: "ການຫັນເປັນທັນສະໄໝວຽກງານບໍລິຫານຫ້ອງການລັດ ໃນຍຸກດິຈິຕອນ" ຂຶ້ນຢ່າງເປັນທາງການ ທີ່ຫ້ອງປະຊຸມຂອງຕົນ. ຝຶກອົບຮົມຄັ້ງນີ້ ໄດ້ຮັບກຽດເປັນປະທານໂດຍ ທ່ານ ນາງ ປິ່ນຄໍາ ອຸ່ນລະຄອນ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ໂດຍມີພະນັກງານ-ລັດຖະກອນ ຈາກພາຍໃນພະແນກ ແລະ ຫ້ອງວ່າການເມືອງໄຊ ເຂົ້າຮ່ວມ.
ຈຸດປະສົງສຳຄັນຂອງການຝຶກອົບຮົມໃນຄັ້ງນີ້ ບໍ່ພຽງແຕ່ເປັນການຍົກລະດັບທັກສະຄວາມຮູ້ໃຫ້ແກ່ພະນັກງານ-ລັດຖະກອນເທົ່ານັ້ນ, ແຕ່ຍັງເປັນບາດກ້າວສຳຄັນໃນການຂັບເຄື່ອນການຫັນເປັນລັດດິຈິຕອນ (Digital Government) ຢູ່ຂັ້ນທ້ອງຖິ່ນ. ໂດຍມຸ່ງເນັ້ນການນຳເອົາເຕັກໂນໂລຊີດິຈິຕອນ, ໂດຍສະເພາະແມ່ນປັນຍາປະດິດ (AI) ແລະ ແພລດຟອມດິຈິຕອນທີ່ພັດທະນາຂຶ້ນສຳລັບພາກລັດ ເຂົ້າມາເປັນກົນໄກສຳຄັນໃນການປັບປ່ຽນຮູບແບບການເຮັດວຽກ ເພື່ອເຮັດໃຫ້ການບໍລິຫານລັດມີຄວາມໂປ່ງໃສ, ວ່ອງໄວ, ຫຼຸດຜ່ອນຂັ້ນຕອນທີ່ຊ້ຳຊ້ອນ ແລະ ກ້າວໄປສູ່ການເປັນຫ້ອງການທີ່ບໍ່ນຳໃຊ້ເອກະສານສະບັບເຈ້ຍເປັນຫຼັກ ໃນອະນາຄົດ.
ຊຸດຝຶກອົບຮົມດັ່ງກ່າວ ໄດ້ດຳເນີນໄປເປັນເວລາ 1 ວັນເຕັມ ຊຶ່ງຜູ້ເຂົ້າຮ່ວມຝຶກອົບຮົມໄດ້ຮັບຟັງການບັນຍາຍ ແລະ ປະຕິບັດລົງເລິກກ່ຽວກັບການນຳໃຊ້ເຄື່ອງມືປັນຍາປະດິດ (AI) ເຊັ່ນ: ຮຽນຮູ້ສິລະປະການຂຽນຄຳສັ່ງ (Prompt) ເພື່ອໃຫ້ AI ກາຍເປັນຜູ້ຊ່ວຍອັດສະລິຍະ, ການນຳໃຊ້ AI ຊ່ວຍໃນການວິເຄາະ-ສັງລວມເອກະສານຂະໜາດໃຫຍ່, ຮ່າງໜັງສືບໍລິຫານທາງລັດຖະການ, ສ້າງຮ່າງບົດສະເໜີໂຄງການ, ແປພາສາທາງການ ແລະ ຕະຫຼອດຮອດການຂຽນຂ່າວເພື່ອເຜີຍແຜ່. ພ້ອມນັ້ນ ຍັງໄດ້ແນະນຳການນຳໃຊ້ແພລດຟອມດິຈິຕອນທີ່ພັດທະນາຂຶ້ນສຳລັບພາກລັດໂດຍສະເພາະ ເຊັ່ນ: ລະບົບສົນທະນາພາກລັດ (G-Chat), ລະບົບປັນຍາປະດິດລາວ (Lao AI), ລະບົບແປພາສາ (Lao Translate) ແລະ ຈົດໝາຍເອເລັກໂຕຣນິກຂອງລັດ (...@...gov.la). ການຊຸກຍູ້ຫັນມານຳໃຊ້ເຄື່ອງມືຂອງລັດເຫຼົ່ານີ້ ແມ່ນເພື່ອຮັບປະກັນຄວາມເປັນເອກະພາບ ແລະ ຮັກສາຄວາມປອດໄພຂອງຂໍ້ມູນຂ່າວສານພາກລັດ.
ໃນຕອນທ້າຍຂອງການຝຶກອົບຮົມ, ທ່ານ ນາງ ປິ່ນຄໍາ ອຸ່ນລະຄອນ ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໄດ້ມີຄຳເຫັນໂອ້ລົມ ແລະ ຊີ້ນຳໃຫ້ຜູ້ເຂົ້າຮ່ວມຝຶກອົບຮົມ ຈົ່ງນຳເອົາບົດຮຽນ ແລະ ທັກສະ ທີ່ໄດ້ຝຶກອົບຮົມໃນຄັ້ງນີ້ ໄປໝູນໃຊ້ເຂົ້າໃນການປະຕິບັດໜ້າທີ່ວຽກງານຂອງຕົນຢ່າງຈິງຈັງ. ການຫັນເປັນດິຈິຕອນ ຈະປະສົບຜົນສຳເລັດໄດ້ ແມ່ນເລີ່ມຕົ້ນຈາກການເປີດໃຈຮັບເອົາສິ່ງໃໝ່ໆ ຈາກການພັດທະນາເຕັກໂນໂລຊີ ແລະ ນະວັດຕະກຳ ຂອງພະນັກງານ-ລັດຖະກອນທຸກຄົນ ເພື່ອຮ່ວມກັນສ້າງອົງການຈັດຕັ້ງລັດທີ່ທັນສະໄໝ ແລະ ພ້ອມຮັບໃຊ້ປະຊາຊົນໃນຍຸກດິຈິຕອນ ຢ່າງແທ້ຈິງ.
