ວັນທີ 15 ກຸມພາ 2024 ພະແນກ ເຕັກໂນໂລຊີ ແລະ ການສື່ສານ ສົມທົບກັບ ຫ້ອງການເມືອງໄຊ ຈັດຝຶກອົບຮົມສຳມະນາ ການນຳໃຊ້ລະບົບກອງປະຊຸມທາງໄກ ໃຫ້ຫ້ອງວ່າການເມືອງໄຊ, ຊຶ່ງຝຶກອົບຮົມໃນຄັ້ງນີ້ໄດ້ຈັດຂື້ນທີ່ຫ້ອງປະຊຸມ ຂອງຫ້ອງວ່າການເມືອງໄຊ ໃຊ້ເວລາ 1 ມື້ເຕັມ, ໂດຍການເປັນປະທານຂອງ ທ່ານ ສົມສັກ ແສງໃບມະນີ ວ່າການຫົວຫນ້າຫ້ອງວ່າການເມືອງໄຊ, ມີນັກສໍາມະນາກອນຈາກຫ້ອງວ່າການເມືອງໄຊ ເຂົ້າຮ່ວມທັງໝົດ 06 ທ່ານ, ຍິງ 01 ທ່ານ.
ຈຸດປະສົງຂອງການຝຶກອົບຮົມຄັ້ງນີ້ແມ່ນເພື່ອຝຶກການນຳໃຊ້ “ລະບົບກອງປະຊຸມທາງໄກ (Video conference)” ເພື່ອເຮັດໃຫ້ພະນັກງານຜູ້ທີ່ຮັບຜິດຊອບຂອງຫ້ອງວ່າການເມືອງໄຊ ໄດ້ຮຽນຮູ້, ເຂົ້າໃຈ ແລະ ສາມາດນຳໃຊ້ລະບົບເຂົ້າໃນວຽກງານຕົວຈິງໄດ້ ທັງເປັນການຍົກສູງປະສິດຕິພາບຂອງການປະຕິບັດວຽກງານຂອງຫ້ອງວ່າການເມືອງໄຊ ໂດຍການນໍາໃຊ້ລະບົບເຕັກໂນໂລຊີດິຈິຕ໋ອນ ເຂົ້າໃນການຄຸ້ມຄອງບໍລິຫານຫ້ອງການແບບທັນສະໄໝ ເພື່ອເຮັດໃຫ້ການປະຕິບັດວຽກງານມີຄວາມວ່ອງໄວທັນໃຈ, ສະດວກສະບາຍ ແລະ ປະຢັດງົບປະມານ.
ໃນການຝຶກອົບຮົມຄັ້ງນີ້ ຜູ້ເຂົ້າຮ່ວມໄດ້ຮຽນຮູ້ຮູບແບບການຈັດຫ້ອງປະຊຸມ, ການຕິດຕັ້ງອຸປະກອນ, ການສ້າງຫ້ອງປະຊຸມ, ແບ່ງປັນລີ້ງ (Share link) ຫ້ອງປະຊຸມ, ການເຂົ້າຮ່ວມກອງປະຊຸມ, ການນຳສະເໜີຜ່ານລະບົບກອງປະຊຸມ ແລະ ບັນທືກກອງປະຊຸມດ້ວຍລະບົບຂອງກອງປະຊຸມທາງໄກ (True conf) ເຊີ່ງໄດ້ລົງມືປະຕິບັດຕົວຈິງ ພ້ອມທັງແລກປ່ຽນຄຳຄິດເຫັນໃນການໃຊ້ລະບົບດັ່ງກ່າວອີກດ້ວຍ.
