ຝຶກອົບຮົມ ການນຳໃຊ້ລະບົບຕິດຕາມຈຸດທີ່ຕັ້ງເສົາວສັນຍານໂທລະສັບມືຖື (BTS) ຂອງພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ ຈັດຂື້ນໃນວັນທີ 7 ມິຖຸນາ 2024 ທີ່ຫ້ອງປະຊຸມພະແນກ ຕຂ ແຂວງອຸດົມໄຊ ເປັນປະທານໂດຍ ທ່ານ ນ ປິ່ນຄຳ ອຸ່ນລະຄອນ ຮອງຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ມີພະນັກງານ-ລັດຖະກອນ ພາຍໃນພະແນກ ຕສ ແຂວງເຂົ້າຮ່ວມຢ່າງພ້ອມພຽງ.
ລະບົບຕິດຕາມຈຸດທີ່ຕັ້ງເສົາສັນຍານໂທລະສັບມືຖື (BTS) ແມ່ນຄົ້ນຄວ້າ, ພັດທະນາຂື້ນໂດຍ ຂະແໜງເຕັກໂນໂລຊີ ແລະ ນະວັດຕະກຳ ພະແນກ ຕສ ແຂວງອຸດົມໄຊ. ລະບົບໂປຣແກຣມດັ່ງກ່າວນີ້ຈຸດປະສົງຂອງການພັດທະນາຂື້ນມາຊົມໃຊ້ກໍເພື່ອພັດທະນາເຄື່ອງມື (ລະບົບ) ໃນການຄຸ້ມຄອງ, ຕິດຕາມ, ກວດກາ ແລະ ຊຸກຍູ້ ບັນດາບໍລິສັດ ກ່ຽວກັບການຕິດຕັ້ງ, ຂະຫຍ່າຍ ແລະ ພັດທະນາ ພື້ນຖານໂຄງລ່າງ, ເປັນລະບົບຂໍ້ມູນແບບລວມສູນ ທີ່ສາມາດເປັນຂໍ້ມູນພື້ນຖານເພື່ອວາງແຜນຂະຫຍາຍ ຫຼື ພັດທະນາ ໂຄງລ່າງພື້ນຖານໃນຕໍ່ ໜ້າ ແລະ ພ້ອມທັງເປັນການຊຸກຍູ້ການເຂົ້າເຖິງອິນເຕີເນັດ ແລະ ການຫັນເປັນດິຈິຕອນ ຢູ່ແຂວງອຸດົມໄຊ.
ສະນັ້ນ ໃນການຈັດຝຶກອົບຮົມການນຳໃຊ້ລະບົບດັ່ງກ່າວໃນຄັ້ງນີ້ ຈຸດປະສົງກໍເພື່ອເຜີຍແຜ່ໃຫ້ພະນັກງານພາຍໃນພະແນກ ຕສ ແຂວງ ໄດ້ເຂົ້າໃຈ ແລະ ລົງເລິກໃຫ້ພະນັກງານຮັບຜິດຊອບຄຸ້ມຄອງລະບົບ ໃຫ້ສາມາດຊົມໃຊ້ເຂົ້າໃນວຽກງານຕົວຈິງ ປະຕິບັດວຽກງານຢ່າງມີປະສິດທິຜົນສູງ. ຝຶກອົບຮົມດັ່ງກ່າວ ຈະດຳເນີນໄປເປັນເວລາ 1 ວັນເຕັມ
ຈຶ່ງສຳເລັດ.
ຂ່າວໂດຍ: ອານົງສັກ ສັນຕິສຸກ
------------------------------------
ຕິດຕາມ ຂ່າວສານເຕັກໂນໂລຊີ ແລະ ການສື່ສານ ແຂວງອຸດົມໄຊ
Website: https://dtc-odx.gov.la
WhatsApp: https://www.whatsapp.com/channel/0029VaA5Eng3AzNMDtmE2n3N
Telegram: https://t.me/dtcodx
