ກອງປະຊຸມ ເຜີຍແຜ່ ນິຕິກໍາ ກ່ຽວກັບການຄຸ້ມຄອງ ວຽກງານໄປສະນີ ໄດ້ຈັດຂຶ້ນໃນຕອນເຊົ້າວັນທີ 4 ພະຈິກ ນີ້ ທີ່ຫ້ອງປະຊຸມ ພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໂດຍການເປັນປະທານຮ່ວມຂອງ ທ່ານ ນາງ ປິ່ນຄຳ ອຸ່ນລະຄອນ ຫົວຫນ້າພະແນກ ເຕັກໂນໂລຊີ ແລະ ການສື່ນສານແຂວງ ແລະ ທ່ານ ປະສິດ ສີສົມບູນ ຮອງຫົວຫນ້າກົມໄປສະນີ ກະຊວງເຕັກໂນໂລຊີ ແລະ ການສື່ສານ, ມີວິຊາການຈາກກົມໄປສະນີ, ພະແນກເຕັກໂນໂລຊີ ແລະ ການສື່ສານແຂວງ ຕະຫລອດຮອດ ບໍລິສັດ ຜູ້ປະກອບການດ້ານໄປສະນີ ພາຍໃນແຂວງ ເຂົ້າຮ່ວມ.
ການເຜີຍແຜ່ ນິຕິກຳ ໃນຄັ້ງນີ້ ກໍເພື່ອເປັນການຈັດຕັ້ງຜັນຂະຫຍາຍ ເນື້ອໃນ ບັນດານິຕິກໍາຕ່າງໆ ທີ່ກ່ຽວຂ້ອງກັບການຄຸ້ມຄອງ ວຽກງານໄປສະນີ ໃຫ້ເຂົ້າສູ່ລວງເລິກ ແລະ ກວ້າງຂວາງຂຶ້ນກວ່າເກົ່າ ແລະ ເປັນການທົບທວນຄືນ ບັນດາເນື້ອໃນດັ່ງກ່າວໃຫ້ແກ່ຂະແຫນງການທີ່ຮັບຜິດຊອບ ໃນການຄຸ້ມຄູອງ, ຕິດຕາມ, ຊຸກຍູ້ວຽກງານໄປສະນີ ຢູ່ແຂວງອຸດົມໄຊ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ພ້ອມທັງ ສາມາດນຳໄປຈັດຕັ້ງປະຕິບັດ ເຂົ້າໃນການເຄື່ອນໄຫວວຽກງານຕົວຈິງ ໄດ້ຢ່າງມີປະສິດທິພາບ,ປະສິດທິຜົນ ແລະ ຖືກຕ້ອງຕາມລະບຽບການທີ່ກຳນົດໄວ້. ແນໃສ່ເຮັດໃຫ້ວຽກງານໄປສະນີ ຢູ່ໃນຂອບເຂດທົ່ວປະເທດ ເວົ້າລວມ, ເວົ້າສະເພາະ ຢູ່ພາຍໃນແຂວງອຸດົມໄຊ ໄດ້ຮັບການປັບ,ພັດທະນາ ແລະ ຍົກລະດັບການບໍລິການໃຫ້ມີຄວາມສະດວກ,ສະບາຍ,ວ່ອງໄວ,ທັນສະໄຫມ,ປອດໄພ ແລະ ຮັບປະກັນ ໃນການປະກອບສ່ວນເຂົ້າໃນການຕ້ານ ແລະ ສະກັດກັນການຂົນສົ່ງສິນຄ້າເກືອດຫ້າມ ແລະ ສິ່ງຂອງທີ່ຜິດກົດຫມາຍ ຜ່ານຊ່ອງທາງໄປສະນີ.
ເນື້ອໃນນິຕິກໍາທີ່ນໍາມາເຜີຍແຜ່ ປະກອບມີ: ການອະນຸຍາດໃນການດໍາເນີນທຸລະກິດ ກ່ຽວກັບການບໍລິການດ້ານໄປສະນີ, ມາດຕະຖານການບໍລິການຂອງຂະແຫນງໄປສະນີ ແລະ ການສ້າງບົດລາຍງານສະພາບການພັດທະນາຂອງຂະແຫນງການໄປສະນີ. ໂອກາດດັ່ງກ່າວ ຍັງໄດ້ມີການ ປະກອບຄໍາຄິດ ຄໍາເຫັນ ພ້ອມທັງ ແລກປ່ຽນບົດຮຽນ ເຊິ່ງກັນ ແລະ ກັນ ຕື່ມອີກ.
