ກອງປະຊຸມໃຫຍ່ ສະມາຊິກພັກ ສະໄຫມທີ III ຂອງໜ່ວຍພັກ ພະແນກ ເຕັກໂນໂລຊີ ແລະ ການສື່ສານແຂວງອຸດົມໄຊ ໄດ້ຈັດຂຶ້ນໃນວັນທີ 6 ທັນວາ 2024 ນີ້ ຢູ່ທີ່ຫ້ອງປະຊຸມພະແນກ ເຕັກໂນໂລຊີ ແລະ ການສື່ສານແຂວງ ໂດຍການເປັນປະທານຂອງ ສະຫາຍ ນາງ ປິ່ນຄໍາ ອຸ່ນລະຄອນ ເລຂາຄະນະພັກຮາກຖານ, ເລຂາໜ່ວຍພັກ ພະແນກ ເຕັກໂນໂລຊີ ແລະ ການສື່ສານແຂວງ, ເປັນກຽດເຂົ້າຮ່ວມມີສະຫາຍ ນາງ ຈັນສະຫມອນ ທິບພະຫົງ ກຳມະການປະຈຳພັກແຂວງ, ປະທານກວດກາພັກລັດແຂວງ, ມີ ຄະນະໜ່ວຍພັກ, ຄະນະຮັບຜິດຊອບກະກຽມກອງປະຊຸມໃຫຍ່ຂັ້ນແຂວງ ພ້ອມດ້ວຍສະມາຊິກພັກສົມບູນເຂົ້າຮ່ວມ.
ກອງປະຊຸມ ໄດ້ຄົ້ນຄວ້າ, ປຶກສາຫາລື ແລະ ຮັບຮອງເອົາບັນຫາທີ່ສໍາຄັນ ຄື: ຮັບຮອງເອົາຜົນການຕີລາຄາການນໍາພາ-ຊີ້ນໍາ ຂອງຄະນະໜ່ວຍພັກພະແນກເຕັກໂນໂລຊີ ແລະ ການສື່ສານ ແລະ ການຈັດຕັ້ງປະຕິບັດແຜນພັດທະນາ ວຽກງານ ເຕັກໂນໂລຊີ ຂໍ້ມູນຂ່າວສານ ໃນໄລຍະ 5 ປີທີ່ຜ່ານມາ, ເຊິ່ງໄດ້ຍົກໃຫ້ເຫັນຜົນງງານດ້ານດີ ແລະດ້ານອ່ອນ-ຂໍ້ຄົງຄ້າງບາງດ້ານທີ່ຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ ອັນພົ້ນເດັ່ນແມ່ນ ພາຍໃນໜ່ວຍພັກຍັງສາມາດຮັກສາໄດ້ຄວາມສະຫງົບທາງດ້ານການເມືອງແນວຄິດ; ລະບົບກົງຈັກຂອງໜ່ວຍພັກໄດ້ຮັບການປັບປຸງ ມີຄວາມເຂັ້ມແຂງຂຶ້ນ; ການພັດທະນາວຽກງານ ເຕັກໂນໂລຊີ ຂໍ້ມູນຂ່າວສານ ເຂັ້ມແຂງຂຶ້ນຢ່າງຕໍ່ເນື່ອງ ເປັນຕົ້ນ ຂະຫຍາຍຕາງໜ່າງການບໍລິການດ້ານໂທລະຄົມມະນາຄົມບັນລຸໄດ້ຕາມແຜນ, ສົ່ງເສີມການນຳໃຊ້ດີຈີຕອນ ເຂົ້າໃນການບໍລິຫານ-ບໍລິຫານລັດ ໄດ້ກວ້າງຂວາງ, ການບໍລິການດ້ານໄປສະນີ ຂະຫຍາຍຕົວຢ່າງວ່ອງໄວ; ລະບົບ, ການນຳພາກໍ່ສ້າງພັກ ຮັບປະກັນໄດ້ທາງດ້ານຄຸນພາບດີກວ່າເກົ່າ, ພະນັກງານ ໄດ້ຮັບການບຳລຸງຍົກລະດັບທາງດ້ານທິດສະດີ ແລະ ວິຊາສະເພາະ ຢ່າງຕໍ່ເນື່ອງ ແລະ ອົງການຈັດຕັ້ງມະຫາຊົນໄດ້ຕັ້ງ ໜ້າເຄື່ອນໄຫວວຽກງານຕາມພາລະບົດບາດຂອງຕົນ ມີຜົນສໍາເລັດຕາມດັບຄາດໝາຍ.
ກອງປະຊຸມ ບັນດາສະມາຊິກພັກສົມບຸນໄດ້ໃຊ້ສິດປະຊາທິປະໄຕຂອງຕົນເລືອກຕັ້ງເອົາຄະນະພັກຊຸດໃໝ່ ເຊິ່ງມີຜູ້ສະໝັກ 05 ສະຫາຍ, ຍິງ 01 ສະຫາຍ ໃນນັ້ນເລືອກໄດ້ 03 ສະຫາຍ. ກອງປະຊຸມຄັ້ງປະຖົມມະລຶກໄດ້ເປັນເອກະສັນຢ່າງສົມບູນ ເລືອກເອົາ ສະຫາຍ ນ ປິ່ນຄຳ ອຸ່ນລະຄອນ ເປັນເລຂາເລຂາໜ່ວຍພັກ, ເລືອກເອົາ ສະຫາຍ ຕູ້ຍລີ ຕົວຢົງຈີ ເປັນຮອງເລຂາໜ່ວຍພັກ ແລະ ເລືອກເອົາ ສະຫາຍ ອານົງສັກ ສັນຕິສຸກ ເປັນກໍາມະການພັກ ພ້ອມດຽວກັນ ຍັງໄດ້ໄດ້ ເລືອກເອົາສະຫາຍ ຕູ້ຍລີ ຕົວຢົງຈີ ເປັນຜູ້ຮັບຜິດຊອບວຽກງານກວດກາພັກ.
ໂອກາດດັ່ງກ່າວ ສະຫາຍນາງ ຈັນສະຫມອນ ທິບພະຫົງ ກຳມະການປະຈຳພັກແຂວງ, ປະທານກວດກາພັກລັດແຂວງ ໄດ້ເປັນກຽດໂອ້ລົມ ເຊິ່ງສະຫາຍ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກແລະສະມາຊິກພັກຍາດມາໄດ້ໄລຍະຜ່ານມາ ຂະນະດຽວກັນສະຫາຍໄດ້ເນັ້ນໃຫ້ຄະນະພັກຊຸດໃຫມ່ຖືເອົາວຽກງານການເມືອງແນວຄິດເປັນກົກເພື່ອສຶກສາອົບຮົມໃຫ້ສະມາຊິກພັກພາຍໃນຫນ່ວຍມີແນວຄິດຫລັກຫມັ້ນ,ກຳແຫນ້ນແນວທາງນະໂຍບາຍຂອງພັກ, ມີຄວາມເປັນເອກະພາບພາຍໃນພັກ,ມີຄວາມສາມັກຄີພາຍໃນໃຫ້ຫນັກແຫນ້ນ, ເອົາໃຈໃສ່ຝຶກຜົນຫລໍ່ຫລອມຕົນເອງໃນທຸກດ້ານໃຫ້ມີຄຸນທາດການເມືອງຫນັກແຫນ້ນ, ມີຄຸນສົມບັດສິນທຳປະຕິວັດ,ຄະນະພັກຊຸດໃຫມ່ຕ້ອງໄດ້ແບ່ງຫນ້າທີ່ຄວາມຮັບຜິດຊອບໃຫ້ລະອຽດຈະແຈ້ງ, ສ້າງໃຫ້ຫນ່ວຍພັກມີຄວາມເຂັ້ມແຂງແລະຫນັກແຫນ້ນ,ຕັ້ງຫນ້າຄົ້ນຄວ້າແນວທາງນະໂຍບາຍຂອງພັກຕິດພັນກັບການຈັດຕັ້ງປະຕິບັດວຽກງານວິຊາສະເພາະໃຫ້ພົ້ນເດັ່ນຂຶ້ນກວ່າເກົ່າ
