Digital Marketing ແມ່ນຫຍັງ?
ນັກການຕະຫຼາດຫຼາຍອົງກອນ ໄດ້ກຳນົດຂອບເຂດ (scope) ຄວາມໝາຍຂອງແມ່ນແຕກຕ່າງກັນອອກໄປ ໂດຍຄວາມໝາຍທີ່ເຮົາອາດໄດ້ຍິນກັນເລື້ອຍໆ ຄື ມັກບອກວ່າມັນເປັນການສື່ສານການຕະຫຼາດຜ່ານສື່ດິຈິຕອ໋ນ ເຊັ່ນ: ການລົງໂຄສະນາໃນ social platform / search engine ຕ່າງໆ ເຊັ່ນ: Facebook, YouTube, TiKTok, Google ເປັນຕົ້ນ ຊຶ່ງຖ້າຈະໃຫ້ສະຫຼູບງ່າຍໆ Digital Marketing ກໍຄື “ການທີ່ເຮົານຳເອົາເຕັກໂນໂລຊີ ຫຼື ເຄື່ອງມືດິຈິຕອ໋ນ ເຂົ້າມາຊ່ວຍໃນການກໍ່ການຕະຫຼາດນັ້ນເອງ” ແທ້ໆແລ້ວພາບລວມມັນກວ້າງພໍໆ ກັບການກໍ່ການຕະຫຼາດແບບເດີມ (Traditional) ພຽງແຕ່ເຮົາເຮັດໃນສະພາບແວດລ້ອມທີ່ປ່ຽນແປງໄປ ໂດຍຈຸດມຸ້ງໝາຍໃນການກໍ່ການຕະຫຼາດກໍບໍ່ຕ່າງຈາກເດີມ ນັ້ນກໍຄື ເພື່ອຕອບສະໜອງຄວາມຕ້ອງການຂອງຜູ້ບໍລິໂພກໃຫ້ດີທີ່ສຸດ ໂດຍມຸ້ງຫວັງຜົນຮັບທີ່ເປັນຍອດຂາຍ ຫຼື ກຳໄລຂອງທຸລະກິດ ຊຶ່ງສິ່ງທີ່ເປັນຂໍ້ດີຫຼາຍໆ ຂອງການກໍ່ການຕະຫຼາດໃນຍຸກດິຈິຕອ໋ນ ຄືທຸລະກິດມີເຄື່ອງມືດີໆ ທີ່ເຂົ້າມາຊ່ວຍປັບປຸງປະສິດທິພາບໃນການກໍ່ການຕະຫຼາດໃຫ້ດີຍິ່ງຂຶ້ນ ແຕ່ໃນຂະນະດຽວກັນທຸລະກິດກໍຕ້ອງກະກຽມຄວາມພ້ອມໜັກໜ່ວງຂຶ້ນຢ່າງຫຼີກລ້ຽງບໍ່ໄດ້ ທັງນີ້ກໍເພື່ອທີ່ຈະເຂົ້າໃຈເຖິງສະພາບແວດລ້ອມໃນການເຊື່ອມຕໍ່ກັບຜູ້ບໍລິໂພກທີ່ແຕກຕ່າງໄປຈາກເດີມ ຊຶ່ງປະເດັນສຳຄັນທີ່ຢາກຈະອະທິບາຍໃຫ້ທຸກຄົນເຂົ້າໃຈກໍຄືການເຮັດ Digital Marketing ບໍ່ຈຳເປັນຕ້ອງເກີດຂຶ້ນເທິງໂລກອອນໄລນ໌ (Online) ສະເໝີໄປ ທຸລະກິດສາມາດໃຊ້ປະໂຫຍດຈາກເຕັກໂນໂລຊີໃນການກໍ່ການຕະຫຼາດແບບ offline ໄດ້ນຳອີກ ຫຼືໃຊ້ເປັນການປະສົມປະສານທັງສອງຊ່ອງທາງເຂົ້ານຳກັນ ຊຶ່ງໃນບົດຄວາມນີ້ຈະຂໍອະທິບາຍພາບລວມຂອງ Digital Marketing ຜ່ານຕົວແບບ (Model) ທາງການຕະຫຼາດທີ່ເຮົາຄຸ້ນເຄີຍກັນດີ ນັ້ນກໍຄື Marketing Mix ຫຼື 4P ນັ້ນເອງ ພວກເຮົາມາເບິ່ງກັນວ່າ ເຕັກໂນໂລຊີ ຫຼື ເຄື່ອງມືດິຈິຕອ໋ນ ຈະເສີມປະສິດທິພາບໃຫ້ 4P ເສີມພະລັງຂຶ້ນໄດ້ຢ່າງໃດ ມີດັ່ງນີ້:
P ໂຕທຳອິດ ຄື ສິນຄ້າ ແລະ ບໍລິການທີ່ທ່ານຈະຂາຍໃຫ້ກັບຜູ້ບໍລິໂພກ
ຍຸກນີ້ເຕັກໂນໂລຊີເຂົ້າມາມີບົດບາດຢ່າງຫຼວງຫຼາຍ ໃນການຊ່ວຍໃຫ້ທຸລະກິດປັບປຸງສິນຄ້າ ແລະ ບໍລິການ ໃຫ້ຕອບໂຈດຄວາມຕ້ອງການຂອງຜູ້ບໍລິໂພກໄດ້ຖືກຈຸດຫຼາຍຍິ່ງຂຶ້ນ ເຊັ່ນ: ກ່ອນທີ່ທຸລະກິດຈະປ່ອຍສິນຄ້າເຂົ້າສູ່ຕະຫຼາດ ເຕັກໂນໂລຊີຊ່ວຍໃຫ້ທ່ານຮູ້ເຖິງຄວາມຕ້ອງການທີ່ແທ້ຈິງຂອງລູກຄ້າໃນແບບທີ່ບໍ່ເຄຍຮູ້ມາກ່ອນ ຜ່ານການເກັບຂໍ້ມູນ ສົ່ງຜົນໃຫ້ທ່ານສາມາດຜະລິດສິນຄ້າທີ່ເປັນທີ່ຕ້ອງການຂອງຕະຫຼາດ ແລະ ເພີ່ມໂອກາດທີ່ສິນຄ້າຈະປະສົບຄວາມສຳເລັດໃນຕະຫຼາດໄດ້
ເຕັກໂນໂລຊີຊ່ວຍໃຫ້ທ່ານສາມາດສ້າງສິນຄ້າທີ່ທັນສະໄໝ ເຊັ່ນ: ຈຳພວກສິນຄ້າດ້ານ IT, IoT ຕ່າງໆ ຫຼືແມ່ນແຕ່ການເພີ່ມຄຸນຄ່າຂອງສິນຄ້າ ແລະ ບໍລິການ ທີ່ທ່ານມີຢູ່ໃຫ້ສອດຄ້ອງກັບພຶດຕິກຳຂອງຜູ້ບໍລິໂພກຫຼາຍຂຶ້ນ ເຊັ່ນ: ການເພີ່ມຊ່ອງທາງໃຫ້ລູກຄ້າເຂົ້າເຖິງບໍລິການໄດ້ສະດວກຍິ່ງຂຶ້ນ.
ນອກຈາກນີ້ ໃນຍຸກດິຈິຕອ໋ນ ທີ່ຄົນມັກຊື້ສິນຄ້າ ແລະ ບໍລິການ ຜ່ານຊ່ອງທາງອອນໄລນ໌ ຊຶ່ງບໍ່ໄດ້ເຫັນ ແລະຈັບຕ້ອງສິນຄ້າແທ້ໆ ເຕັກໂນໂລຊີຢັງສາມາດຊ່ວຍໃຫ້ການນຳສະເໜີສິນຄ້າລັກສະນະນີ້ມີຄວາມສົມບູນຫຼາຍຂຶ້ນ ດ້ວຍການສະແດງໃຫ້ເຫັນພາບຜ່ານຮູບແບບ format ໃນການນຳສະເໜີທີ່ຫຼາກຫຼາຍ ເຊັ່ນ: ພາບນິ່ງ / VDO / LIVE / Augmented Reality(AR) ແລະ ອື່ນໆ ພ້ອມນັ້ນເຕັກໂນໂລຊີ ຍັງເປີດໂອກາດໃຫ້ລູກຄ້າສາມາດເຂົ້າເຖິງຂໍ້ມູນຄວາມຄິດເຫັນຈາກລູກຄ້າຄົນອື່ນໆ ເພື່ອປະກອບການຕັດສິນໃຈໄດ້ອີກດ້ວຍ.
2. Price
P ໂຕທີ່ສອງ ຄື ລາຄາຂອງສິນຄ້າ ຫຼື ບໍລິການ ຫຼືແມ່ນຫຍັງກໍຕາມທີ່ລູກຄ້າຕ້ອງແລກປ່ຽນເພື່ອໃຫ້ໄດ້ມາຊຶ່ງສິນຄ້າ ຫຼື ບໍລິການຂອງທ່ານ
ດັ່ງທີ່ໄດ້ນຳສະເໜີໃນຕອນຕົ້ນແລ້ວວ່າ ເຕັກໂນໂລຊີຊ່ວຍໃຫ້ເຈົ້າເຂົ້າເຖິງຂໍ້ມູນຂອງຜູ້ບໍລິໂພກໄດ້ຢ່າງມະຫາສານ ຊຶ່ງແນ່ນອນວ່າມັນເປີດໂອກາດໃຫ້ທ່ານສາມາດຕັ້ງລາຄາໃຫ້ເໝາະກັບຜູ້ບໍລິໂພກແຕ່ລະຄົນໄດ້ ຍົກຕົວຢ່າງເຊັ່ນ: ຖ້າທ່ານສາມາດ track ການເຂົ້າຊົມ website ຂອງລູກຄ້າໄດ້ວ່າ ເຂົາເຈົ້າເຂົ້າຊົມສິນຄ້າໂຕໃດ ທ່ານກໍສາມາດສົ່ງລາຄາໂປຣໂມຊັ່ນຂອງສິນຄ້ານັ້ນໄປໃຫ້ລູກຄ້າໄດ້ ເປັນຕົ້ນ.
ນອກຈາກນີ້ ຍຸກນີ້ຍັງເປັນຍຸກທີ່ການສ້າງ “ຄຸນຄ່າ” ເປັນສິ່ງສຳຄັນຫຼາຍ ເພາະເຕັກໂນໂລຊີເຮັດໃຫ້ຜູ້ບໍລິໂພກເຂົ້າເຖິງຂໍ້ມູນໄດ້ຢ່າງອິດສະຫຼະ ແລະ ສາມາດເລືອກແບຣນດ໌ ທີ່ພວກເຂົາຕ້ອງການໄດ້ຕາມໃຈ ແບຣນດ໌ທີ່ຂາຍຖືກກວ່າ ບໍ່ໄດ້ເປັນຜູ້ຊະນະສະເໝີໄປ ແຕ່ເປັນແບຣນດ໌ທີ່ສາມາດສ້າງຄຸນຄ່າໃຫ້ແກ່ຜູ້ບໍລິໂພກໄດ້ຫຼາຍກວ່າຕ່າງຫາກທີ່ເປັນຜູ້ຊະນະ
ເພາະສະນັ້ນການທີ່ແບຣນດ໌ໃຊ້ຂໍ້ມູນທີ່ມີໃນກຳມືໃຫ້ເປັນປະໂຫຍດໃນການສ້າງປະສົບການໄດ້ຖືກໃຈຜູ້ບໍລິໂພກ ກໍຈະຊ່ວຍໃຫ້ແບຣນດ໌ມີອຳນາດໃນການຕັ້ງລາຄາໄດ້ຫຼາຍຂຶ້ນຕາມໄປນຳ ເພາະສະໄໝນີ້ຜູ້ບໍລິໂພກມັກເບີ່ງເຖິງຄຸນຄ່າທີ່ແບຣນດ໌ສົ່ງມອບໃຫ້ເຂົາເຈົ້າຫຼາຍກວ່າທີ່ຈະມານັ່ງຄິດວ່າມັນຖືກ ຫຼື ແພງ ເມື່ອໃດທີ່ມັນຄຸ້ມຄ່າ ເຂົາເຈົ້າກໍຍີນດີຈະຈ່າຍ.
3. Promotion
P ໂຕທີ່ 3 ຄື ການສື່ສານທາງການຕະຫຼາດ ຫຼື ການເຮັດໃຫ້ຜູ້ບໍລິໂພກຮູ້ຈັກສິນຄ້າ ຫຼື ບໍລິການຂອງເຮົາ ລວມເຖິງໂນ້ມນ້າວໃຫ້ເຂົາເຈົ້າມາຊື້ສິນຄ້າຂອງເຮົາ ເຊັ່ນ: ການໂຄສະນາ, ປະຊາສຳພັນ, ການສົ່ງເສີມການຂາຍຕ່າງໆ.
ເຕັກໂນໂລຊີເຮັດໃຫ້ P ໂຕນີ້ປ່ຽນແປງໄປຢ່າງຫຼາຍ ລອງສຳນຶກພາບເບິ່ງວ່າ ຈາກແຕ່ກ່ອນ ແບຣນດ໌ຈະໂຄສະນາຫຍັງແຕ່ບ່ອນ ກໍມີທາງເລືອກໃນການໃຊ້ສື່ຍັງຈຳກັດຢູ່ ເຊັ່ນ: ໜັງສືພິມ, ວາລະສານ, ວິທະຍຸ, ໂທລະພາບ ເປັນຕົ້ນ ຊຶ່ງເຈົ້າຂອງແບຣນດ໌ ເກືອບວ່າຈະບໍ່ຮູ້ເລີຍວ່າ ໃຜເປັນຜູ້ຮັບຂ່າວສານກັນແທ້ ກົງກັບກູ່ມຄົົນທີ່ແບຣນດ໌ຕ້ອງການຫຼືບໍ່ ແຖມການວັດຜົນຂອງໂຄສະນາກໍຄ່ອນຂ້າງລຳບາກ ແຖມຍັງແບຣນດ໌ຕ້ອງໃຊ້ງົບໃນການໂຄສະນາຄ່ອນຂ້າງສູງຫຼາຍ ຈົນທີ່ວ່າສິນຄ້າ/ບໍລິການ ຈະເປັນທີ່ຮູ້ຈັກ ແຕ່ທຸກມື້ນີ້.
ເຕັກໂນໂລຊີເອື້ອປະໂຫຍດຕໍ່ການສື່ສານການຕະຫຼາດຫຼວງຫຼາຍ ໂດຍສະເພາະກັບທຸລະກິດລາຍຍ່ອຍ ທຸລະກິດມີທາງເລືອກໃນການສື່ສານກັບກູ່ມເປົ້າໝາຍເພີ່ມຂຶ້ນຫຼາຍກວ່າແຕ່ກ່ອນຫຼາຍ ໃນຕົ້ນທືນທີ່ຕ່ຳກວ່າຫຼາຍອີກດ້ວຍ ເຊັ່ນ: ການສື່ສານຜ່ານ Social media, Search marketing , Email marketing, Content marketing, Website ແລະ ອື່ນໆ.
4. Place
ນອກຈາກທຸລະກິດຄວນມີຊ່ອງທາງໃນການເຂົ້າເຖິງທີ່ຫຼາກຫຼາຍແລ້ວ ທຸລະກິດຈະຕ້ອງເຊື່ອມໂຍງແຕ່ລະຊ່ອງທາງໃຫ້ເບິ່ງແຍງລູກຄ້າໄດ້ຢ່າງສອດຄ້ອງກັນນຳອີກ ເຊັ່ນ: ຊ່ອງທາງ A, B ແລະ C ຄວນຈະມີຖານຂໍ້ມູນຂອງລູກຄ້າຊຸດດຽວກັນ ເວລາສື່ສານ ຫຼື ຕິດຕໍ່ກັບລູກຄ້າ ຈະໄດ້ໄປໃນທິດທາງດຽວກັນ.
ສັງລວມຫຍໍ້ແລ້ວ ຄວາມແຕກຕ່າງທີ່ສັງເກດເຫັນໄດ້ຈາກການເຮັດການຕະຫຼາດໃນຍຸກສະໄໝກ່ອນ ກັບຍຸກດິຈິຕອ໋ນ ຄື: ແຕ່ກ່ອນ P ແຕ່ລະໂຕ ຈະຂ້ອນຂ້າງແຍກອອກຈາກກັນເປັນເອກະເທດ ແຕ່ໃນຍຸກນີ້ P ແຕ່ລະຕົວ ມີຄວາມທັບຊ້ອນກັນຢູ່ ເຊັ່ນ: ສື່ທີ່ໃຊ້ໃນການໂປຣໂມດ ກໍມັກເປັນຕົວດຽວກັນກັບຊ່ອງທາງການຂາຍດ້ວຍ ການປັບປຸງສິນຄ້າ/ບໍລິການໃຫ້ຕອບໂຈດລູກຄ້າ ບາງເທື່ອກໍໄປຊ້ອນທັບກັບການເພີ່ມຊ່ອງທາງການຈັດຈຳໜ່າຍ ເປັນຕົ້ນ. ແຕ່ສຸດທ້າຍບໍ່ວ່າສະໄໝໃດ ການເຮັດການຕະຫຼາດກໍຍັງມີຫົວໃຈສຳຄັນດຽວກັນ ຄື: ການພະຍາຍາມ mix ຕົວ P ເຫຼົ່ານີ້ ໃຫ້ສາມາດສ້າງປະສົບການທີ່ກົມກືນທີ່ສຸດໃຫ້ແກ່ລູກຄ້າໃຫ້ໄດ້.
ຮຽບຮຽງໂດຍ: ອານົງສັກ ສັນຕິສຸກ
ແຫຼ່ງທີ່ມາ:
- http://taradthai88.blogspot.com/2019/03/digital-marketing_28.html
- https://www.prosofterp.com/en/Article/Detail/156740
