ຊຸດອົບຮົມ ວຽກງານຄວາມປອດໄພທາງດ້ານຂໍ້ມູນຂ່າວສານ ຜ່ານສື່ສັງຄົມອອນລາຍ ຈັດຂຶ້ນລະຫວ່າງ ວັນທີ 9 ຫາ 10 ພຶດສະພາ 2024 ທີ່ພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໂດຍເປັນການສົມທົບກັນ ລະຫວ່າງ ກົມຄວາມປອດໄພໄຊເບີ, ກະຊວງ ເຕັກໂນໂລຊີ ແລະ ການສື່ສານ ແລະ ຄະນະກຳມະການຄຸ້ມຄອງອິນເຕີເນັດ ແຂວງອຸດົມໄຊ.
ຊຸດອົບຮົມຄັ້ງນີ້ ມີ ທ່ານ ຄຳຫລ້າ ສຸນນະລັດ ຫົວຫນ້າກົມຄວາມປອດໄພໄຊເບີ, ກະຊວງ ເຕັກໂນໂລຊີ ແລະ ການສື່ສານ, ທ່ານ ສົມບູນ ມະນີ ຫົວຫນ້າພະແນກ ເຕັກໂນໂລຊີ ແລະ ການສື່ສານ ຮອງປະທານຄະນະກຳມະການຄຸ້ມຄອງອິນເຕີເນັດ ແຂວງອຸດົມໄຊ, ມີວິຊາການຂັ້ນກະຊວງ ແລະ ຂັ້ນແຂວງ ຕະຫລອດຮອດສຳມະນາກອນ ທີ່ຕາງຫນ້າຈາກ ບັນດາພະແນກການອ້ອມຂ້າງແຂວງ ເຂົ້າຮ່ວມ 40 ທ່ານ ແລະ ຫ້ອງວ່າການເມືອງ 07 ເຂົ້າຮ່ວມ 14 ທ່ານ ຜ່ານລະບົບກອງປະຊຸມທາງໄກ, ລວມຜູ້ເຂົ້າຮ່ວມຝຶກອົບຮົມທັງໝົດ 57 ທ່ານ.
ການຈັດຊຸດອົບຮົມ ກໍເພື່ອຈັດຕັ້ງຜັນຂະຫຍາຍ ກ່ຽວກັບວຽກງານການຮັກສາຄວາມປອດໄພ ທາງດ້ານຂໍ້ມູນຂ່າວສານ ຜ່ານທາງສື່ສັງຄົມອອນລາຍ ໃຫ້ກວ້າງຂວາງ, ທົ່ວເຖິງ ແລະ ພ້ອມກັນ ຈັດຕັ້ງປະຕິບັດໃຫ້ເປັນເອກະພາບກັນໃນຂອບເຂດທົ່ວປະເທດ, ເປັນການສ້າງຄວາມເຂົ້າໃຈ ໃນກົນໄກການຕອບໂຕ້ ສື່ສັງຄົມອອນລາຍທົ່ວສັງຄົມ ພ້ອມທັງ ເສີມສ້າງທັກສະ ແລະຄວາມສາມາດ ໃຫ້ແກ່ພະນັກງານທີ່ຮັບຜິດຊອບວຽກງານດັ່ງກ່າວຢູ່ບັນດາຂະແຫນງການອ້ອມຂ້າງແຂວງອຸດົມໄຊ ຮັບຮູ້ ແລະ ເຂົ້າໃຈແຈ້ງ ເຖິງໄພຄຸກຄາມທາງໄຊເບີ ທີ່ເກີດຂຶ້ນ ແລະ ສາມາດ ຮັບມືຕໍ່ກັບເຫດການດັ່ງກ່າວໃຫ້ທັນກັບສະພາບການ, ແນ່ໃສ່ ຫລີກລຽງ ແລະ ຫລຸດຜ່ອນ ບັນຫາປະກົດການຫຍໍ້ທໍ້ ໂດຍສະເພາະ ແມ່ນການຕົວະຍົວະຫລອກລວງ ຜ່ານສື່ສັງຄົມອອນລາຍໃຫ້ນັບມື້ຫລຸດຫນ້ອຍຖອຍລົງ. ນອກນັ້ນ ຍັງເປັນການຍົກລະດັບວຽກງານການຮັກສາຄວາມປອດໄພ ທາງດ້ານຂໍ້ມູນຂ່າວສານ ຜ່ານສື່ສັງຄົມອອນລາຍ ຂອງແຂວງອຸດົມໄຊ ໃຫ້ມີປະສິດທິພາບເທື່ອລະກ້າວ.
ໃນພິທີເປີດ ທ່ານ ຄໍາຫຼ້າ ສຸນນະລັດ ຫົວໜ້າກົມຄວາມປອດໄພໄຊເບີ ໄດ້ກ່າວວ່າ: ໃນປັດຈຸບັນ ເຕັກໂນໂລຊີສື່ສານ-ຂໍ້ມູນຂ່າວສານ ແມ່ນເປັນເຄື່ອງມືຫຼັກໃນການຂັບເຄື່ອນເສດຖະກິດມະຫາພາກຂອງປະເທດ ແລະ ຍັງຊ່ວຍເຊື່ອມໂຍງດ້ານຂໍ້ມູນຂ່າວ-ສານ ຂອງບັນດາປະເທດໃນອານຸພາກພື້ນ ແລະ ສາກົນ ເຂົ້າດ້ວຍກັນ, ສ້າງທຸກເງື່ອນໄຂຂໍ້ສະດວກໃຫ້ແກ່ຂະແໜງການຕ່າງໆ ໃນການເຄື່ອນໄຫວວຽກງານຂອງຕົນ ພ້ອມກັນນັ້ນຍັງໄດ້ຊ່ວຍຍົກສູງຄຸນນະພາບການດໍາລົງຊີວິດຂອງ ປະຊາ ຊົນລາວເຮົາ ໃຫ້ດີຂຶ້ນເທື່ອລະກ້າວ. ແຕ່ໃນທາງກັບກັນ ເມື່ອມີການເຊື່ອມຈອດ ດ້ານຂໍ້ມູນ-ຂ່າວສານ ເຂົ້າດ້ວຍກັນ ແລະ ໃນເມື່ອ ທຸກຂະແໜງການໄດ້ຫັນເປັນອຸດສາຫະກໍາທັນສະໄໝ ດ້ວຍການນໍາໃຊ້ເຕັກໂນໂລຊີ ທີ່ທັນສະໄໝແລ້ວ ບັນຫາການຖືກເຈາະລະບົບ ເພື່ອລັກເອົາຂໍ້ມູນ-ຂ່າວສານ, ການປອມແປງຂໍ້ມູນ, ການທໍາລາຍຂໍ້ມູນ ຕະຫຼອດເຖິງການດັກສະກັດເອົາຂໍ້ມູນ ແລະ ອື່ນໆ ລວມທັງການນໍາໃຊ້ ສື່ສັງຄົມອອນລາຍ ທີ່ບໍ່ຖືກຕ້ອງ ກໍ່ໃຫ້ເກີດຄວາມເສຍຫາຍ ແລະ ສ້າງຄວາມບໍ່ສະຫງົບໃຫ້ແກ່ສັງຄົມ ເປັນຕົ້ນແມ່ນ ໃສ່ຮ້າຍປ້າຍສີ, ມິ່ນປະໝາດ, ໃຊ້ຄໍາສັບທີ່ບໍ່ສຸພາບ, ການຕັດຕໍ່ຮູບພາບ, ການນໍາໃຊ້ຂໍ້ມູນທີ່ມີລັກສະນະຄວາມຮຸນແຮງ, ຂໍ້ມູນທີ່ບໍ່ມີຄວາມຈິງ ແລະ ການນໍາເອົາຂໍ້ມູນຄອມພິວເຕີ/ອິນເຕີເນັດ ທີ່ເປັນການທໍາລາຍຄວາມໝັ້ນຄົງຂອງຊາດ, ຄວາມເປັນລະບຽບຮຽບຮ້ອຍໃນສັງຄົມ ແລະ ອື່ນໆ ຊຶ່ງບັນຫາດັ່ງກ່າວ ທຸກຄົນໃນສັງຄົມ, ທຸກພາກສ່ວນ ທັງພາກລັດ ແລະ ເອກະຊົນ ຕ້ອງມີສະຕິ ແລະ ຕ້ອງໄດ້ຊ່ວຍກັນເອົາໃຈໃສ່ປ້ອງກັນ, ສະກັດກັ້ນ ແລະ ແກ້ໄຂບັນຫາດັ່ງກ່າວຢ່າງຈິງຈັງ.
ສໍາລັບ ເນື້ອໃນບົດຮຽນທີ່ນໍາມາຝຶກອົບຮົມ ປະກອບມີ: ການຄຸ້ມຄອງ ເດັກນ້ອຍ ຈາກສື່ສັງຄົມອອນລາຍ, ສະຕິຕໍ່ການບໍ່ຖືກຫລອກລວງທາງອອນລາຍ, ເຕັກນິກການນຳໃຊ້ ເຕັກໂນໂລຊີ ຂໍ້ມູນຂ່າວສານໃຫ້ມີຄວາມປອດໄພ, ກົນໄກການຕອບໂຕ້ ສື່ສັງຄົມອອນລາຍທົ່ວສັງຄົມ ພ້ອມມີການສົນທະນາ ແລະ ແລກປ່ຽນຄວາມຄິດເຫັນເຊິ່ງກັນ ແລະ ກັນ ທັງດ້ານທິດສະດີ ແລະ ການຈັດຕັ້ງປະຕິບັດຕົວຈິງກ່ຽວກັບວຽກງານຄຸ້ມຄອງອິນເຕີເນັດ.
