ໃນຕອນເຊົ້າຂອງວັນທີ 24 ກຸມພາ 2024 ນີ້, ທີ່ຫ້ອງປະຊຸມພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ໄດ້ຈັດພິທີເລື່ອນສະມາຊິກພັກສຳຮອງເປັນສະມາຊິກພັກສົມບູນ ໃຫ້ກຽດເປັນປະທານໂດຍ ສະຫາຍ ສົມບູນ ມະນີ ເລຂາຄະນະພັກຮາກຖານ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ມີຄະນະພັກ, ບັນດາສະມາຊິກພັກສົມບູນ ແລະ ສຳຮອງ ເຂົ້າຮ່ວມ.
ໃນພິທີຄັ້ງນີ້, ຄະນະໜ່ວຍພັກ ໄດ້ຂຶ້ນຜ່ານມະຕິຕົກລົງ ວ່າດ້ວຍ ການອະນຸມັດເລື່ອນສະມາຊິກພັກສຳຮອງເປັນສະມາຊິກພັກສົມບູນ ສະບັບເລກທີ 116/ຄປພຂ, ລົງວັນທີ 07 ກຸມພາ 2024. ເຫັນດີເລື່ອນ ສະຫາຍ ນາງ ພູທອນ ວົງສັກ ເຂົ້່າພັກສຳຮອງ ວັນທີ 19 ທັນວາ 2022 ເປັນສະມາຊິກພັກສົມບູນ. ຊຶ່ງຜູ້ກ່ຽວໄດ້ຜ່ານຂະບວນການຕິດຕາມກໍ່ສ້າງຕາມລະບຽບຂອງພັກວາງອອກ ແລະ ມີຄວາມຫ້າວຫັນບຸກບືນຝຶກຝົນຫຼໍ່ຫຼອມຕົນເອງ ຈົນໄດ້ຮັບຄວາມໄວ້ເນື້ອເຊື່ອໃຈຈາກການຈັດຕັ້ງ ກໍຄືຈາກສະມາຊິກພັກ ເປັນຢ່າງດີ.
ໂອກາດດຽວກັນນີ້, ສະຫາຍ ສົມບູນ ມະນີ ເລຂາຄະນະພັກຮາກຖານ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ກໍໄດ້ໃຫ້ກຽດຂື້ນມອບມະຕິຕົກລົງ ວ່າດ້ວຍ ການອະນຸມັດເລື່ອນສະມາຊິກພັກສຳຮອງເປັນສະມາຊິກພັກສົມບູນ ສະບັບເລກທີ 116/ຄປພຂ, ລົງວັນທີ 07 ກຸມພາ 2024 ໃຫ້ຜູ່ກ່ຽວ ພ້ອມທັງໂອ້ລົມ ແລະ ກ່າວສະແດງຄວາມຍິນດີ, ຍ້ອງຍໍຊົມເຊີຍຜູ້ທີ່ໄດ້ເລື່ອນເປັນສະມາຊິກພັກສົມບູນໃໝ່. ພ້ອມນີ້, ສະຫາຍໄດ້ເນັ້ນໜັກໃຫ້ສະມາຊິກພັກສົມບູນໃໝ່ ເອົາໃຈໃສ່ຝຶກຝົນຫຼໍ່ຫຼອມຕົນເອງ ທາງດ້ານຄວາມຮູ້, ຄວາມສາມາດ ແລະ ທາງດ້ານອົງການຈັດຕັ້ງ ພ້ອມທັງສືບຕໍ່ຈັດຕັ້ງປະຕິບັດບັນດາກົດລະບຽບ ແລະ ນິຕິກໍາຕ່າງໆ ຂອງພັກປະຊາຊົນປະຕິວັດລາວ ສະໄໝທີ XI ວາງອອກຢ່າງເຂັ້ມງວດ, ໃຫ້ມີຄວາມກະຕືລືລົ້ນ, ຫ້າວຫັນ, ເຮັດແທ້ທໍາຈິງ ປະຕິບັດໜ້າທີ່ວຽກງານ ທີ່ຕົນຮັບຜິດຊອບຢ່າງມີແບບແຜນ ແລະ ແຍກອອກໃຫ້ເປັນແຜນອັນລະອຽດ. ໂດຍສະເພາະແມ່ນ ຈົ່ງຍົກສູງຄວາມຮັບຜິດຊອບໜ້າທີ່ການເມືອງ ທີ່ພັກ ແລະ ການຈັດຕັ້ງ ໄດ້ມອບໝາຍໃຫ້, ເປັນແບບຢ່າງນຳໜ້າໃນທຸກຂະບວນການ, ຕັ້ງໜ້າຝຶກຝົນຫຼໍ່ຫຼ້ອມຕົນເອງໃຫ້ກາຍເປັນສະມາຊິກພັກທີ່ມີຄຸນທາດການເມືອງ, ມີຄຸນສົມບັດສິນທໍາປະຕິວັດທີ່ໜັກແໜ້ນ, ຍົກລະດັບຄວາມຮູ້, ຄວາມສາມາດທາງດ້ານວິຊາສະເພາະ, ທິດສະດີການເມືອງ ເພື່ອສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ໂດຍສະເພາະກໍແມ່ນຈັດຕັ້ງຜັນຂະຫຍາຍວຽກງານເຕັກໂນໂລຊີ ແລະ ການສື່ສານ ໃຫ້ມີຄວາມກ້າວໜ້າສູງຂື້ນເລື້ອຍໆ ປະກອບສ່ວນໃນການສ້າງສາພັດທະນາປະເທດຊາດ.
ແກ່ນຈັນ
8 ເດືອນຜ່ານມາ
