ໃນຍຸກໂລກາພິວັດແຫ່ງການພັດທະນາ ພາກອຸດສະຫະກໍາ ມີຄວາມສໍາຄັນຕໍ່ການຂັບເຄື່ອນເສດຖະກິດຂອງໂລກ ແລະ ມີບົດບາດຕໍ່ການພັດທະນາເສດຖະກິດ-ສັງຄົມ, ແນໃສ່ເພີ່ມຂີດຄວາມສາມາດ ແລະ ສັກກະຍະພາບໃນການແຂ່ງຂັນໃນລະດັບສາກົນ, ສ້າງລາຍໄດ້ເຂົ້າສູ່ປະເທດ, ເປັນມິດກັບສິ່ງແວດລ້ອມ-ສັງຄົມ ແລະ ເປັນປັດໃຈທີ່ສໍາຄັນພຶ້ນຖານ ໃນການພັດທະນາປະເທດໄປສູ່ຄວາມຍືນຍົງ. ຫຼາຍປະເທດໃນໂລກ ໄດ້ກໍານົດຍຸດທະສາດໃນການພັດທະນາອຸດສາຫະກຳ ໂດຍສຸມໃສ່ການສ້າງໂຄງລ່າງພື້ນຖານ, ອອກນະໂຍບາຍເພື່ອອໍານວຍຄວາມສະດວກໃນການພັດທະນາອຸດສາຫະກຳ ແລະ ຍົກລະດັບຂອງຜູ້ປະກອບການໃຫ້ສອດຄ່ອງກັບຄວາມຕ້ອງການຂອງຕະຫຼາດໂລກ, ຜະລິດສິນຄ້າທີ່ມີຄຸນນະພາບ ຕອບສະໜອງຕໍ່ການດໍາລົງຊິວິດປະຈໍາວັນໃນທຸກກຸ່ມເປົ້າໝາຍ ພາຍໃຕ້ການບໍລິການ ແລະ ລາຄາທີ່ເຫມາະສົມ ໂດຍນໍາໃຊ້ງົບປະມານເຂົ້າໃນການຄົ້ນຄ້ວາ-ວິໃຈດ້ານເອເລັກໂຕນິກ ແລະ ເຄື່ອງກົນຈັກທີ່ທັນສະໄໝເຂົ້າໃນການຜະລິດ ເປັນຕົ້ນ ການປັບປຸງອອກແບບໃນການບໍລິຫານຈັດການ ແລະ ຂະບວນການຜະລິດໂດຍການນໍາໃຊ້ລະບົບ ອັດຕະໂນມັດ ໃນການຄວບຄຸມ ເຄື່ອງຈັກໃນໂຮງງານ ແລະ ການນໍາໃຊ້ເຄື່ອງເອເລັກໂຕນິກ, ຊຸບເປີຄອມພິວເຕີ້, ລະບົບເຊັນເຊີ ແລະ ຫຸ່ນຍົນເຂົ້າໃນຂະບວນການຜະລິດ ໃນທຸກຂະແຫນງອຸດສາຫະກໍາເປົ້າໝາຍ ເພື່ອເຮັດໃຫ້ການຜະລິດມີປະສິດທິພາບ, ປະສິດທິຜົນ, ປະຫຍັດເວລາ ແລະ ເຮັດໃຫ້ຜະລິດຕະພັນມີຄຸນນະພາບສູງ.
ແນວໂນ້ມໃນການຄົ້ນຄ້ວາ-ວິໃຈດ້ານເອເລັກໂຕນິກເຂົ້າໃນການພັດທະນາອຸດສາຫະກໍານັ້ນ ມີການພັດທະນາຢ່າງຕໍ່ເນື່ອງ ໂດຍສະເພາະ ການພັດທະນາເຕັກໂນໂລຊິຜະລິດຊິ້ນສ່ວນກົນຈັກຂະຫນາດນ້ອຍ ທີ່ມີຄວາມໜາ 200-500 ໄມໂຄຣແມັດ ເຂົ້າໃນອຸປະກອນເອເລັກໂຕຣນິກ ເພື່ອອຸດສາຫະກໍາໃນອານາຄົດ ເຊັ່ນ: ຊີ້ນສ່ວນແຂນກົນ, ມໍເຕີສໍາຫຼັບຮາດດິດ, ແຜ່ນລະບາຍຄວາມຮ້ອນຂະໜາດນ້ອຍ, ຕົວເກັບປະຈຸສາມາດປັບຄ່າໄດ້, ຈໍສະແດງຜົນພລາສມາ ແລະ ເຊັນເຊີສະຫຼັບ ກວດວັດອຸນຫະພູມຄວາມຊຸ່ມ ແລະ ປະລິມານສານພິດໃນສິ່ງແວດລ້ອມ ເຮັດໃຫ້ລະບົບຄວບຄຸມອັດຕະໂນມັດ ສາມາດຄວບຄຸມຂະບວນການຜະລິດທີ່ມີຄວາມສັບຊ້ອນໃຫ້ມີຄວາມຖືກຕ້ອງຊັດເຈນສູງ, ການຜະລິດມີປະສິດທິພາບ, ປະສິດທິຜົນ ແລະ ປະຫຍັດເວລາ, ລະບົບການສື່ສານ ແລະ ຄອມພີວເຕີ ທີ່ມີການປະມວນຜົນສູງ ສາມາດອອກແບບ ເກັບກໍາຂໍ້ມູນ ແລະ ຄວບຄຸມເຄື່ອງຈັກ ມີຄວາມຖືກຕ້ອງ ຊັດເຈນ ແລະ ຊ່ວຍຫຼຸດຕົ້ນທຶນໃນການຜະລິດ.
ສປປ ລາວ ໄດ້ກໍານົດຍຸດທະຍາສາດ ໃນການຫັນເປັນອຸດສາຫະກໍາ ແລະ ທັນສະໄໝ ເພື່ອພັດທະນາປະເທດຊາດ ໃຫ້ຫຼຸດພົ້ນອອກຈາກຄວາມດ້ອຍພັດທະນາ ແລະ ກ້າວສູ່ປະເທດທີ່ມີຄວາມຈະເລີນແບບຍືນຍົງ ໂດຍການສ້າງເງື່ອນໄຂທີ່ອໍານວຍຄວາມສະດວກທາງດ້ານນະໂຍບາຍ, ກົດຫມາຍ ແລະ ລະບຽບການ ໃນການພັດທະນາ ໃຫ້ແກ່ຜູ້ປະກອບການ, ຍົກລະດັບສີມືແຮງງານ, ສົ່ງເສີມການນໍາໃຊ້ເຕັກໂນໂລຊີທີ່ທັນສະໄໝ ທີ່ເປັນມິດກັບສິ່ງແວດລ້ອມ ເຂົ້າໃນການພັດທະນາອຸດສາຫະກໍາ, ຂະບວນການຜະລິດ ໄດ້ມາດຕະຖານ ເປັນທີ່ຍອມຮັບຈາກສາກົນ ແລະ ຜະລິດສິນຄ້າສອດຄ່ອງກັບຄວາມຕ້ອງການຂອງຕະຫຼາດໃນແຕ່ລະປະເພດ. ຊຸກຍູ້ສົ່ງເສີມໃຫ້ມີການຈັດສັນ, ສ້າງ ແລະ ພັດທະນາເຂດນິຄົມອຸດສາຫະກໍາ ແລະ ເຂດຜະລິດ ເພື່ອສົ່ງອອກ ເພື່ອຮັບຮອງການຂະຫຍາຍຕົວຂອງໂຮງງານອຸດສາຫະກໍາໃນບັນດາແຂວງ ທົ່ວປະເທດ ຕາມສະພາບການພັດທະນາເສດຖະກິດ-ສັງຄົມ ແລະ ທັງເປັນການດຶງດູດການລົງທຶນ.
ດັ່ງນັ້ນ, ການຄົ້ນຄ້ວາ-ພັດທະນາ, ເລືອກເຟັ້ນນໍາໃຊ້ ເອເລັກໂຕນິກທີ່ມີຄວາມກ້າວຫນ້າທັນສະໄຫມເຂົ້າໃນການພັດທະນາອຸດສາຫະກຳ ເປັນຕົ້ນ ລະບົບຄວບຄຸມອັດຕະໂນມັດ ໃຫ້ແທດເຫມາະກັບສະພາບຕົວຈິງ ຈຶ່ງມີຄວາມຈຳເປັນ ແລະ ສໍາຄັນຕໍ່ການພັດທະນາເສດຖະກິດ-ສັງຄົມ ໃນຍຸກອຸດສາຫະກຳ 4.0.
