ຕອນເຊົ້າວັນທີ 13 ມີນາ 2024, ທີ່ຫ້ອງປະຊຸມພະແນກເຕັກໂນໂລຊີ ແລະ ການສື່ສານແຂວງອຸດົມໄຊໄດ້ຈັດພິທີປາຖະກະຖາ ວັນໄປສະນີແຫ່ງຊາດ ແລະ ວັນໂທລະຄົມມະນາຄົມ ແຫ່ງຊາດ ຄົບຮອບ 59 ປີ(13 ມີນາ 1965-13 ມີນາ 2024) ຢ່າງເປັນຂະບວນຟົດຟື້ນ, ພາຍໃຕ້ຄໍາຂວັນ: “ພັດທະນາລະຫັດໄປສະນີເປັນທັນສະໄໝ, ສ້າງແຜນທີ່ດີຈີຕ໋ອນ, ປັບຄຸນນະພາບການບໍລິການໂທລະຄົມມະນາຄົມ ເພື່ອຮອງຮັບການຫັນເປັນດີຈີຕ໋ອນໃນທົ່ວປະເທດ”.
ການຈັດພິທີປາຖະກະຖາ ວັນໄປສະນີແຫ່ງຊາດ ແລະ ວັນໂທລະຄົມມະນາຄົມ ແຫ່ງຊາດ ເພື່ອເປັນການປູກຈິດສຳນຶກ ແລະ ຄວາມຮັບຮູ້ໃຫ້ແກ່ພະນັກງານ-ລັດຖະກອນ ພາຍໃນພະແນກ ຕສ, ເປັນຕົ້ນ ພະນັກງານຂອງບັນດາບໍລິສັດໄປສະນີ, ໂທລະຄົມມະນາຄົມ ໃຫ້ເຂົ້າໃຈຢ່າງເລິກເຊິ່ງ ເຖິງບົດບາດ ແລະ ຄວາມສຳຄັນຂອງວຽກງານໄປສະນີ, ໂທລະຄົມມະນາຄົມ ຕໍ່ການພັດທະນາ ເສດຖະກິດ-ສັງຄົມ. ພ້ອມນັ້ນ, ກໍເພື່ອພັດທະນາ ວຽກງານໄປສະນີ, ໂທລະຄົມມະນາຄົມ ໃຫ້ຊຸກຍູ້ສົ່ງເສີມການຄ້າອອນລາຍ, ການຜະລິດອຸດສາຫະກຳໃນຍຸກດີຈິຕອນ ແລະ ການຖ່າຍທອດເຕັກໂນໂລຊີດີຈິຕອນ ທີ່ກ້າວໜ້າຂອງໂລກເຂົ້າມາປະເທດເຮົາ ປະກອບສ່ວນການ ຈັດຕັ້ງຜັນຂະຫຍາຍ ແຜນພັດທະນາເສດ ຖະກິດດີຈິຕອນຂອງປະເທດເຮົາ ເພື່ອຫັນການຜະລິດ ແລະ ການບໍລິການເຂົ້າສູ່ລວງເລິກ, ຍົກສູງສະມັດຕະພາບການຜະລິດ ແລະ ຄຸນນະພາບຂອງຜະລິດຕະພັນ, ຫັນເປັນທັນສະໄໝ ແລະ ນຳໃຊ້ເຕັກໂນໂລຊີດີຈິຕອນ ນັບມື້ນັບຫລາຍຂື້ນ. ການປາຖະກະຖາຄັ້ງນີ້ ພະແນກເຕັກໂນໂລຊີ ແລະ ການສື່ສານ ກໍໄດ້ນໍາເອົາກົດໝາຍວ່າດ້ວຍໄປສະນີ ແລະ ກົດໝາຍວ່າດວ້ຍໂທລະຄົມມະນາຄົມ ມາເຜີຍແຜ່ໃຫ້ພະນັກງານ-ລັດຖະກອນ ພາຍໃນພະແນກ ຕສ ແລະ ພະນັກງານຂອງບັນດາບໍລິສັດ ໄດ້ຮັບຮູ້ເພີ່ມຕື່ມອີກ.
ການຈັດພິທີປາຖະກະຖາຄັ້ງນີ້ມີ ທ່ານ ສົມບູນ ມະນີ ຫົວໜ້າພະແນກເຕັກໂນໂລຊີ ແລະ ການສື່ສານແຂວງ, ມີຄະນະພະແນກ ຕສ, ຫົວໜ້າ,ຮອງຫົວໜ້າອໍານວຍການຂອງບັນດາບໍລິສັດ ໄປສະນີ, ໂທລະຄົມມະນາຄົມ, ມີພະນັກງານ-ລັດຖະກອນ ພາຍໃນພະແນກ ຕສ ແລະ ພະນັກງານຂອງບັນດາບໍລິສັດ ເຂົ້າຮ່ວມ.
ຫຼັງຈາກສໍາເລັດພິທີປາຖະກະຖາ ກໍໄດ້ມີການສ້າງຂະບວນການແຂ່ງຂັນກິລາ ເປຕັງ ຊິ່ງຂັນ ຫົວໜ້າພະແນກເຕັກໂນໂລຊີ ແລະ ການສື່ສານແຂວງ ອຸດົມໄຊ ຢ່າງເປັນຂະບວນການຟົດຟື້ນ.
ຂຽນຂ່າວໂດຍ: ທ່ານ ຈູ ເຊັງ
