ໃນວັນທີ 24 ມັງກອນ 2024 ນີ້, ກຳມະບານຮາກຖານພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ຈັດພິທີປາຖະກະຖາ ເລົ່າມູນເຊື້ອວັນສ້າງຕັ້ງ ສະຫະພັນກຳມະບານລາວ ຄົບຮອບ 68 ປີ (1 ກຸມພາ 1956 - 1 ກຸມພາ 2024), ເປັນກຽດປາຖະກະຖາໂດຍ ທ່ານ ອານົງສັກ ສັນຕິສຸກ ປະທານກຳມະບານຮາກຖານ, ມີທ່ານ ສົມບູນ ມະນີ ເລຂາຄະນະພັກຮາກຖານ ຫົວໜ້າພະແນກ ເຕັກໂນໂລຊີ ແລະ ການສື່ສານ ເຂົ້າຮ່ວມ, ມີບັນດາທ່ານຄະນະພະແນກ, ຫົວໜ້າ-ຮອງຫົວໜ້າຂະແໜງ ແລະ ພ້ອມດ້ວຍສະມາຊິກກຳມະບານ ເຂົ້າຮ່ວມ ຢ່າງພ້ອມພຽງ.
ທ່ານ ອານົງສັກ ສັນຕິສຸກ ໄດ້ເລົ່າຄືນມູນເຊື້ອ, ປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວ ຂອງອົງການສະຫະພັນກຳມະບານລາວ ກໍຄືມູນເຊື້ອການຕໍ່ສູ້ ຂອງຊົນຊັ້ນກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ ໂດຍຫຍໍ້ ເພື່ອເຮັດໃຫ້ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານລາວ ໄດ້ມີຄວາມຮັບຮູ້, ເຂົ້າໃຈເຖິງມູນເຊື້ອ ແລະ ຜົນງານການປະກອບສ່ວນໃນພາລະກິດປະຕິວັດ ຂອງອົງການສະຫະພັນກຳມະບານລາວ ໃນໄລຍະປະຕິວັດຊາດ ປະຊາທິປະໄຕ, ໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ, ເພື່ອສຶກສາອົບຮົມການເມືອງ-ແນວຄິດ ໃຫ້ຖັນແຖວສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ໄດ້ຮູ້ເຖິງຄວາມໝາຍ ແລະ ຄວາມສຳຄັນກ່ຽວກັບພາລະບົດບາດ, ສິດ ແລະ ໜ້າທີ່ຂອງອົງການສະຫະພັນກຳມະບານລາວ ໃນໄລຍະໃໝ່ ຂອງການປະຕິວັດ, ຊຶ່ງເປັນອົງການຕົວແທນແຫ່ງການປົກປ້ອງສິດ ແລະ ຜົນປະໂຫຍດອັນຊອບທຳຂອງຊົນຊັ້ນກຳມະກອນ ແລະ ຊາວຜູ້ອອກແຮງງານ. ພ້ອມນັ້ນ ຍັງໄດ້ເລົ່າຄືນປະຫວັດການເຄື່່ອນໄຫວຂອງສະພັນກຳມະບານແຂວງອຸດົມໄຊ, ວັນສ້າງຕັ້ງສະຫະພັນກຳມະບານແຂວງ ເລີ່ມແຕ່ ວັນທີ 11 ກັນຍາ 1979 ມາຮອດປະຈຸບັນນີ້ເປັນໄລຍະເວລາຄົບຮອບ 45 ປີ, ເຊີ່ງຢູ່ພາຍໃຕ້ການນຳພາຂອງ ພັກປະຊາຊົນປະຕິວັດລາວ ແລະ ການນຳພາ-ຊີ້ນຳຢ່າງໃກ້ຊິດຂອງສູນກາງສະຫະພັນກຳມະບານລາວ, ເວົ້າລວມເວົ້າສະເພາະກໍ່ແມ່ນຄະນະພັກຂອງແຂວງອຸດົມໄຊ ໃນແຕ່ລະໄລຍະ ແລະ ແຕ່ລະສະ ໄໝຂອງກອງປະຊຸມໃຫຍ່ຄັ້ງທີ່ I ຫາ ຄັ້ງທີ່ IX ຂອງສະຫະພັນກຳມະບານແຂວງ ແລະ ບັນດາການນຳແຕ່ລະສະໄໝ ແມ່ນໄດ້ສຸມໃສ່ວຽກງານກຳມະບານໃຫ້ເຕີບໃຫຍ່ຂະຫຍາຍຕົວເປັນກ້າວໆມາ.ໃນການປາຖະກະຖາເຜີຍແຜ່ມູນເຊື້ອ 68 ປີ ຄັ້ງນີ້, ສາມາດເຮັດໃຫ້ສະມາຊິກກຳມະບານໄດ້ຮັບຮູ້ ແລະ ເຂົ້າໃຈ ໃນການຊີ້ນຳ-ນຳພາ ຂອງພັກຕໍ່ກັບວຽກງານຈັດຕັ້ງກຳມະບານ ເຊັ່ນວ່າ: "ພັກ" ແມ່ນພັກຂອງຊົນຊັ້ນກຳມະກອນລາວ ຖືເອົາລັດທິມາກ-ເລນິນ ເປັນລະບົບແນວຄິດທິດສະດີຊີ້ນຳ-ນຳພາ, ໂດຍຖືເອົາມະຫາຊົນເປັນບໍ່ເກີດ, ເປັນບ່ອນອີງ ແລະ ເປັນກຳລັງແຮງຂອງພັກ ແລະ ຮັບຮູ້ການເຄື່ອນໄຫວວຽກງານກຳມະບານແຕ່ລະໄລຍະ ແລະ ບັນດາຜົນສຳເລັດທີ່ສາມາດຍາດມາໄດ້ແຕ່ລະສະໄໝ ແລະບັນຫາທີ່ຄົງຄ້າງເພື່ອສືບຕໍ່ແກ້ໄຂບັນດາວຽກຕ່າງໆ ໃຫ້ດີຂື້ນເທື່ອລະກ້າວ.
ອານົງສັກ
9 ເດືອນຜ່ານມາ
