ຄະນະກຳມະການຄຸ້ມຄອງອິນເຕີເນັດ ຂັ້ນແຂວງ ແຂວງອຸດົມໄຊ (ຄຄອຂ) ໄດ້ຈັດກອງປະຊຸມ ປຶກສາຫາລືວຽກງານຂອງຄະນະກໍາມະການຄຸ້ມຄອງອິນເຕີເນັດ ຂັ້ນແຂວງ ໃນຕອນເຊົ້າຂອງວັນທີ 12 ກຸມພາ 2024 ທີ່ຫ້ອງປະຊຸມຂອງພະແນກ ເຕັກໂນໂລຊີ ແລະ ການສື່ສານ, ໂດຍການເປັນປະທານຂອງ ທ່ານ ອ່ອນແກ້ວ ອຸ່ນອາລົມ ຄະນະປະຈຳພັກແຂວງ ຮອງເຈົ້າແຂວງ ປະທານຄະນະກຳມະການຄຸ້ມຄອງອິນເຕີເນັດ ຂັ້ນແຂວງ, ມີທ່ານຫົວໜ້າພະແນກ ເຕັກໂນໂລຊີ ແລະ ການສື່ສານ ຮອງປະທານ-ຜູ້ປະຈຳການ, ພ້ອມດວ້ຍບັນດາທ່ານຄະນະກຳມະການຄຸ້ມຄອງອິນເຕີເນັດ ຂັ້ນແຂວງ ແລະ ກອງເລຂາຊ່ວຍວຽກເຂົ້າຮ່ວມ.
ກອງປະຊຸມໄດ້ຮັບຟັງການເຜີຍແຜ່ນິຕິກຳ, ເອກະສານກ່ຽວກັບວຽກງານຄຸ້ມຄອງອິນເຕີເນັດ ຈຳນວນໜື່ງ ເປັນຕົ້ນແມ່ນ ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 98/ຫສນຍ, ລົງວັນທ 24 ກໍລະກົດ 2023 ການຜັນຂະຫຍາຍທິດຊີ້ນຳ ກ່ຽວກັບການຄຸ້ມຄອງອິນເຕີເນັດ ແລະ ສື່ສັງຄົມອອນລາຍ, ຂໍ້ຕົກລົງ ສະບັບເລກທີ 004/ຄຄອຊ ລົງວັນທີ 12 ມັງກອນ 2023 ວ່າດ້ວຍ ການແຕ່ງຕັ້ງຈຸດປະສານງານຂອງຄະນະກຳມະການຄຸ້ມຄອງອີນເຕີເນັດແຫ່ງຊາດ ປະຈຳແຕ່ລະພາກສ່ວນ ໃນຂອບເຂດທົ່ວປະເທດ, ຂໍ້ຕົກລົງ ຂອງທ່ານເຈົ້າແຂວງ ສະບັບເລກທີ 1369/ອຊ ລົງວັນທີ 30 ຕຸລາ 2023 ວ່າດວ້ຍ ການແຕ່ງຕັ້ງຄະນະກຳມະການຄຸ້ມຄອງອິນເຕີເນັດ ຂັ້ນແຂວງ ແຂວງອຸດົມໄຊ ແລະ ກໍໄດ້ຮັບຟັງການຜ່ານຮ່າງ ບົດສະຫຼຸບການຈັດຕັ້ງປະຕິບັດວຽກງານຄະນະກຳມະການຄຸ້ມຄອງອິນເຕີເນັດ ຂັ້ນແຂວງ ແຂວງອຸດົມໄຊ ປະຈຳປີ 2023 ແລະ ທິດທາງແຜນການ ປະຈຳປີ 2024, ຜ່ານ ຮ່າງຂ້ໍຕົກລົງ ວ່າດ້ວຍ ການແຕ່ງຕັ້ງຈຸດປະສານງານ ຂອງຄະນະກໍາມະການຄຸ້ມຄອງອິນເຕີເນັດ ຂັ້ນແຂວງ ປະຈໍາແຕ່ລະພາກສ່ວນໃນຂອບເຂດທົ່ວແຂວງ. ພ້ອມນັ້ນ ຜູ້ເຂົ້າຮ່ວມກອງປະຊຸມໄດ້ຄົ້ນຄວ້າ, ປະກອບຄຳເຫັນຢ່າງກົງໄປກົງມາເພື່ອຕີລາຄາ ແລະ ຖອດຖອນບົດຮຽນໃນການຈັດຕັ້ງປະຕິບັດວຽກງານຄຸ້ມຄອງອິນເຕີເນັດ ຢູ່ແຂວງອຸດົມໄຊ ໃນໄລຍະຜ່ານມາ ໂດຍສະເພາະແມ່ນ ການກຳນົດໂຄງສ້າງບົດສະຫຼຸບການຈັດຕັ້ງປະຕິບັດວຽກງານຄະນະກຳມະການຄຸ້ມຄອງອິນເຕີເນັດ ຂັ້ນແຂວງ ແຂວງອຸດົມໄຊ ປະຈຳປີ 2023 ແລະ ທິດທາງແຜນການ ປະຈຳປີ 2024, ແບບແຜນວິທີເຮັດວຽກ, ຂອດການປະສານງານ ຂອງຄະນະກຳມະການ ຄຄອຂ.
ໃນຕອນທ້າຍກອງປະຊຸມ ທ່ານປະທານກອງປະຊຸມ ໄດ້ສະຫຼຸບສັງລວມ ແລະ ມີຄຳເຫັນຊີ້ນຳຕໍ່ກອງປະຊຸມ ຊຶ່ງທ່ານໄດ້ຍົກໃຫ້ເຫັນເຖິງພາລະບົດຂອງຄະນະກຳມະການຄຸ້ມຄອງອິນເຕີເນັດ ຂັ້ນແຂວງ ຊື່ງມີພາລະບົດບາດເປັນເສນາທິການໃຫ້ແກ່ເຈົ້າແຂວງ ແລະ ຄະນະກຳມະການຄຸ້ມຄອງອິນເຕີເນັດແຫ່ງຊາດ ໃນການຄົ້ນຄວ້າ, ຈັດຕັັ້ງຜັນຂະຫຍາຍ, ຊີ້ນຳ ແລະ ປະສານງານກັບສູນກາງ ແລະ ບັນດາການຈັດຕັັ້ງ ຂັັ້ນທ້ອງຖິ່ນ ກ່ຽວກັບການຄົ້ນຄວ້າ, ການປະສານງານ, ຕິດຕາມ, ຄຸ້ມຄອງ, ກວດກາ, ຕອບຕ້ານ, ໂຕ້ຕອບ ແລະ ຊຸກຍູ້ສົົ່ງເສີມ ວຽກງານອິນເຕີເນັດ, ເຕັກໂນໂລຊີການສື່ສານ ຂໍ້ມູນ ຂ່າວສານ, ເຕັກໂນໂລຊີດິຈິຕອນ, ການຫັນເປັນດິຈິຕອນ, ວິໄສທັດ, ຍຸດທະສາດ ແລະ ແຜນພັດທະນາເສດຖະກິດດິຈິຕອນ ແຫ່ງຊາດ, ເນື້ອໃນຂໍ້ມູນ ຂ່າວສານຜ່ານອິນເຕີເນັດ, ຄວາມປອດໄພດ້ານເຕັກໂນໂລຊີການສື່ສານ ຂໍ້ມູນຂ່າວສານ ໃຫ້ມີການພັດທະນາສູງຂື້ນ ພ້ອມທັງໃຫ້ຮັບປະກັນຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ. ແລະພ້ອມນັ້ນ ຍັງໄດ້ຊີ້ນຳໃນການຈັດຕັ້ງປະຕິດວຽກງານດັ່ງກ່າວ ໃຫ້ແກ່ຄະນະກຳມະການ ຄຄອຂ ແລະ ກອງເລຂາຊ່ວຍວຽກ ເພື່ອເຮັດໃຫ້ວຽກງານຄຸ້ມຄອງອິນເຕີເນັດ ພາຍໃນແຂວງ ມີປະສິດທິພາບ ແລະ ປະສິດທິຜົນ ດີຂື້ນກວ່າເກົ່າ.
ບົດຂ່າວໂດຍ: ອານົງສັກ ສັນຕິສຸກ
