ໃນຕອນເຊົ້າຂອງ ວັນທີ 21 ພະຈິກ 2024, ທີ່ຫ້ອງປະຊຸມພະແນກເຕັກໂນໂລຊີ ແລະ ການສື່ສານ ແຂວງອຸດົມໄຊ ໄດ້ຈັດກອງປະຊຸມ ເພື່ອປຶກສາຫາລື, ປະກອບຄຳເຫັນໃສ່ (ຮ່າງ) ຂໍ້ຕົກລົງ ວ່າດ້ວຍບໍລິການລະບົບທຸລະກຳທາງເອເລັກໂຕຣນິກ ໂດຍການເປັນປະທານຂອງທ່ານ ອານົງສັກ ສັນຕິສຸກ ຮອງຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ມີຫົວໜ້າ, ຮອງຫົວໜ້າຂະແໜງ ແລະ ພະນັກງານພະແນກເຕັກໂນໂລຊີ ແລະ ການສື່ສານ ແຂວງ ເຂົ້າຮ່ວມ ຈຳນວນ 12 ທ່ານ, ຍິງ 05 ທ່ານ.
ຈຸດປະສົງ ຂອງການສ້າງຂໍ້ຕົກລົງ ວ່າດ້ວຍບໍລິການລະບົບທຸລະກຳທາງເອເລັກໂຕຣນິກ ຂອງສະກະຊວງ ເຕັກໂນໂລຊີ ແລະ ການສື່ສານ ສະບັບນີ້ ເພື່ອສ້າງເຄື່ອງມື ແລະ ນິຕິກຳ ເປັນບ່ອນອີງໃຫ້ແກ່ອົງການຄຸ້ມຄອງ ກໍຄືຂະແໜງການ ຕສ ໃນການຄຸ້ມຄອງ, ຕິດຕາມ, ກວດກາການໃຫ້ບໍລິການລະບົບທຸລະກຳທາງເອເລັກໂຕຣນິກ ລວມທັງເພື່ອເກັບກຳຂໍ້ມູນ ແລະ ຕິດຕາມກວດກາການ ໃຫ້ບໍລິການຂອງຜູ້ສະໜອງຈາກຕ່າງປະເທດທີ່ໃຫ້ບໍລິການລະບົບທຸລະກຳທາງເອເລັກໂຕຣນິກແກ່ຜູ້ຊົມໃຊ້ຢູ່ ສປປ ລາວ. ເພື່ອຊຸກຍູ້ ສົ່ງເສີມ ທຸລະກິດໃຫ້ບໍລິການລະບົບທຸລະກຳທາງເອເລັກໂຕຣນິກ ດຳເນີນຖືກຕ້ອງ, ມີຄວາມໜ້າເຊື່ອຖື, ມີຄວາມປອດໄພ ແລະ ສ້າງຄວາມໝັ້ນໃຈຕໍ່ຜູ້ຊົມໃຊ້. ເພື່ອປົກປ້ອງສິດ ແລະ ຜົນປະໂຫຍດອັນຊອບທຳຜູ້ໃຫ້ບໍລິການ ແລະ ຜູ້ໃຊ້ບໍລິການ. ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ເຮັດໃຫ້ປະເທດຊາດມີຄວາມໝັ້ນຄົງ, ສັງຄົມມີຄວາມ ສະຫງົບ, ມີຄວາມເປັນລະບຽບຮຽບຮ້ອຍ ແລະ ຍຸຕິທຳ. ຊຶ່ງ(ຮ່າງ) ຂໍ້ຕົກລົງ ປະກອບມີ 8 ໝວດ, 45 ມາດຕາ.
ພາຍຫຼັງທີ່ໄດ້ຮັບຟັງເນື້ອໃນຂອງ (ຮ່າງ) ຂໍ້ຕົກລົງ ສະບັບດັ່ງກ່າວແລ້ວ ທ່ານປະທານກອງປະຊຸມ ແລະ ຜູ້ເຂົ້າຮ່ວມກໍໄດ້ພ້ອມກັນຄົ້ນຄວ້າປະກອບຄໍາຄິດຄໍາເຫັນຢ່າງຕັ້ງໜ້າ ເພື່ອເປັນພື້ນຖານໃຫ້ແກ່ຄະນະຮັບຜິດຊອບຄົ້ນຄວ້າເນື້ອໃນ ນໍາໄປສືບຕໍ່ປັບປຸງເນື້ອໃນຮ່າງດຳລັດໃຫ້ມີເນື້ອໃນລະອຽດຄົບຖ້ວນສົມບູນທີ່ສຸດ ສາມາດຄວບຄຸມຂອບເຂດວຽກງານດັ່ງກ່າວ ເຊິ່ງໄດ້ມີການປະກອບຄໍາເຫັນທັງໝົດ 07 ທ່ານ, ລວມມີ 14 ເນື້ອໃນ.
