ກອງປະຊຸມປຶກສາຫາລື ກ່ຽວກັບການຈັດຕັ້ງປະຕິບັດ ໂຄງການທົດລອງຂຸດຄົ້ນຊັບສິນດິຈິຕ໊ອນ ຢູ່ ສປປ ລາວ ທີ່ແຂວງອຸດົມໄຊ ໄດ້ຈັດຂື້ນໃນວັນທີ 11 ຕຸລາ 2024 ນີ້ ທີ່ຫ້ອງປະຊຸມ ພະແນກເຕັກໂນໂລຊີ ແລະ ການສື່ສານ ໂດຍການເປັນປະທານຮ່ວມຂອງ ທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕ໊ອນ, ກະຊວງເຕັກໂນໂລຊີ ແລະ ການສື່ສານ, ຮອງຫົວໜ້າຄະນະຄຸ້ມຄອງໂຄງການທົດລອງທຸລະກຳຂຸດຄົ້ນຊັບສິນດິຕ້ອນ ຢູ່ ສປປ ລາວ ແລະ ທ່ານ ນາງ ປິ່ນຄໍາ ອຸ່ນລະຄອນ ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ມີແຂກເຊີນຈາກພະແນກການທີ່ກ່ຽວຂ້ອງ, ຫ້ອງວ່າການແຂວງ, ລັດວິສາຫະກິດໄຟຟ້າລາວ, ນັກທຸລະກິດ ແລະ ພະນັກງານຈາກກົມ ແລະ ພາຍໃນພະແນກ ເຕັກໂນໂລຊີ ແລະ ການສື່ສານ ເຂົ້າຮ່ວມ.
ຈຸດປະສົງ ເພື່ອເຜີຍແຜ່ສ້າງຄວາມເຂົ້າໃຈກ່ຽວກັບວຽກງານການຂຸດຄົ້ນທຸລະກຳຊັບສິນດິຈິຕ໊ອນ ແລະ ນໍາສະເໜີກ່ຽວກັບການຈັດຕັ້ງປະຕິບັດ ໂຄງການທົດລອງທຸລະກໍາຊັບສິນດີຈິຕ້ອນຢູ່ ສປປ ລາວ ໄລຍະຜ່ານມາ ໃຫ້ແກ່ພາກສ່ວນກ່ຽວຂ້ອງໃນຂັ້ນທ້ອງຖິ່ນ ໂດຍສະເພາະບັນດາແຂວງ ຈຸດທີ່ຕັ້ງຂອງໂຄງການທົດລອງ ທັງເປັນການປຶກສາຫາລືຮ່ວມກັບທ້ອງຖິ່ນ ກ່ຽວກັບການຈັດຕັ້ງປະຕິບັດໂຄງການ, ຄວາມຮັບຜິດຊອບຂອງທ້ອງຖິ່ນໃນການຄຸ້ມຄອງວຽກຊັບສິນດິຈິຕ້ອນ, ກົນໄກການປະສານງານ ລະຫວ່າງ ສູນກາງ, ທ້ອງຖິ່ນ, ພະແນກການ, ລວມທັງການ ຕິດຕາມ ກວດກາ ການລັກລອບຂຸດຄົ້ນຊັບສິນດີຈິຕ້ອນ. ພ້ອມນີ້ ກໍ່ໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານຂອງ ພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ທີ່ໄດ້ປະກອບສ່ວນວຽກງານດີຈິຕ໊ອນເຂົ້າໃນວຽກງານສຳຄັນຂອງແຂວງໃນໄລຍະຜ່ານມາ.
ໂອກາດນີ້ ທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕ໊ອນ ໄດ້ມີຄວາມຄິດເຫັນ ເຊີ່ງທ່ານໄດ້ຍົກໃຫ້ເຫັນຄວາມສໍາກ່ຽວກັບການຂຸດຄົ້ນຊັບສິນດິຈິຕ໊ອນ ຢູ່ ສປປລາວ ໂດຍສະເພາະທີ່ແຂວງອຸດົມໄຊ, ເຊີ່ງມັນຈະສ້າງທ່າແຮງໃນການພັດທະນາ ເສດຖະກິດ-ສັງຄົມຂອງແຂວງ ກໍ່ຄື ຂອງຊາດ ແລະ ກອງປະຊຸມ ໄດ້ລົງເລິກກ່ຽວກັບວຽກງານການຂຸດຄົ້ນ ເງິນກິບໂຕ ແລະ ວຽກງານການແລກປ່ຽນ ເງິນກິບໂຕ ເຊີ່ງມັນເປັນວຽກໃຫມ່ສຳລັບ ສປປ ລາວ ແລະ ປະເທດລາວ ແມ່ນໄດ້ດຳເນີນມາແລ້ວ 2 ປີ ມີ 7 ບໍລິສັດ ສຳລັບແຂວງອຸດົມໄຊ ແມ່ນຢູ່ໃນໄລຍະກະກຽມ ສ້າງຄວາມເຂົ້າໃຈ ໃຫ້ກັບພາກສ່ວນຕ່າງໆໄດ້ຮັບຮູ້. ຊື່ງໂຄງການນີ້ ສາມາດສ້າງລາຍຮັບໃໝ່ທີ່ເປັນເງິນຕາໃຫ້ແກ່ລັດຖະບານ ໃນການຈັດຕັ້ງຜັນຂະຫຍາຍ 2 ວາລະແຫ່ງຊາດ ການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ທັງເປັນການຈັດຕັ້ງປະຕິດບັດແຜນພັດທະນາເສດຖະກິດດິຈິຕ໊ອນ ແຫ່ງຊາດ. ພ້ອມນີ້ ເພື່ອປຶກສາຫາລືຮ່ວມກັບທ້ອງຖິ່ນ ກ່ຽວກັບການຈັດຕັ້ງປະຕິບັດ ໂຄງການທົດລອງທຸລະກຳຊັບສິນດິຈິຕ໊ອນ ຢູ່ ສປປ ລາວ ໃນຕໍ່ໜ້າ ຕື່ມອີກ.
