ໃນຕອນເຊົ້າຂອງວັນທີ 16 ຕຸລາ 2024 ນີ້ ຄະນະຊາວໜຸ່ມ ໜ່ວຍຮາກຖານ ພະແນກແຜນການ ແລະ ການລົງທຶນ ແຂວງ ໄດ້ເຊີນ ພະແນກເຕັກໂນໂລຊີ ແລະ ການສື່ສານ ແຂວງ ເຂົ້າຮ່ວມເປັນ ວິທະຍາກອນໃນການ ຝຶກອົບຮົມການຫັ້ນເປັນດິຈີຕອນ ສ້າງຄວາມເຂັ້ມແຂງໃຫ້ແກ່ສະມາຊິກຊາວໜຸ່ມ ຢູ່ທີ່ຫ້ອງປະຊຸມຂອງ ພະແນກແຜນການ ແລະ ການລົງທຶນ ແຂວງ ໂດຍການເປັນປະທານຂອງ ສະຫາຍ ຄຳຈັນ ລາວຈືເບັງ ຄະນະໜ່ວຍພັກ ພະແນກແຜນການ ແລະ ການລົງທຶນ, ຄະນະປະຈຳ, ຄະນະບໍລິຫານງານຊາວໜຸ່ມແຂວງ, ມີບັນດາສະຫາຍເລຂາ, ຮອງເລຂາ ຄະນະໜ່ວຍຮາກຖານ ພ້ອມດ້ວຍສະຫາຍສະມາຊິກຊາວໜຸ່ມ ຈາກພະແນກແຜນການ ແລະ ການລົງທຶນ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ພະແນກໂຍທາທິການ ແລະ ຂົນສົ່ງ, ພະແນກການຕ່າງປະເທດ, ພະແນກພາຍໃນ ແລະ ຄະນະຊາວໜຸ່ມແຂວງ ແລະ ບໍລິສັດ SornDev ພັດທະນາຊ໋ອບແວ ມີເຂົ້າຮ່ວມທັງໝົດ 30 ສະຫາຍ, ຍິງ 12 ສະຫາຍ.
ໃນພິທີຝຶກອົບຮົມ ສະຫາຍ ຄຳຈັນ ລາວຈືເບັງ ຄະນະໜ່ວຍພັກພະແນກ ແຜນການ ແລະ ການລົງທຶນ, ຄະນະປະຈຳ, ຄະນະບໍລິຫານງານຊາວໜຸ່ມແຂວງ ໄດ້ມີຄຳເຫັນຊີ້ນຳ ແລະ ເປີດພິທີຢ່າງເປັນທາງການ ຫຼັງຈາກນັ້ນ ສະຫາຍ ຈັນມະນີ ຈັນຕະເງິນ ເລຂາຄະນະຊາວໜຸ່ມ ໜ່ວຍຮາກຖານ ພະແນກແຜນການ ແລະ ການລົງທຶນ ກໍ່ໄດ້ນຳສະເໜີຜົນງານການນຳພາ-ຊີ້ນຳວຽກງານຊາວໜຸ່ມຂອງພະແນກ ໂດຍຫຍໍ້ ແລະ ມີການແລກປ່ຽນການເຄື່ອນໄຫວວຽກງານຊາວໜຸ່ມໃນຫຼາຍດ້ານ ຂອງແຕ່ລະພາກສ່ວນ ທີ່ໄດ້ຮັບເຊີນເຂົ້າຮ່ວມ ຢ່າງຊາງສັນ; ຫຼັງຈາກນັ້ນແມ່ນໄດ້ຮັບຟັງການບັນຍາຍ ຂອງ ສະຫາຍ ອານົງສັກ ສັນຕິສຸກ ນັກວິທະຍາກອນ ຈາກ ພະແນກເຕັກໂນໂລຊີ ແລະ ການສື່ສານ ແຂວງ ເຊິ່ງໄດ້ນຳສະເໜີ ຄວາມຮູ້ພື້ນຖານ ກ່ຽວກັບການຫັນເປັນດິຈິຕອນ ຂອງໂລກ, ຂອງ ສປປ ລາວ ແລະ ຂອງແຂວງອຸດົມໄຊ; ເຊິ່ງແຂວງອຸດົມໄຊ ກໍ່ແມ່ນແຂວງໜຶ່ງ ທີ່ພວມຊຸ່ມໃສ່ຫັນເປັນດິຈິຕອນ ຢ່າງຕັ້ງໜ້າ ແລະ ພົ້ນເດັ່ນໃນສັງຄົມ. ເຊິ່ງການຝຶກອົບຮົມໃນຄັ້ງນີ້ ກໍ່ແມ່ນບາດກ້າວໜຶ່ງ ໃນການສ້າງຄວາມເຂັ້ມແຂງ ຫັນເປັນທັນສະໄໝ ແລະ ນຳໃຊ້ລະບົບດິຈິຕອນ ໃຫ້ເກີດຜົນປະໂຫຍດກວ້າງຂວາງໃນສັງຄົມຫຼາຍຂຶ້ນ, ຮັບປະກັນປະສິດທິພາບ ແລະ ມີຄວາມວ່ອງໄວ ທັນສະໄໝ. ນອກຈາກນັ້ນ ນັກສຳມະນາກອນ ທີ່ເຂົ້າຮ່ວມກໍ່ໄດ້ແລກປ່ຽນຄຳຄິດເຫັນກ່ຽວກັບການຫັນເປັນດິຈິຕອນ ໃນແຕ່ລະຂົງເຂດ.
ໃນຕອນທ້າຍ ສະຫາຍ ຄຳຈັນ ລາວຈືເບັງ ຄະນະໜ່ວຍພັກພະແນກແຜນການ ແລະ ການລົງທຶນ, ຄະນະປະຈຳ, ຄະນະບໍລິຫານງານຊາວໜຸ່ມແຂວງ ກໍ່ໄດ້ກ່າວຕື່ມວ່າ ຜ່ານຂະບວນການຝຶກອົບຮົມການຫັນເປັນດີຈິຕອນ ໃນຄັ້ງນີ້ ໄດ້ຍົກເອົາບົດຮຽນຫຼາຍດ້ານ ອັນດີ ເປັນສິ່ງເອື້ອອຳນວຍຕໍ່ການພັດທະນາວຽກງານໃນການຈັດຕັ້ງ ແລະ ການພັດທະນາເສດຖະກິດສັງຄົມ ແລະ ເນັ້ນໜັກໃຫ້ບັນດາສະຫາຍສະມາຊິກຊາວໜຸ່ມ ຈົ່ງເພີ່ມທະວີຫັນເຂົ້າສູ່ລະບົບດິຈິຕອນທັນສະໄໝ ໂດຍເລີ່ມຈາກພະນັກງານສະມາຊິກຊາວໜຸ່ມ ຢູ່ບັນດາສຳນັກງານ, ຫ້ອງການໃຫ້ຫຼາຍຂຶ້ນເລື້ອຍໆ.
