ສະຫຼອງວັນໂທລະຄົມມະນາຄົມ ແລະ ຂໍ້ມູນຂ່າວສານ ສາກົນ ຄົບຮອບ 159 ປີ ພາຍໃຕ້ຄຳຂວັນວ່າ : “ນະວັດຕະກໍາດີຈີຕອນ ເພື່ອການພັດທະນາແບບຍືນຍົງ (Digital Innovation for Sustainable Development)”.

ໃນວັນທີ 21 ພຶດສະພາ 2024, ທີ່ພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໄດ້ຈັດພິທີສະເຫຼີມສະຫຼອງວັນໂທລະຄົມມະນາຄົມ ແລະ ຂໍ້ມູນຂ່າວສານ ສາກົນ ຄົບຮອບ 159 ປີ ໂດຍໃຫ້ກຽດເຂົ້າຮ່ວມເປັນປະທານ ຂອງທ່ານ ສົມບູນ ມະນີ, ເລຂາຄະນະພັດກຮາກຖານ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ພ້ອມດ້ວຍຄະນະພະແນກ, ຄະນະອຳນວຍການບໍລິສັດໄປສະນີ, ໂທລະຄົມມະນາຄົມ ແລະ ເຕັກໂນໂລຊີຂໍ້ມູນຂ່າວສານ ແລະ ການສື່ສານ ຢູ່ພາຍໃນແຂວງ, ພະນັກງານ-ລັດຖະກອນ, ພະນັກງານບໍລິສັດຂົງເຂດ ເຕັກໂນໂລຊີ ແລະ ການສື່ສານ ເເຂົ້າຮ່ວມຢ່າງພ້ອມພຽງ.

ຈຸດປະສົງຂອງສະຫຼອງວັນໂທລະຄົມມະນາຄົມ ແລະ ຂໍ້ມູນຂ່າວສານ ສາກົນ ຄົບຮອບ 159 ປີ ໃນຄັ້ງນີ້ ເພື່ອໂຄສະນາເຜີຍແຜ່ປູກຈິດສໍານຶກໃຫ້ແກ່ພະນັກງານ, ທະຫານຕໍາຫຼວດ ແລະ ປະຊາຊົນລາວບັນດາເຜົ່າທົ່ວປະເທດ ໂດຍສະເພາະແມ່ນພະນັກງານ-ລັດຖະກອນ, ລັດວິສາຫະກິດ, ບໍລິສັດດ້ານ ໄປສະນີ, ໂທລະຄົມມະນາຄົມ ແລະ ເຕັກໂນໂລຊີຂໍ້ມູນຂ່າວສານ ແລະ ການສື່ສານ ໄດ້ຮັບຮູ້ ແລະ ເຫັນໄດ້ເຖິງຄວາມໝາຍຄວາມສໍາຄັນ ຂອງວຽກງານໂທລະຄົມມະນາຄົມ, ອິນເຕີເນັດ ແລະ ເຕັກໂນໂລຊີດິຈິຕອນ ເປັນຕົ້ນແມ່ນ ການຂະຫຍາຍຕົວ ແລະ ການປະກອບສ່ວນຂອງວຽກງານດັ່ງກ່າວ ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ແລະ ເປັນການສ້າງຂະບວນການຂໍ່ານັບຮັບຕ້ອນ ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ III ຂອງອົງຄະນະພັກ ກະຊວງເຕັກໂນໂລຊີ ແລະ ການສື່ສານ.

ທ່ານ ສົມບູນ ມະນີ, ເລຂາຄະນະພັດກຮາກຖານ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ມີຄຳເຫັນບາງຕອນວ່າ: ວັນໂທລະຄົມມະນາຄົມ ສາກົນ ຖືກກຳນົດຂຶ້ນໃນປີ 1969 ເພື່ອລຳເລິກເຖິງການກໍ່ຕັ້ງສະຫະພາບໂທລະຄົມນາຄົມລະຫວ່າງປະເທດ (International Telecommunication Union: ITU) ຊຶ່ງກໍ່ຕັ້ງຂຶ້ນທີ່ນະຄອນປາລີ ປະເທດຟຣັ່ງ ໃນປີ 1865 ຂະນະນັ້ນໃຊ້ຊື່ວ່າ ສະພາບໂທລະຄົມນາຄົມລະຫວ່າງປະເທດ ສ້າງຕັ້ງຂຶ້ນເພື່ອສະໜັບສະໜູນ, ສົ່ງເສີມຄວາມຮ່ວມມືລະຫວ່າງປະເທດໃນການພັດທະນາດ້ານໂທລະຄົມນາຄົມ.

ຕໍ່ມາໃນປີ 2005 ໃນປະຊຸມສຸດຍອດໂລກວ່າດ້ວຍສັງຄົມຂໍ້ມູນຂ່າວສານ ໄດ້ຮຽກຮ້ອງໃຫ້ສະມັດຊາໃຫຍ່ແຫ່ງສະຫະປະຊາຊາດ ກຳນົດໃຫ້ວັນທີ 17 ພຶດສະພາ ເປັນວັນສັງຄົມຂໍ້ມູນຂ່າວສານ ສາກົນ ເພື່ອເນັ້ນຢ້ຳ ແລະ ໃຫ້ຄວາມສຳຄັນກັບເຕັກໂນໂລຊີການສື່ສານຂໍ້ມູນຂ່າວສານ ແລະ ການສື່ສານ.

ແລະໃນປີຕໍ່ມາ ປີ 2006 ອົງການສະຫະປະຊາຊາດໄດ້ກຳນົດ ໃຫ້ ລວມວັນສຳຄັນທັງສອງວັນເປັນວັນດຽວກັນ ເພື່ອໃຫ້ປະເທດສະມາຊິກໃຫ້ຄວາມສຳຄັນກັບ “ວັນໂທລະຄົມມະນາຄົມ ແລະ ສັງຄົມຂໍ້ມູນຂ່າວສານ ສາກົນ” ຊຶ່ງກົງກັບວັນທີ 17 ພຶດສະພາ ຂອງທຸກປີ. ສະນັ້ນ ໃນແຕ່ລະປີ ສປປ ລາວ ແລະ ບັນດາປະເທດສະມາຊິກຂອງສະຫະພາບໂທລະຄົມມະນາຄົມສາກົນ ໄດ້ພ້ອມກັນສະເຫລີມ ສະຫລອງວັນດັ່ງກ່າວຢ່າງເປັນຂະບວນໃນທົ່ວໂລກ.

ໃນປີ 2024 ນີ້ ວັນໂທລະຄົມສາກົນ ແລະ ສັງຄົມຂໍ້ມູນຂ່າວສານ ສາກົນ ຄົບຮອບ 159 ປີ ສະຫະພາບໂທລະຄົມມະນາຄົມສາກົນ ໄດ້ ສະເຫຼີມສະຫຼອງ ພາຍໃຕ້ຄຳຂວັນວ່າ : “ນະວັດຕະກໍາດີຈີຕອນ ເພື່ອການພັດທະນາແບບຍືນຍົງ (Digital Innovation for Sustainable Development)”. ນະວັດຕະກໍາດິຈິຕອນແມ່ນກຸນແຈທີ່ສໍາຄັນໃນການຂັບເຄື່ອນການພັດທະນາເສດຖະກິດ-ສັງຄົມ ແບບຍືນຍົງ ຂອງບັນດາປະເທດໃນທົ່ວໂລກ.

ໃນຊຸມປີຜ່ານມາ ວຽກງານໂທລະຄົມມະນາຄົມ, ອິນເຕີເນັດ, ເຕັກໂນໂລຊີດີຈີຕອນ ແລະ ນະວັດຕະກໍາ ຂອງ ສປປ ລາວ ໄດ້ມີການເຄື່ອນໄຫວ ແລະ ພັດທະນາຂຶ້ນຢ່າງຕັ້ງໜ້າ ຮອດປະຈຸບັນນີ້ຢູ່ປະເທດເຮົາ ສາມາດຂະຫຍາຍເຄືອຂ່າຍສາຍສົ່ງດ້ວຍສາຍແກ້ວໃຍແສງ (Optic Fiber) ໃນທົ່ວປະເທດ ໄດ້ 98.524 ກິໂລແມັດ ເຊື່ອມໂຍງທຸກແຂວງ ທຸກເມືອງ ແລະ ບ້ານຈຳນວນຫຼາຍ. ຮອດທ້າຍປີ 2023 ສປປ ລາວ ມີຈຸດເຊື່ອມຕໍ່ສາຍສົ່ງກັບຕ່າງປະເທດຈຳນວນ 18 ຈຸດ ໃນນັ້ນເຊື່ອມຕໍ່ກັບ: ໄທ 06 ຈຸດ, ຫວຽດນາມ 05 ຈຸດ, ກຳປູເຈຍ 02 ຈຸດ, ມຽນມາ 02 ຈຸດ ແລະ ສປ ຈີນ 03 ຈຸດ. ສັນຍານໂທລະສັບມືຖືຄວມຄຸມໄດ້ 18 ແຂວງ, 148 ເມືອງ ແລະ 8.245 ບ້ານ ກວມ 97% ຂອງຈໍານວນບ້ານທັງໝົດ ໃນນີ້ ແຍກເປັນລະບົບ 3G ກວມ 85%, 4G ກວມ 76% ແລະ ໃນຕົ້ນປີ 2024 ໄດ້ເປີດໃຫ້ບໍລິການອິນເຕີເນັດຄວາມໄວສູງດ້ວຍລະບົບ 5G ໃນນະຄອນຫຼວງວຽງຈັນ, ແຂວງຫຼວງພະບາງ ແລະ ແຂວງບໍ່ແກ້ວ. ປະຈຸບັນມີຜູ້ລົງທະບຽນນໍາໃຊ້ໂທລະສັບມືຖື 6.113.455 ເລກໝາຍ ເທົ່າກັບ 100% ຂອງແຜນການ, ແຜນການ 6,5 ລ້ານເລກໝາຍ ແລະ ລົງທະບຽນນໍາໃຊ້ອິນເຕີເນັດ, ລະບົບມີສາຍ ແລະ ຜ່ານລະບົບມືຖື ທັງໝົດ 4.614.752 ບັນຊີ ເທົ່າກັບ 96% ຂອງແຜນການ, ແຜນການ 4,7 ລ້ານ ບັນຊີ. ປະຈຸບັນນີ້ ມີຜູ້ໃຫ້ບໍລິການໂທລະຄົມມະນາຄົມ ຈຳນວນ 5 ບໍລິສັດ ແລະ ຜູ້ໃຫ້ບໍລິການອິນເຕີເນັດປະເພດ I ຈໍານວນ 10 ບໍລິສັດປະເພດ II ຈໍານວນ 3 ບໍລິສັດ, ປະເພດ III ຈໍານວນ 13 ບໍລິສັດ. ປີ 2023 ບັນດາຫົວໜ່ວຍທຸລະກິດເຫຼົານັ້ນ ສາມາດສ້າງລາຍຮັບໄດ້ 5.021 ຕື້ກ່ວາກີບ, ມອບພັນທະໃຫ້ລັດ 391,63 ຕື້ກ່ວາກີບ. ນີ້ເປັນບາດກ້າວໃໝ່ທີ່ສໍາຄັນໃນການຄຸ້ມຄອງ ແລະ ພັດທະນາວຽກງານໂທລະຄົມມະນາຄົມ, ອິນເຕີເນັດ, ເຕັກໂນໂລຊີດີຈີຕອນ ແລະ ນະວັດຕະກໍາ ຂອງປະເທດເຮົາ ເພື່ອຮັບປະກັນຄວາມປອດໄພໃນການບໍລິການຜູ້ຊົມໃຊ້, ການຂະຫຍາຍການບໍລິການໃຫ້ທົ່ວເຖິງ ແລະ ຮັບປະກັນໃຫ້ແກ່ການຫັນເປັນດີຈີຕອນຂອງ ສປປ ລາວ ເພື່ອຈັດຕັ້ງຜັນຂະຫຍາຍະຕິກອງປະໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີຄັ້ງທີ IX, ແຜນພັດທະນາເສດຖະກິດດິຈິຕ໋ອນແຫ່ງຊາດ 5 ປີ (2021-2025) ກໍ່ຄືການຈັດຕັ້ງປະຕິບັດສອງວາລະແຫ່ງຊາດ ໃນການແກ້ໄຂບັນຫາເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ໃຫ້ປະກົດຜົນເປັນຈິງ. ເຫດການສຳຄັນທີພົ້ນເດັ່ນທີ່ສຸດໃນປີ 2023 ນີ້ແມ່ນ ປະທານປະເທດໄດ້ອອກລັດຖະດຳລັດ ສະບັບເລກທີ 082/ປປທ, ລົງວັນທີ 02 ມິຖຸນາ 2023 ວ່າດ້ວຍການແຕ່ງຕັ້ງຄະນະກໍາມະການລະດັບຊາດ ເພື່ອການຫັນເປັນດີຈີຕອນຂອງ ສປປ ລາວ ໂດຍມອບໃຫ້ທ່ານນາຍົກລັດຖະມົນຕີ ເປັນປະທານ, ຮອງນາຍົກລັດຖະມົນຕີ 2 ທ່ານ ເປັນຮອງປະທານ ແລະ ມອບໃຫ້ ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ ເປັນຮອງປະທານ, ຜູ້ປະຈຳການ ຄະນະດັ່ງກ່າວ ປະກອບດ້ວຍບັນດາທ່ານລັດຖະມົນຕີ ແລະ ຫົວໜ້າອົງການຈັດຕັ້ງທຽບເທົ່າ ເປັນຄະນະກຳມະການ. ນີ້ເປັນຂີດໝາຍທີ່ສຳຄັນໃນການຫັນເປັນດິຈິຕອນ ຂອງປະເທດເຮົາ ແລະ ເປັນການມອບໝາຍໜ້າທີ່ການເມືອງທີ່ສຳຄັນໃຫ້ແກ່ຂະແໜງການເຕັກໂນໂລຊີ ແລະ ການສື່ສານ;

ສະເພາະ ແຂວງອຸດົມໄຊ ໄດ້ມີການເຄື່ອນໄຫວ ແລະ ພັດທະນາຂຶ້ນຢ່າງຕັ້ງໜ້າ ຮອດປະຈຸບັນນີ້ຢູ່ແຂວງອຸດົມໄຊ ມີບໍລິສັດໃຫ້ບໍລິການດ້ານໂທລະຄົມມະນາຄົມ ແລະ ອິນເຕີເນັດ ມີ 4 ບໍລິສັດ ຄື້: ( ບໍລິສັດ ລາວໂທລະຄົມມະນາຄົມ ມະຫາຊົນ, ບໍລິສັດ ອີທີແອລ ຈໍາກັດ, ບໍລິສັດ ສະຕຣາໂທລະຄົມ ຈໍາກັດ ແລະ ບໍລິສັດ ເບດເທເລຄອມ ), ພ້ອມທັງມີບັນດາຫວົໜ່ວຍທຸລະກິດທີ່ໃຫ້ບໍລິການດ້ານ ໄອຊີທີ ຈໍານວນ 6 ບໍລິສັດຄື: ( ບໍລິສັດ ສອນເດບພັດທະນາຊ໊ອບແວ ຈໍາກັດຜູ້ດຽວ, ບໍລິສັດ ຕົງເຊີນ ການຄ້າເອເລັກໂຕນິກ ຈໍາກັດຜູ້ດຽວ, ບໍລິສັດ ໂຊກໄຊເອເລັກໂຕນິກ ຈໍາກັດ, ບໍລິສັດ ວີເຮັສ ການຄ້າຂາເຂົ້າ-ຂາອອກ ຈໍາກັດຜູ້ດຽວ, ບໍລິສັດ ເວີນບິງ ການຄ້າ ຈໍາກັດຜູ້ດຽວ ແລະ ບໍລິສັດ ຈີ້ນຫົງ ການຄ້າ ຈໍາກັດຜູ້ດຽວ; ປະຈຸບັນມີເສົາ BTS ສະສົມທັງໝົດ 305 ເສົາ, ມີສະຖານີຮັບ-ສົ່ງ ສັນຍານໂທລະສັບມືຖື ສະສົມທັງໝົດ 859 ສະຖານີ, ສົ່ງສັນຍານກວມໄດ້ 450 ບ້ານ ກວມເອົາ 96,15% ຂອງຈຳນວນບ້ານທົ່ວແຂວງ, ສາມາດຂະຫຍາຍເຄືອຂ່າຍສາຍສົ່ງດ້ວຍສາຍແກ້ວໃຍແສງ (Optic Fiber) ໃນທົ່ວແຂວງ ໄດ້ 6.336 ກິໂລແມັດ ເຊື່ອມໂຍງທຸກເມືອງ ແລະ ບ້ານຈໍານວນຫຼາຍ. ປະຈຸບັນມີຜູ້ລົງທະບຽນ ນໍາໃຊ້ໂທລະສັບຕັ້ງໂຕະແບບມີສາຍ ລວມທັງໝົດ: 702 ເລກໝາຍ, ຜູ້ນໍາໃຊ້ໂທລະສັບຕັ້ງໂຕະແບບບໍ່ມີສາຍ ລວມທັງໝົດ: 55,889 ເລກໝາຍ, ຈໍານວນຜູ້ໃຊ້ໂທລະສັບມືຖືລະບົບ 2G ແບບເຕີມເງິນ ລວມທັງໝົດ 65,787 ເລກໝາຍ ແລະ ເບີມືຖືລາຍເດືອນ ລວມທັງໝົດ 4,892 ເລກໝາຍ, ຜູ້ນໍາໃຊ້ອິນເຕີເນັດຜ່ານມືຖືລະບົບ 3G ແລະ 4G ລວມທັງໝົດ 100,664 ເລກໝາຍ ແລະ ຜູ້ລົງທະບຽນນຳໃຊ້ອິນເຕິເນັດແບບມີສາຍ ລວມທັງໝົດ: 6,805 ປະຕູ.

ໃນຊຸມປີ ຜ່ານມາ ບັນດາບໍລິສັດຜູ້ໃຫ້ບໍລິການດ້ານໂທລະຄົມມະນາຄົມ ແລະ ອິນເຕີເນັດ ສາມາດສ້າງລາຍຮັບໄດ້ທັງໝົດ 99,72 ຕື້ກ່ວາກີບ, ມອບພັນທະໃຫ້ລັດ 7,82 ຕື້ກ່ວາກີບ.

ໃນໂອກາດແຫ່ງ ວັນໂທລະຄົມສາກົນ ແລະ ສັງຄົມຂໍ້ມູນຂ່າວສານ ສາກົນ ໃນປີນີ້ ທ່ານ ສົມບູນ ມະນີ, ເລຂາຄະນະພັດກຮາກຖານ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໄດ້ຮຽກຮ້ອງມາຍັງບັນດາທ່ານ ຈົ່ງໄດ້ນຳໃຊ້ໂທລະຄົມມະນາຄົມ ແລະ ຂໍ້ມູນຂ່າວສານ, ເປັນຕົ້ນແມ່ນອິນເຕີເນັດ ແລະ ສື່ສັງຄົມອອນລາຍ ໃຫ້ມີຜົນປະໂຫຍດສູງສຸດໃນທຸກໆຂົງເຂດວຽກງານ ແລະ ທົ່ວທຸກຂະແໜງການທັງພາກລັດ ແລະ ພາກເອກະຊົນ, ມີສະຕິລະວັງຕົວສູງ, ບໍ່ເຊື່ອໃນການໂຄສະນາປັ່ນປ່ວນຕົວະຍົວະຫຼອກລວງ ຂອງພວກຄົນບໍ່ດີ, ເອົາໃຈໃສ່ຫັນການຜະລິດ ແລະ ການບໍລິການເຂົ້າສູ່ລວງເລິກ, ຍົກສູງສະມັດຕະພາບການຜະລິດ ແລະ ຄຸນນະພາບຂອງຜະລິດຕະພັນ, ຫັນເປັນທັນສະໄໝ ແລະ ນຳໃຊ້ເຕັກໂນໂລຊີດີຈີຕອນ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີຄັ້ງທີ IX, ແຜນພັດທະນາເສດຖະກິດດີຈີຕອນແຫ່ງຊາດ 5 ປີ (2021-2025) ແລະ ປະຕິບັດສອງວາລະແຫ່ງຊາດໃນການແກ້ໄຂບັນຫາເສດຖະກິດ-ການເງິນ ແລະ ບັນຫາຢາເສບຕິດໃຫ້ປະສົບຜົນສຳເລັດຢ່າງສະຫງ່າງາມ.

ຂ່າວໂດຍ: ອານົງສັກ ສັນຕິສຸກ

------------------------------------

ຕິດຕາມ ຂ່າວສານເຕັກໂນໂລຊີ ແລະ ການສື່ສານ ແຂວງອຸດົມໄຊ

Website: https://dtc-odx.gov.la

WhatsApp: https://www.whatsapp.com/channel/0029VaA5Eng3AzNMDtmE2n3N

ອານົງສັກ 6 ເດືອນຜ່ານມາ

ເນື້ອຫາທີ່ກ່ຽວຂ້ອງ:

ແຈ້ງເຫດສຸກເສີນ

ແຈ້ງການ

ວັນຊາດ 2 ທັນວາ

ຕິດຕາມເຟສບຸກເພສ