ບັ້ນດຳເນີນຊີວິດການເມືອງ ສຳລັບ ພະນັກງານນຳພາ-ຄຸ້ມຄອງ ພັກຜ່ອນກ່ອນມື້ຮັບອຸດໜູນບຳນານ ຂອງຄະນະພັກຮາກຖານ ພະແນກເຕັກໂນໂລຊີ ແລະ ການສື່ສານ ແຂວງອຸດົມໄຊ ໄດ້ຈັດຂຶ້ນໃນຕອນເຊົ້າຂອງວັນທີ 30 ກັນຍາ 2024 ທີ່ຫ້ອງປະຊຸມ ພະແນກ ເຕັກໂນໂລຊີ ແລະ ການສື່ສານ ເປັນກຽດເຂົ້າຮ່ວມໂດຍ ສະຫາຍ ຄຳພຽງ ຢາຈົງວາ ຮອງເລຂາພັກແຂວງ ຜູ້ຊີ້ນຳວຽກພັກ-ພະນັກງານ, ສະຫາຍ ສົມບູນ ມະນີ ເລຂາຄະນະພັກຮາກຖານ ພະແນກເຕັກໂນໂລຊີ ແລະ ການສື່ສານ, ມີຄະນະພັກຮາກຖານ, ຄະນະໜ່ວຍພັກທີ່ຂື່ນກັບຄະນະພັກຮາກຖານ, ສະມາຊິກພັກ ແລະ ແຂກເຊີນ ເຂົ້າຮ່ວມ.
ສະຫາຍ ສົມບູນ ມະນີ ເລຂາຄະນະພັກຮາກຖານ ພະແນກເຕັກໂນໂລຊີ ແລະ ການສື່ສານ ໄດ້ຜ່ານໃບສໍາຫຼວດການຊີ້ນໍາ-ນໍາພາຂອງຕົນເອງ ຕະຫຼອດໄລຍະທີ່ຜ່ານມາ ໂດຍສະເພາະແມ່ນການເຄື່ອນໄຫວຢ່າງຕັ້ງໜ້າຕໍ່ການນຳພາ-ຊີ້ນຳ ຂອງຄະນະພັກ, ສະມາຊິກພັກຢ່າງຕໍ່ເນື່ອງເປັນປະຈໍາ ການສຶກສາອົບຮົມການເມືອງ-ແນວຄິດ ໃຫ້ພະນັກງານ,ສະມາຊິກພັກ, ການເພີ່ມທະວີການຈັດຕັ້ງເຜີຍແຜ່, ຄົ້ນຄວ້າເຊື່ອມຊຶມແນວທາງ, ແຜນນະໂຍບາຍ, ຂໍ້ກຳນົດ, ກົດລະບຽບ ທີ່ພັກ ແລະ ລັດ ວາງອອກ ເປັນຕົ້ນແມ່ນ ມະຕິ ກອງປະຊຸມໃຫຍ່ ຄັ້ງທີ XI ຂອງພັກ. ມະຕິ ກອງປະຊຸມໃຫຍ່ຂອງຄະນະພັກຮາກຖານ, ຈັດຕັ້ງຟັງປາຖະກະຖາ ຫຼື ເຜີຍແຜ່ເອກະສານ ໃຫ້ສະມາຊິກພັກມີແນວຄິດການເມືອງໜັກແໜ້ນ, ເຊື່ອໝັ້ນຕໍ່ການນໍາພາຂອງພັກ, ເຄື່ອນໄຫວປະຕິບັດໜ້າທີ່ວຽກງານວິຊາສະເພາະຕາມພາລະບົດບາດ, ສິດ ແລະ ໜ້າທີ່ຂອງຕົນ, ກໍາແໜ້ນສະພາບການຫຍໍ້ທໍ້ທີ່ເກີດຂື້ນຢູ່ໃນສັງຄົມ, ເຊີດຊູບົດບາດການນໍາພາເດັດຂາດ, ໂດຍກົງ, ຮອບດ້ານຂອງພັກໃນທຸກຂົງເຂດວຽກງານ, ອອກແຮງປັບປຸງກໍ່ສ້າງພັກ-ພະນັກງານຢູ່ໃນໜ່ວຍໃຫ້ມີຄວາມເຂັ້ມແຂງ ປອດໃສ ໜັກແໜ້ນ, ເອົາໃຈໃສ່ຫັນເອົາກໍາລັງລົງປັບປຸງກໍ່ສ້າງຮາກຖານການເມືອງ, ສ້າງໃຫ້ສະມາຊິກພາຍໃນໜ່ວຍມີຄວາມໜັກແໜ້ນ, ເຂັ້ມແຂງ ແລະ ຮອບດ້ານ. ເອົາໃຈໃສ່ເພີ່ມທະວີປັບປຸງກໍ່ສ້າງພະນັກງານ-ສະມາຊິກພັກໃຫ້ເຂັ້ມແຂງຮອບດ້ານ ໂດຍຖືເອົາການສຶກສາອົບຮົມ ກໍ່ສ້າງທາງດ້ານການເມືອງເປັນກົກ, ສ້າງຄວາມສາມາດທາງດ້ານວິຊາສະເພາະ ວິຊາການເປັນພື້ນຖານ ໂດຍສະເພາະຂົງເຂດວຽກງານເຕັກໂນໂລຊີ ແລະ ການສື່ສານ, ສ້າງລະບຽບວິໃນແບບແຜນການນໍາພາບັນຊາເປັນປັດໃຈຕັດສິນ. ແລະ ພ້ອມທັງ ຕີລາຄາຈຸດອອ່ນ-ຂໍ້ຄົງ ແລະ ວິທີແກ້ໄຂ. ຈາກນັ້ນ ຄະນະໄດ້ປະກອບຄຳເຫັນ ສົ່ງເສີມດ້ານດີ, ຜົນງານ ກໍ່ສ້າງດ້ານອ່ອນຂໍ້ຄົງຄ້າງຕາມແນວທາງຂອງພັກ ຕື່ມອີກ.
ໂອກາດນີ້ ສະຫາຍ ຄໍາພຽງ ຢ່າຈົງວ່າ ຮອງເລຂາພັກເເຂວງ ຜູ້ຊີ້ນຳວຽກພັກ-ພະນັງງານ ກໍ່ໄດ້ມີຄຳເຫັນໂອ້ລົມຕໍ່ກອງປະຊຸມ ສະຫາຍໄດ້ຍ້ອງຍໍຊົມເຊີຍຄະນະພັກຮາກຖານພະແນກ ຕສ ໂດຍສະເພາະແມ່ນຕໍ່ ສະຫາຍ ສົມບູນ ມະນີ ເລຂາຄະນະພັກຮາກຖານ ທີ່ຈະພັກຜ່ອນກ່ອນມື້ຮັບອຸດໜູນບຳນານ ຜ່ານມາທີ່ເຮັດສໍາເລັດຕາມໜ້າທີ່ ການມອບໝາຍຂອງພັກ ແຜນພັດທະນາເສດຖະກິດ-ສັງຄົມຂອງລັດ ໃນແຕ່ລະໄລຍະ ແລະ ທ່ານໄດ້ຍົກໃຫ້ເຫັນ ເຖິງຄວາມຈຳເປັນພາວະວິໄສ ໃນການພັກຜ່ອນກ່ອນມື້ຮັບອຸດໜູນບຳນານຂອງພະນັກງານນຳພາ-ຄູ້ມຄອງໃນຄັ້ງນີ້ ໂດຍອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ຂອງພັກ; ພ້ອມທັງໄດ້ຮຽກຮ້ອງໃຫ້ຄະນະພັກຮາກຖານພະແນກເຕັກໂນໂລຊີ ແລະ ການສື່ສານ ຕ້ອງມີວິໃສທັດໃນການເບິ່ງບັນຫາ ເພີ່ມທະວີຄວາມສາມັກຄີເປັນເອກະພາບ ໃນການນຳພາໝູ່ຄະນະ ເສີມຂະຫຍາຍຈຸດດີ, ແກ້ໄຂຈຸດອ່ອນ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ປັບປຸງແບບແຜນນຳພາ, ແບບແຜນດຳລົງຊີວິດ, ເປັນແບບຢ່າງແກ່ມະຫາຊົນ ສ້າງໄດ້ຄວາມເຊື່ອໝັ້ນ ແລະ ເສີມຂະຫຍາຍມູນເຊື້ອທີ່ດີຂອງເມືອງ ເພື່ອນຳພາ ແລະ ປຸກລະດົມກຳລັງແຮງຂອງສັງຄົມ ພ້ອມກັນສ້າງສາພັດທະນາວຽກງານເຕັກໂນໂລຊີ ແລະ ການສື່ສານ ຢູ່ແຂວງອຸດົມໄຊ ໃຫ້ຈະເລີນກ່າວໜ້າຂຶ້ນເລື້ອຍໆ.
ຂ່າວ: ອານົງສັກ ສັນຕິສຸກ
