ການຫັນເປັນທັນສະໄໝ ແມ່ນການນຳໃຊ້ ບັນດາແນວຄິດ ທີ່ມີຄຸນຄ່າ ແລະ ບັນດາຜົນສຳເລັດ ທາງດ້ານເຕັກນິກ ວິທະຍາສາດ ຂອງມວນມະນຸດ ເພື່ອມານຳໃຊ້ໃຫ້ສອດຄ່ອງກັບສະພາບຄວາມເປັນຈິງ ຂອງຍຸກສະໄໝ, ເພື່ອຍົກສູງ ສະມັດຕະພາບຂອງວຽກງານ, ສ້າງຄວາມສະເໝີພາບ ທາງດ້ານເສດຖະກິດ-ສັງຄົມ ແລະ ຍົກສູງຄຸນນະພາບຊີວິດຂອງປະຊາຊົນໃຫ້ດີຂຶ້ນເທື່ອລະກ້າວ.
ພັກ ແລະ ລັດຖະບານ ໄດ້ເຫັນຄວາມສຳຄັນ ໃນວຽກງານການຫັນເປັນທັນສະໄໝ ໂດຍສະເພາະການຫັນເປັນລັດຖະບານດີຈີຕອນ ຂອງ ສປປ ລາວ ໂດຍການສ້າງເງື່ອນໄຂຕ່າງໆ ເພື່ອຮອງຮັບ ແລະ ສະໜັບສະໜູນວຽກງານດັ່ງກ່າວ ໃຫ້ທັນກັບສະພາບການປ່ຽນແປງ ຢ່າງກ້າວກະໂດດ ໃນພາກພື້ນ ແລະ ສາກົນ ເພື່ອກຽມຄວາມພ້ອມ ດ້ານພື້ນຖານໂຄງລ່າງທີ່ສຳຄັນ ແລະ ຈຳເປັນ ໃນການກ້າວເຂົ້າສູ່ ການຫັນເປັນລັດຖະບານດີຈີຕອນ (Digital Government), ເສດຖະກິດດີຈີຕອນ (Digital Economy), ສັງຄົມດີຈີຕອນ (Digital Society), ການຫັນປ່ຽນ ໃນຍຸກອຸດສາຫະກຳ 4.0 ແລະ ຮອງຮັບກັບສະພາບການປ່ຽນແປງໃໝ່ ທາງດ້ານເຕັກໂນໂລຊີດີຈີຕອນໃນອານາຄົດ.
ການຫັນເປັນທັນສະໄໝລະບົບບໍລິຫານ ແລະ ບໍລິການຂອງພາກລັດ ແມ່ນມີຄວາມຈຳເປັນ, ຮີບດ່ວນ ແລະ ພາວະວິໃສ ໃນເງື່ອນໄຂ ການເຊື່ອມໂຍງ, ເຊື່ອມຈອດ ແລະ ການແຂ່ງຂັນສູງ ໃນພາກພື້ນ ແລະ ສາກົນ ເພື່ອເຮັດໃຫ້ ການຄຸ້ມຄອງລັດ ກ້າວໄປສູ່ລະບົບດີຈີຕອນ ໃນການບໍລິການ, ການບໍລິຫານຈັດການ, ການລວມສູນຂໍ້ມູນພາກລັດ ເພື່ອຍົກລະດັບປະສິທິພາບ ແລະ ປະສິດທິຜົນ ການບໍລິຫານ, ການບໍລິການ ແລະ ການຄຸ້ມຄອງລັດ ໃຫ້ມີຄວາມສະດວກ, ວອ່ງໄວ, ປະຢັດ, ປອດໄພ ໂດຍສະເພາະ ໃນຊ່ວງພະຍາດໂຄວິດ-19 ກຳລັງລະບາດນີ້ ການຫັນມານຳໃຊ້ ລະບົບເຕັກໂນໂລຊີ ດີຈີຕອນ ຫຼື ໄອຊີທີ ເຂົ້າໃນການບໍລິຫານ ແລະ ບໍລິການຂອງລັດ ແມ່ນມີຄວາມຈຳເປັນ ແລະ ສຳຄັນເປັນຢ່າງຍິ່ງ ຊຶ່ງຈະເປັນທ່າແຮງ ໃນການຂັບເຄື່ອນດ້ານເສດຖະກິດ-ສັງຄົມ ໃນສະພາບການດຳລົງຊີວິດ ປົກກະຕິແບບໃໝ່ ແລະ ວິຖີຊີວິດປົກກະຕິ ຖັດໄປຫຼັງໂຄວິດ-19 (Next Normal).
ຍ້ອນເຫດຜົນ ທີ່ກ່າວມາຂ້າງເທິງນັ້ນ, ເຫັນໄດ້ວ່າ ຢູ່ຂັ້ນທ້ອງຖິ່ນ ກໍຄືຂັ້ນແຂວງ ກໍມີຄວາມຈຳເປັນ ຕ້ອງໄດ້ມີການຊຸກຍູ້, ສົ່ງເສີມ ວຽກງານການຫັນເປັນທັນສະໄໝ ໃນລະບົບບໍລິຫານ ແລະ ການບໍລິການຂອງພາກລັດ ໂດຍການນຳໃຊ້ ລະບົບບໍລິຫານ ແລະ ບໍລິການລັດດີຈີຕອນ, ເຕັກໂນໂລຊີ ດີຈີຕອນ, ໄອຊີທີ ເຂົ້າໃນຂະບວນການດໍາເນີນຂອງບັນດາອົງການຈັດຕັ້ງລັດ ຂະແໜງການຕ່າງໆ ຢ່າງກ້ວາງຂວາງ, ສົ່ງເສີມການຄົ້ນຄ້ວາ, ປະດິດສ້າງນະວັດຕະກຳດີຈີຕອນ, ພັດທະນາ ລະບົບຂໍ້ມູນ ຂ່າວສານ ຂອງບັນດາອົງການຈັດຕັ້ງລັດ ໃຫ້ມີການເຊື່ອມໂຍງ ເຊື່ອມຈອດກັນ, ພ້ອມທັງຄຸ້ມຄອງ, ຕິດຕາມ, ກວດກາ ການນຳໃຊ້ ເຕັກໂນໂລຊີດີຈີຕອນ, ໄອຊີທີ, ລະບົບບໍລິຫານ ແລະ ບໍລິການລັດດີຈີຕອນ ຂອງບັນດາອົງການຈັດຕັ້ງລັດ ຢ່າງເປັນປົກກະຕິ ເປັນຕົ້ນແມ່ນ ລະບົບເວັບໄຊ, ຖານຂໍ້ມູນ, ລາຍເຊັນເອເລັກໂຕຣນິກ, ຫ້ອງການທັນສະໄໝ, ກອງປະຊຸມທາງໄກ, ອີເມວພາກລັດ, ລະບົບສົນທະນາ ແລະ ນໍາໃຊ້ຂໍ້ມູນຮ່ວມພາກລັດ ແລະ ລະບົບອື່ນ ທີ່ກ່ຽວຂ້ອງກັບ ລະບົບບໍລິຫານ ແລະ ບໍລິການລັດດີຈີຕອນ ພ້ອມທັງຈັດຝຶກອົບຮົມ, ຍົກລະດັບຄວາມຮູ້, ຄວາມສາມາດ ແລະ ທັກສະທາງດີຈີຕອນ ໃຫ້ແກ່ບຸກຄະລາກອນ ໃນອົງການຈັດຕັ້ງລັດ ເພື່ອຍົກສູງຄຸນນະພາບ ໃນການຈັດຕັ້ງປະຕິບັດວຽກງານ ຂອງພະນັກງານ-ລັດຖະກອນໃຫ້ມີຄຸນນະພາບ ແລະ ກະທັດຮັດ ໃນການສະໜອງການບໍລິການ ພາກລັດກັບພາກລັດ (G2G), ພາກລັດກັບພະນັກງານ-ລັດຖະກອນ (G2E), ພາກລັດກັບພາກທຸລະກິດ (G2B) ແລະ ພາກລັດກັບປະຊາຊົນ (G2C) ໃຫ້ມີປະສິດທິພາບເພີ່ມຂຶ້ນ ສັງຄົມໄດ້ເຂົ້າເຖິງຂໍ້ມູນຂ່າວສານ ແລະ ການບໍລິການຂອງພາກລັດຜ່ານສື່ເອເລັກໂຕຣນິກໄດ້ງ່າຍຂຶ້ນ ເປັນການຍົກລະດັບ ຄຸນນະພາບຊີວິດຂອງປະຊາຊົນໃຫ້ດີຂຶ້ນເທື່ອລະກ້າວ.
ເຖິງແນວໃດກໍຕາມ, ຄືດັ່ງທີ່ບັນດາທ່ານຮູ້ແລ້ວວ່າ ປັດຈຸບັນນີ້ ໂລກຂອງພວກເຮົາກຳລັງກ້າວເຂົ້າສູ່ຍຸກສະ ໄໝແຫ່ງການປະຕິວັດອຸດສາຫະກຳ ຄັ້ງທີ 4 ຫຼື ເອີ້ນວ່າ ຍຸກອຸດສາຫະກຳ 4.0 ຊຶ່ງໃນໄລຍະ 3 ສັດຕະວັດທີ່ຜ່ານມາ ແມ່ນໄດ້ເກີດມີການປະຕິວັດທາງດ້ານວິທະຍາສາດ-ເຕັກນິກ ທີ່ສົ່ງຜົນສະທ້ອນອັນໃຫຍ່ຫຼວງແບບກ້າວກະໂດດ ຕໍ່ການຂະຫຍາຍຕົວຂອງສັງຄົມມະນຸດມາແລ້ວເຖິງ 3 ຄັ້ງ ເວົ້າລວມ, ເວົ້າສະເພາະແມ່ນ ການຫັນເປັນທັນສະໄໝໃນລະບົບບໍລິຫານ ແລະ ບໍລິການລັດ ໃນຍຸກອຸດສາຫະກຳ 4.0 ນີ້ ຈະສ້າງໂອກາດ ໃຫ້ອົງການຈັດຕັ້ງລັດ ນຳໃຊ້ເຄື່ອງມືທີ່ທັນສະໄໝ ເພື່ອຄຸ້ມຄອງບໍລິຫານລັດ ແລະ ບໍລິການສັງຄົມໃຫ້ມີຄວາມສະດວກ ວ່ອງໄວ ແລະ ມີປະສິທິຜົນ, ແຕ່ຄຽງຄູ່ກັນນັ້ນ ການສື່ສານ ຂໍ້ມູນ ຂ່າວສານ ຜ່ານອິນເຕີເນັດ, ການນໍາໃຊ້ສື່ສັງຄົມອອນລາຍ ຈະເປັນບັນຫາທ້າທາຍ ສະນັ້ນ, ການສ້າງນິຕິກຳຕ່າງໆ ກໍຕ້ອງໄດ້ຄຳນຶງເຖິງບັນຫາຕ່າງໆໃນທາງບວກ ແລະ ທາງລົບເຊັ່ນດຽວກັນ. ໃນລະບົບການຄຸ້ມຄອງບໍລິຫານລັດ ບໍ່ວ່າຈະຢູ່ຂັ້ນສູນກາງ ຫຼື ຢູ່ຂັ້ນທ້ອງຖິ່ນ ຖ້າມີການຫັນປ່ຽນໄປສູ່ລະບົບການບໍລິຫານ ແລະ ບໍລິການລັດ ດ້ວຍເຕັກໂນໂລຊີ ທີ່ທັນສະໄໝ, ການນຳໃຊ້ນະວັດຕະກຳໃໝ່ ກໍຈະເຮັດໃຫ້ລະບົບຄຸ້ມຄອງບໍລິຫານລັດຂອງພວກເຮົາມີກຳລັງແຮງຂຶ້ນ ແລະ ມີບົດບາດພົ້ນເດັ່ນໃນເວທີລະດັບພາກພື້ນ ແລະ ສາກົນ, ກົງກັນຂ້າມ ຖ້າຫາກພວກເຮົາ ບໍ່ມີການຫັນປ່ຽນ, ບໍ່ເຂົ້າເຖິງເຕັກໂນໂລຊີທີ່ທັນສະໄໝ, ບໍ່ຍອມຮັບຕໍ່ການປ່ຽນແປງ ແລະ ພັດທະນາຢ່າງໄວວາໃນຍຸກດີຈີຕອນ ກໍຈະເຮັດໃຫ້ພວກເຮົາມີຄວາມຫຼ້າຫຼັງ ແລະ ອ່ອນແອ ແລະ ບໍ່ສາມາດບຸກທະລຸດ້ານຈິນຕິນາການໃນການຫັນເປັນທັນສະໄໝໄດ້.
ການຫັນເປັນທັນສະໄໝໃນການຄຸ້ມຄອງ ບໍລິຫານ ແລະ ບໍລິການລັດ ຫຼື ການຫັນເປັນລັດຖະບານດີຈີຕອນ ນັ້ນ ເປັນກະແສຟອງຄື້ນພັດຜ່ານໄປທົ່ວໂລກ ມີຫຼາຍປະເທດໃນໂລກ ໂດຍສະເພາະແມ່ນບັນດາປະເທດອາຊຽນ ໄດ້ພາກັນພັດທະນາ ແລະ ຫັນປ່ຽນໄປສູ່ລະບົບທີ່ທັນສະໄໝໃນການຄຸ້ມຄອງລັດ ຄຸ້ມຄອງສັງຄົມ ໂດຍຜັນຂະຫາຍຈາກ ແຜນແມ່ບົດດີຈີຕອນອາຊຽນ 2025, ຕົວຢ່າງ ປະເທດສິງກະໂປ ເປັນປະເທດທີ່ມີຄວາມທັນສະໄໝທີ່ສຸດໃນອາຊຽນ ກ່ຽວກັບລະບົບບໍລິຫານລັດດ້ວຍເອເລັກໂຕຣນິກ (ຕາມສະຖິຕິ ຂອງ UN E-GOV INDEX SURVEY 2020). ສະນັ້ນ, ສຳລັບຢູ່ ສປປ ລາວ ເຮົາ ຢູ່ຂັ້ນສູນກາງ ກໍຄືຂັ້ນທ້ອງຖິ່ນ ບໍ່ອາດຈະຫຼີກລ້ຽງໄດ້.
ສະນັ້ນ, ເພື່ອຜັນຂະຫຍາຍ ຍຸດທະສາດການຫັນເປັນອຸດສາຫະກຳ ແລະ ທັນສະໄໝຂອງພັກ ແລະ ລັດຖະບານ, ແຜນພັດທະນາເສດຖະກິດດີຈີຕອນແຫ່ງຊາດ 5 ປີ(2021-2025), ແຜນພັດທະນາວຽກງານເຕັກໂນໂລຊີ ແລະ ການສື່ສານ ຂອງກະຊວງເຕັກໂນໂລຊີ ແລະ ການສື່ສານ (2021-2025), ແຜນພັດທະນາເສດຖະກິດ-ສັງຄົມຂອງແຂວງ(2021-2025) ໂດຍສະເພາະວຽກງານເຕັກໂນໂລຊີ ແລະ ການສື່ສານ, ຮອງຮັບການສ້າງຕົວເມືອງທັນສະໄໝໃນອານາຄົດ ຢ່າງເປັນເຈົ້າການ ໂດຍນໍາໃຊ້ຜົນສໍາເລັດທາງດ້ານວິທະຍາສາດ ແລະ ເຕັກໂນໂລຊີ ເຂົ້າໃນການພັດທະນາເສດຖະກິດ-ສັງຄົມ ໃນໄລຍະໃຫມ່ນັ້ນ ມີຄວາມຈໍາເປັນຢ່າງພາວະວິໄສ ຈະຕ້ອງໄດ້ຫັນເປັນດີຈິຕອນ ໃນທຸກຂົງເຂດວຽກງານ.
ການຫັນເປັນດີຈິຕອນ (Digital Transformation) ແມ່ນການຫັນເອົາເຕັກໂນໂລຊີດິຈິຕອນ ເຂົ້າມານໍາໃຊ້ໃນທຸກຂົງເຂດຂອງການພັດທະນາເສດຖະກິດ-ສັງຄົມ ແລະ ການບໍລິຫານວຽກງານຂອງພັກ ແລະ ລັດ ໃນຂອບເຂດທົ່ວປະເທດ ທັງສູນກາງ ແລະ ທ້ອງຖິ່ນ, ເຕັກໂນໂລຊີດິຈິຕອນ ແມ່ນເຕັກໂນໂລຊີທີ່ທັນສະໄໝ ແລະ ເປັນນະວັດຕະກໍາໜຶ່ງໃນຍຸກອຸດສາຫະກໍາ 4.0, ການຫັນເປັນດິຈິຕອນ ແມ່ນຂະບວນວິວັດທີ່ສໍາຄັນໃນຍຸກແຫ່ງການປະຕິວັດອຸດສາຫະກໍາ ຄັ້ງທີ 4 ທີ່ເປັນທ່າອ່ຽງລວມຂອງໂລກ, ການນໍາໃຊ້ຜົນສໍາເລັດດ້ານວິທະຍາສາດ-ເຕັກໂນໂລຊີ ແລະ ນະວັດຕະກໍາ ໄດ້ກາຍເປັນທາງເລືອກລວມໃນການພັດທະນາຂອງປະເທດຕ່າງໆ, ໂດຍສະເພາະແມ່ນບັນດາປະເທດອາຊຽນ ກໍ່ໄດ້ເປັນເອກະພາບກັນ ໃນການຫັນເປັນດີຈີຕອນ ໂດຍຖືເປັນບັນຫາທີ່ສໍາຄັນ ແລະ ຮີບດ່ວນໃນຍຸກປະຈຸບັນ. ສະນັ້ນ, ການຫັນເປັນດິຈິຕອນຢູ່ປະເທດເຮົາ ຢູ່ສູນກາງກໍຄືທ້ອງຖິ່ນ ຈຶ່ງເປັນພາລະກິດປະຕິວັດທີ່ສໍາຄັນໃນການຫັນເປັນອຸດສາຫະກໍາ ແລະ ທັນສະໄໝ ຕາມແນວທາງປ່ຽນແປງໃໝ່ຂອງພັກເຮົາ ແລະ ເພື່ອບຸກທະລຸການພັດທະນາເສດຖະກິດ-ສັງຄົມ ຂອງປະເທດເຮົາໃນສະເພາະຫນ້າ ແລະ ຍາວນານ.
ກອງປະຊຸມໃຫຍ່ ຄັ້ງທີ XI ຂອງພັກເຮົາໄດ້ຕີລາຄາວ່າ: "ຄວາມກ້າວຫນ້າອັນວ່ອງໄວ ແລະ ການນໍາໃຊ້ຜົນສໍາເລັດ ດ້ານເຕັກໂນໂລຊີ ແລະ ນະວັດຕະກໍາ ໄດ້ກາຍເປັນທາງເລືອກລວມໃນການພັດທະນາຂອງປະຊາຊາດຕ່າງໆ ຊຶ່ງບົ່ງບອກໃຫ້ພວກເຮົາຮູ້ວ່າ ຍຸດທະສາດການພັດທະນາໃນອານາຄົດຂອງປະເທດເຮົາ ຕ້ອງຕັ້ງຢູ່ບົນພື້ນຖານ ການນໍາໃຊ້ຜົນສໍາເລັດດ້ານວິທະຍາສາດ ແລະ ນະວັດຕະກໍາ ຢ່າງກວ້າງຂວາງ ໂດຍຕິດພັນກັບການພັດທະນາຊັບພະຍາກອນມະນຸດທີ່ມີຄຸນະພາບສູງ ໂດຍສະເພາະແມ່ນຂົງເຂດວິສະວະກໍາ. ດ້ວຍເຫດນັ້ນ, ມີຄວາມຈໍາເປັນຢ່າງຍິ່ງທີ່ຈະຕ້ອງຫັນປ່ຽນຢ່າງແຂງແຮງ ຈາກສະພາວະທີ່ເປັນຢູ່ໃນປັດຈຸບັນ ໂດຍຕິດພັນກັບການປັບປຸງແຜນນະໂຍບາຍ ອັນເປັນພື້ນຖານກ່ຽວກັບການພັດທະນາຢ່າງເປັນລະບົບ, ຖືເອົາການຄົ້ນຄວ້າ, ເຜີຍແຜ່ ແລະ ນໍາໃຊ້ຜົນສໍາເລັດດ້ານວິທະຍາສາດ-ເຕັກໂນໂລຊີ ແລະ ນະວັດຕະກໍາ ອັນເໝາະສົມ ເປັນມາດຖານ ແລະ ເງື່ອນໄຂທີ່ຂາດບໍ່ໄດ້ໃນການກໍານົດແຜນຍຸດທະສາດພັດທະນາໃນຊຸມປີຕໍ່ຫນ້າ”.
ຂະບວນການຫັນເປັນທັນສະໄໝລະບົບບໍລິຫານ ແລະ ບໍລິການລັດດີຈີຕອນ ຕ້ອງຕິດພັນກັນຢ່າງສະຫນິດແຫນ້ນກັບການຈັດຕັ້ງຜັນຂະຫຍາຍແນວທາງຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດໃນແຕ່ລະໄລຍະ ເພື່ອໃຫ້ຮັບປະກັນຄວາມຫມັ້ນຄົງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ສ້າງການຫັນປ່ຽນ ການບໍລິຫານ, ການບໍລິການ ແລະ ການຄຸ້ມຄອງລັດ ໄປສູ່ຄຸນນະພາບໃໝ່ຢ່າງແຂງແຮງ ໂດຍໃຫ້ມີຄວາມສົມດຸນລະຫວ່າງ ການຫັນເປັນທັນສະໄໝທາງເຕັກໂນໂລຊີ ຄວບຄູ່ກັບສິ່ງແວດລ້ອມ ຕາມທິດການພັດທະນາແບບຍືນຍົງ ແລະ ສີຂຽວ.
ການຫັນເປັນທັນສະໄໝລະບົບບໍລິຫານ ແລະ ບໍລິການລັດດິຈິຕອນ ຈະບັນລຸຕາມຈຸດປະສົງທີ່ວາງໄວ້ນັ້ນ ກໍຕໍ່ເມື່ອ ບັນດາອົງການຈັດຕັ້ງພັກ-ລັດ ທຸກພາກສ່ວນ ຈະຕ້ອງໄດ້ມີການຫັນປ່ຽນທາງດ້ານຈິນຕະນາການຢ່າງເລິກເຊິ່ງ, ເພີ່ມທະວີການປະຕິບັດຍຸດທະສາດການຫັນເປັນອຸດສາຫະກໍາ ແລະ ທັນສະໄຫມ, ແຜນພັດທະນາເສດຖະກິດ-ສັງຄົມແຫ່ງຊາດ, ແຜນພັດທະນາເສດຖະກິດດີຈີຕອນ ຂອງລັດຖະບານ ແລະ ແຜນພັດທະນາເສດຖະກິດ-ສັງຄົມຂອງແຂວງ ຕິດພັນກັບການສ້າງຄວາມເຂັ້ມແຂງ ໃນການພັດທະນາບຸກຄະລາກອນທີ່ມີຄຸນະພາບສູງ, ມີທັກສະທີ່ຈຳເປັນໃນສັດຕະວັດທີ 21 (21st Century Skills).
ດັ່ງນັ້ນ, ຈຶ່ງເຫັນວ່າ ການຫັນເປັນທັນສະໄໝລະບົບບໍລິຫານ ແລະ ບໍລິການລັດດິຈິຕອນ ແມ່ນຄວາມຈໍາເປັນພາວະວິໄສຂອງບັນດາອົງການຈັດຕັ້ງລັດ ທັງສູນກາງ ແລະ ທ້ອງຖິ່ນ.
ໂດຍ: ພູຄຳ ມະນີວັນ
