ໃນຕອນເຊົ້າຂອງວັນທີ 22 ຕຸລາ 2024 ນີ້, ທີ່ຫ້ອງປະຊຸມພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ໄດ້ຈັດພິທີເລື່ອນສະມາຊິກພັກສຳຮອງເປັນສະມາຊິກພັກສົມບູນ, ໃຫ້ກຽດເປັນປະທານໂດຍ ສະຫາຍ ນາງ ປິ່ນຄຳ ອຸ່ນລະຄອນ ເລຂາຄະນະພັກຮາກຖານ, ເລຂາໜ່ວຍພັກ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ມີຄະນະພັກ ແລະ ບັນດາສະມາຊິກພັກສົມບູນ ເຂົ້າຮ່ວມ.
ໃນພິທີຄັ້ງນີ້, ຄະນະໜ່ວຍພັກ ໄດ້ຂຶ້ນຜ່ານມະຕິຕົກລົງ ວ່າດ້ວຍ ການອະນຸມັດເລື່ອນສະມາຊິກພັກສຳຮອງເປັນສະມາຊິກພັກສົມບູນ ສະບັບເລກທີ 1051/ຄປພຂ, ລົງວັນທີ 26 ກັນຍາ 2024 ເຫັນດີເລື່ອນ ສະຫາຍ ແກ່ນຈັນ ຫລໍ່ບຸນທຳ ເຂົ້່າພັກສຳຮອງ ວັນທີ 29 ສິງຫາ 2023 ເປັນສະມາຊິກພັກສົມບູນ. ຊຶ່ງຜູ້ກ່ຽວໄດ້ຜ່ານຂະບວນການຕິດຕາມກໍ່ສ້າງຕາມລະບຽບຂອງພັກວາງອອກ ແລະ ມີຄວາມຫ້າວຫັນບຸກບືນຝຶກຝົນຫຼໍ່ຫຼອມຕົນເອງ ຈົນໄດ້ຮັບຄວາມໄວ້ເນື້ອເຊື່ອໃຈຈາກການຈັດຕັ້ງ ກໍຄືຈາກສະມາຊິກພັກ ເປັນຢ່າງດີ.
ໂອກາດດຽວກັນນີ້, ສະຫາຍ ນາງ ປິ່ນຄຳ ອຸ່ນລະຄອນ ເລຂາຄະນະພັກຮາກຖານ, ເລຂາໜ່ວຍພັກ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ກໍໄດ້ໃຫ້ກຽດຂື້ນມອບມະຕິຕົກລົງ ວ່າດ້ວຍ ການອະນຸມັດເລື່ອນສະມາຊິກພັກສຳຮອງເປັນສະມາຊິກພັກສົມບູນ ສະບັບເລກທີ 1051/ຄປພຂ, ລົງວັນທີ 26 ກັນຍາ 2024 ໃຫ້ຜູ່ກ່ຽວ ພ້ອມທັງໂອ້ລົມ ແລະ ກ່າວສະແດງຄວາມຍິນດີ, ຍ້ອງຍໍຊົມເຊີຍຜູ້ທີ່ໄດ້ເລື່ອນເປັນສະມາຊິກພັກສົມບູນໃໝ່. ພ້ອມນີ້, ສະຫາຍໄດ້ເນັ້ນໜັກໃຫ້ສະມາຊິກພັກສົມບູນໃໝ່ ເອົາໃຈໃສ່ຝຶກຝົນຫຼໍ່ຫຼອມຕົນເອງ ທາງດ້ານຄວາມຮູ້, ຄວາມສາມາດ ແລະ ທາງດ້ານອົງການຈັດຕັ້ງ ພ້ອມທັງສືບຕໍ່ຈັດຕັ້ງປະຕິບັດບັນດາກົດລະບຽບ ແລະ ນິຕິກໍາຕ່າງໆ ຂອງພັກປະຊາຊົນປະຕິວັດລາວ ສະໄໝທີ XI ວາງອອກຢ່າງເຂັ້ມງວດ, ໃຫ້ມີຄວາມກະຕືລືລົ້ນ, ຫ້າວຫັນ, ເຮັດແທ້ທໍາຈິງ ປະຕິບັດໜ້າທີ່ວຽກງານ ທີ່ຕົນຮັບຜິດຊອບຢ່າງມີແບບແຜນ ແລະ ແຍກອອກໃຫ້ເປັນແຜນອັນລະອຽດ. ໂດຍສະເພາະແມ່ນ ຍົກສູງຄວາມຮັບຜິດຊອບໜ້າທີ່ການເມືອງ ທີ່ພັກ ແລະ ການຈັດຕັ້ງ ໄດ້ມອບໝາຍໃຫ້, ເປັນແບບຢ່າງນຳໜ້າໃນທຸກຂະບວນການ, ຕັ້ງໜ້າຝຶກຝົນຫຼໍ່ຫຼ້ອມຕົນເອງໃຫ້ກາຍເປັນສະມາຊິກພັກທີ່ມີຄຸນທາດການເມືອງ, ມີຄຸນສົມບັດສິນທໍາປະຕິວັດທີ່ໜັກແໜ້ນ, ຍົກລະດັບຄວາມຮູ້, ຄວາມສາມາດທາງດ້ານວິຊາສະເພາະ, ທິດສະດີການເມືອງ ເພື່ອສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ໂດຍສະເພາະກໍແມ່ນຈັດຕັ້ງຜັນຂະຫຍາຍວຽກງານເຕັກໂນໂລຊີ ແລະ ການສື່ສານ ໃຫ້ມີຄວາມກ້າວໜ້າສູງຂື້ນເລື້ອຍໆ ປະກອບສ່ວນໃນການສ້າງສາພັດທະນາປະເທດຊາດ.
