“Teamwork makes the dreamwork” ຫຼື “ການເຮັດວຽກງານເປັນທີມເຮັດໃຫ້ວຽກແຫ່ງຄວາມຝັນເປັນຈິງ” ເປັນຄຳຄົມທີ່ຫຼາຍຄົນຮູ້ຈັກກັນດີໃນໂລກຂອງການເຮັດວຽກງານ ແລະ ທຸລະກິດ ມີທີ່ມາຈາກຄຳເວົ້າຂອງທ່ານ John C. Maxwell ນັກເວົ້າ ແລະ ນັກຂຽນຊາວອາເມລິກາ ເຈົ້າຂອງປື້ມຂາຍດີທີ່ມີຍອົດຂາຍຫຼາຍກວ່າ 24 ລ້ານເຫຼັ້ມ ໃນ 50 ພາສາ ເຊີ່ງທ່ານເຄີຍກ່າວໄວ້ວ່າ: “Teamwork makes the dream work, but a vision becomes a nightmare when the leader has a big dream and a bad team.” ຫຼື "ການເຮັດວຽກງານເປັນທີມງານເຮັດໃຫ້ວຽກແຫ່ງຄວາມຝັນເປັນຈິງ ແຕ່ວິໄສທັດຈະກາຍເປັນຝັນຮ້າຍ ເມື່ອຜູ້ນຳພາມີຄວາມຝັນທີ່ຍິ່ງໃຫຍ່ ແລະ ທີມງານທີ່ບໍ່ດີ".
ການເຮັດວຽກງານເປັນທີມເຮັດໃຫ້ວຽກແຫ່ງຄວາມຝັນເປັນຈິງ ແມ່ນມີຄວາມໝາຍວ່າ ເມືື່ອຄົນກູ່ມໃດໜື່ງມີຄວາມຝັນດຽວກັນ ຫຼື ເຮັດວຽກຮ່ວມກັນ ເພື່ອບັນລຸເປົ້າໝາຍ ຜົນໄດ້ຮັບທີີ່ຕ້ອງການຂອງພວກເຂົາເຈົ້າສາມາດບັນລຸໄດ້ຕາມເປົ້າໝາຍ ໂດຍຜ່ານການຮ່ວມມືຢ່າງມີປະສິດທິພາບພາຍໃນກູ່ມ ເຊີ່ງບົດບາດຂອງແຕ່ລະຄົນອາດຈະແຕກຕ່າງກັນ ແຕ່ເມື່ອໄດ້ຮັບການມອບໝາຍວຽກຢ່າງມີປະສິດທິຜົນ ທຸກຜົນງານແມ່ນມີຄວາມສຳຄັນເທົ່າທຽມກັນ.
ການເຮັດວຽກເປັນທີມຈຶ່ງສຳຄັນໃນບ່ອນເຮັດວຽກ ເພາະວ່າທິມງານຈະມີປະສິດທິພາບສູງ ກໍ່ຕໍ່ເມື່ອມີການຂະຫຍາຍຄຸນລັກສະນະທີ່ດີທີ່ສຸດຂອງທຸກຄົນ. ແນວໃດກໍ່ຕາມ ໂດຍທົ່ວໄປແລ້ວ ຈຸດແຂງ ແລະ ຈຸດອອ່ນຂອງແຕ່ລະຄົນແຕກຕ່າງກັນ ດັ່ງນັ້ນ ການເຮັດວຽກເປັນທີມຈະຊ່ວຍຕື່ມເຕັມຊ່ອງຫວ່າງນັ້ນດວ້ຍການແລກປ່ຽນ, ສົ່ງເສີມຈາກສະມະຊິກພາຍໃນທີມ ພ້ອມກັນເຮັດສຳເລັດໜ້າທີ່ວຽກງານຕາມຄວາມຮັບຜິດຊອບ ແລະ ຄວາມສາມາດທີ່ແຕກຕ່າງກັນ ໃຫ້ສຳເລັດໄດ້ຕາມເປົ້າໝາຍ.
ແຕ່ການສ້າງ Teamwork ທີ່ດີຈຳເປັນຕ້ອງໃຊ້ເວລາ, ຄວາມພະຍາຍາມ ແລະ ການລົງທຶນເພື່ອສ້າງທີມທີ່ມີສັກກະຍະພາບ ຈື່ງສາມາດເຮັດໃຫ້ວິໄສທັດ ແລະ ຄວາມຝັນຂອງອົງກອນເປັນຈິງໄດ້.
ສະນັ້ນ ອົງປະກອບສຳຄັນຂອງ Teamwork ສູ່ການສ້າງ Dreamwork ທີ່ຄວນມີນັ້ນ ມີຫຍັງແດ່? ໃນບົດຄວາມນີ້ຈື່ງມີຄຳຕອບໃຫ້ບັນດາທ່ານທີ່ໄດ້ອ່ານ ເພື່ອໄປພິຈາລະນາໃນກັບສ້າງ ຫຼື ປັບປຸງທີມວຽກຂອງທ່ານໃຫ້ເປັນທິມທີ່ດີ, ເຂັ້ມແຂງ ບັນລູໄດ້ໃນເປົ້າໝາຍທີ່ວາງໄວ້.
ອົງປະກອບຂອງ Teamwork ສູ່ການສ້າງ Dreamwork
ການສ້າງ Teamwork ໃນທີ່ເຮັດວຽກສາມາດປັບປຸງປະສິດທິພາບຂອງອົງກອນໄດ້ຢ່າງຫຼາຍ ບໍລິສັດທີ່ລົງທຶນໃນການສ້າງທີມມັກຈະມີຜົນກຳໄລທີ່ສູງຂຶ້ນ ແລະ ໄດ້ຮັບຄວາມເພິ່ງພໍໃຈຈາກລູກຄ້າຫຼາຍຂຶ້ນ ຕໍ່ໄປນີ້ແມ່ນ 7 ອົງປະກອບສຳຄັນຂອງ Teamwork ທີ່ຈະນຳພາອົງກອນຂອງທ່ານໄປສູ່ການສ້າງ Dreamwork ໄດ້ສຳເລັດ.
1. ວິໄສທັດທີ່ຊັດເຈນ
ເນື່ອງຈາກວິໄສທັດທີ່ບໍ່ຊັດເຈນມັກນຳໄປສູ່ຄວາມຄັບຂ້ອງໃຈ, ຄວາມສັບສົນ ແລະ ການເສຍເວລາກັບວຽກທີ່ບໍ່ກໍ່ໃຫ້ເກີດປະໂຫຍດ ດ້ວຍເຫດນີ້ ການກຳນົດວິໄສທັດຂອງທີມທີ່ຊັດເຈນຈຶ່ງເປັນສິ່ງສຳຄັນທີ່ຈະຊ່ວຍໃຫ້ສະມາຊິກທຸກຄົນເບິ່ງເຫັນເປົ້າໝາຍດຽວກັນ ແລະ ປຽບດັ່ງຄຳໜັ້ນສັນຍາວ່າຈະຊ່ວຍກັນລົງມືເຮັດສິ່ງນັ້ນໃຫ້ບັນລຸຜົນສຳເລັດ.ສະນັ້ນ ວິໄສທັດທີ່ດີຄວນສອດຄ້ອງກັບເປົ້າໝາຍການເຮັດວຽກງານສ່ວນບຸກຄົນ ແລະ ເປັນແຮງຊຸກຍູ້ເຊີງບວກໃຫ້ສະມາຊິກທຸກຄົນຢາກຮ່ວມແຮງຮ່ວມໃຈກັນເຮັດວຽກຢ່າງເຕັມກຳລັງຄວາມສາມາດ.
2. ການມອບໝາຍວຽກທີ່ເໝາະສົມ
ອົງປະກອບຖັດໄປ ແມ່ນ ການມອບໝາຍໜ້າທີ່ ແລະ ຄວາມຮັບຜິດຊອບໃຫ້ສະມາຊິກໃນທີມຢ່າງເໝາະສົມຕາມຈຸດແຂງ ແລະ ຄວາມຊ່ຽວຊານທີ່ແຕກຕ່າງກັນໄປໃນແຕ່ລະບຸກຄົນ ເປັນຂັ້ນຕອນທີ່ຕ້ອງໃຊ້ເວລາສັງເກດ ແລະ ພິຈາລະນາຢ່າງຮອບຄອບ ເພື່ອໃຫ້ຮູ້ຊັດເຈັນວ່າໃຜເໝາະສົມກັບວຽກໃນແຕ່ລະຕຳແໜ່ງງານໂດຍທຳມະຊາດ ສຳລັບທີມທີ່ມີພະນັກງານມືອາຊີບ ແລະ ຜູ້ຊ່ຽວຊານໃນສາຂາທີ່ກ່ຽວຂ້ອງກັບວິໄສທັດຢູ່ແລ້ວ ການມອບໝາຍວຽກໃຫ້ຖືກຄົນກໍ່ຈະເຮັດໄດ້ງ່າຍຍີ່ງຂຶ້ນ.
ແນວໃດກໍ່ຕາມ ຍັງມີປັດໄຈທີ່ຄວນຄຳນຶງຕື່ມອີກນອກຈາກຄວາມເໝາະສົມ ຄື ການແບ່ງຄວາມຮັບຜິດຊອບຢ່າງຍຸຕິທຳ ແລະ ເທົ່າທຽມກັນ ເພື່ອປ້ອງກັນບໍ່ໃຫ້ເກີດການຊັ່ງຊາປຽບທຽບ, ອິດສາ, ບັງບຽດລະຫວ່າງສະມາຊິກໃນທີມ ເພາະອາດກາຍເປັນອຸປະສັກຂອງການສ້າງ Teamwork ເຊີ່ງເປັນຈຸດທ່ວງດຶງຄວາມຝັນຂອງອົງກອນບໍ່ໃຫ້ກາຍເປັນຈິງໄດ້.
3. ລະບົບສະໜັບສະໜູນທີມທີ່ເຂັ້ມແຂງ
ຫຼັງຈາກມອບໝາຍວຽກ ແລະ ຄວາມຮັບຜິດຊອບຂອງສະມາຊິກແຕ່ລະຄົນຢ່າງເໝາະສົມແລ້ວ ການສ້າງລະບົບສະໜັບສະໜູນພາຍໃນທີມທີ່ເຂັ້ມແຂງກໍ່ເປັນສິ່ງສຳຄັນຫຼາຍ ໂດຍພື້ນຖານມັກຈະເກີດຈາກສະພາບແວດລ້ອມໃນການເຮັດວຽກງານທີ່ຊ່ວຍເຫຼືອຊຶ່ງກັນແລະກັນ ລວມທັງການສ້າງຄວາມສຳພັນທີ່ໜຽວແໜ້ນ ຈົນເຮັດໃຫ້ສະມາຊິກຮັບຮູ້ເຖິງຄວາມຜູກພັນ ແລະ ຮັບຮູ້ວ່າເຂົາເຈົ້າເອງຄືກຳລັງສຳຄັນທີ່ຈະສົ່ງຜົນຕໍ່ການບັນລຸເປົ້າໝາຍ ແລະ ວິໄສທັດຂອງທີມ. ນອກຈາກນີ້ ລະບົບສະໜັບສະໜູນທີ່ດີຍັງຊ່ວຍສ້າງຄວາມຮູ້ສຶກປອດໄພທາງຈິດໃຈ ໃນການເຮັດວຽກງານທ່າມກາງເພື່ອນຮ່ວມທີມທີ່ຄອຍຖ້າຊ່ວຍເຫຼືອ ແລະ ໃຫ້ກຳລັງໃຈກັນຢູ່ສະເໝີ.
4. ກິດຈະກຳສ້າງຄວາມສຳພັນໃນທີມ
ການສະໜັບສະໜູນໃຫ້ສະມາຊິກໃນທີມໄດ້ໃຊ້ເວລາພົບປະສັງສັນ ແລະ ເຮັດກິດຈະກຳນອກເວລາວຽກຮ່ວມກັນ ເປັນອີກວິທີທີ່ມີປະສິດທິພາບໃນການສ້າງ Teamwork ເພາະຊ່ວຍໃຫ້ສະມາຊິກໄດ້ສື່ສານຢ່າງເປັນກັນເອງ ເພື່ອເຮັດຄວາມຮູ້ຈັກໂຕຕົນ ແລະ ສະໜິດສະໜົມກັນຫຼາຍຂຶ້ນ ມີໂອກາດເວົ້າລົມກ່ຽວກັບຄວາມສົນໃຈທີ່ຄ້າຍຄືກັນ ຫຼື ປຶກສາບັນຫາຊີວິດທີ່ເຂົາເຈົ້າກຳລັງປະເຊີນຢູ່ນອກການເຮັດວຽກ ເຊິ່ງສິ່ງເຫຼົ່ານີ້ຈະຊ່ວຍປັບປຸງການເຮັດວຽກງານເປັນທີມ ແລະ ສ້າງຄວາມໄວ້ວາງໃຈລະຫວ່າງສະມາຊິກໃນທີມໄດ້ເປັນຢ່າງດີ.
5. ການສື່ສານທີ່ຊັດເຈນ ແລະ ເປັນລະບົບ
ການຈັດວຽກງານໃນຄວາມຮັບຜິດຊອບອາດຈະເປັນເລື່ອງທີ່ຫຍຸ້ງຍາກຫຼາຍໃນບາງຄັ້ງ ແລະ ສະມາຊິກໃນທີມອາດພົບບັນຫາຕິດຂັດບາງຂັ້ນຕອນຂອງການປະຕິບັດງານ ຫາກບໍ່ມີຊ່ອງທາງໃນການສື່ສານ ຫຼື ໃຫ້ຄຳປຶກສາທີ່ຊັດເຈນພາຍໃນທີມ ອຸປະສັກເຫຼົ່ານີ້ອາດເຮັດໃຫ້ສະມາຊິກຕ້ອງແລ້ວວຽກດ້ວຍຄວາມຜິດພາດ ແລະ ລົ້ມເຫລວ ສູນເສຍເວລາ ແລະ ຊັບພະຍາກອນມີຄ່າຂອງອົງກອນໂດຍບໍ່ສົມຄວນ ລວມທັງອາດເປັນການຈຸດທຳລາຍ Teamwork ທີ່ເຮັດໃຫ້ຄວາມຝັນຂອງອົງກອນຕ້ອງຢຸດຕິລົງ.
ດັ່ງນັ້ນ ອົງປະກອບຂອງການສ້າງ Teamwork ທີ່ດີຈຶ່ງຈຳເປັນຕ້ອງກຳນົດຊ່ອງທາງ ແລະ ວິທີການສື່ສານໃຫ້ຊັດເຈນ ແລະ ເປັນລະບົບ ໝັ່ນກວດສອບບັນຫາ ແລະ ຕິດຕາມຄວາມຄືບໜ້າໃນການເຮັດວຽກງານຂອງສະມາຊິກແຕ່ລະຄົນຢູ່ສະເໝີ ເພື່ອຊ່ວຍສະໜັບສະໜູນ ແລະ ແກ້ໄຂບັນຫາໄດ້ທັນທ່ວງທັນ.
6. ການສະໜັບສະໜູນຈາກປັດໄຈພາຍນອກ
ເຖິງວ່າສະມາຊິກຈະເຮັດວຽກຮ່ວມກັນພາຍໃນທີມໄດ້ຢ່າງສົມບູນແບບ ແຕ່ບາງເທື່ອເປົ້າໝາຍ ແລະ ວິໄສທັດຂອງທີມກໍ່ອາດຖືກຂັດຂວາງຈາກອົງປະກອບທີ່ເປັນປັດໄຈພາຍນອກ ເຊັ່ນ: ຄະນະກຳມະການ ແລະ ຜູ້ບໍລິຫານລະດັບສູງໂດຍສະເພາະໃນອົງກອນຂະໜາດໃຫຍ່.
ດ້ວຍເຫດຜົນດັ່ງກ່າວນີ້ ການສະໜັບສະໜູນຈາກຜູ້ບໍລິຫານທີ່ມີອຳນາດຈຶ່ງເປັນອີກອົງປະກອບສຳຄັນຂອງການສ້າງ Teamwork ເຊັ່ນ: ການຈັດຫາຊັບພະຍາກອນ ແລະ ຕອບສະຫນອງຕໍ່ຂໍ້ສະເໜີຂອງພະນັກງານທີ່ເປັນທີມປະຕິບັດການດ້ວຍຄວາມເຂົ້າໃຈ ເຊີ່ງຈະຊ່ວຍສົ່ງເສີມປະສິດທິພາບການເຮັດວຽກງານ ແລະ ສ້າງຄວາມເຂັ້ມແຂງໃຫ້ກັບທີມ ເພາະບໍ່ມີຫຍັງທີ່ຈະເຮັດໃຫ້ພະນັກງານທໍ້ຖອຍໃຈໄປກວ່າການການອຸທິດຕົນເຮັດວຽກຢ່າງສຸດຄວາມສາມາດ ແຕ່ກັບຖືກເບີ່ງຂ້າມ ຫຼື ຂັດຂວາງຈົນເບິ່ງບໍ່ເຫັນຫົນທາງຄວາມສຳເລັດ.
7. ການໃຫ້ລາງວັນຕອບແທນຄວາມສຳເລັດ
ອົງປະກອບສຸດທ້າຍຂອງການສ້າງ Teamwork ຄື ການໃຫ້ລາງວັນຕອບແທນຄວາມສຳເລັດຈາກຄວາມພະຍາຍາມຂອງສະມາຊິກໃນທີມທີ່ສາມາດເຮັດຜົນງານໄດ້ຢ່າງດີເລີດ ຊຶ່ງລາງວັນອາດເປັນໄປໄດ້ຕັ້ງແຕ່ຄຳຊົມເຊຍ, ການຍ້ອງຍໍ, ການຂຶ້ນເງີນເດືອນ, ການເລື່ອນຕຳແໜ່ງ, ໂບນັດປາຍປີ ຫຼື ສິດທິພິເສດໃນຮູບແບບຕ່າງໆ ເພື່ອຖືຮັກສາແຮງຈູງໃຈ ແລະ ສ້າງແຮງກະຕຸ້ນໃຫ້ທຸກຄົນໃນທີມຢາກພັດທະນາທ່າແຮງໃນການເຮັດວຽກງານຕາມບົດບາດຫນ້າທີ່ຂອງຕົນເອງໃຫ້ດີຍີ່ງຂຶ້ນເລື້ອຍໆ.
ສະຫຼຸບຫຍໍ້
ຄຳເວົ້າທີ່ວ່າ “Teamwork makes the dream work” ຫຼື “ການເຮັດວຽກງານເປັນທີມເຮັດໃຫ້ວຽກແຫ່ງຄວາມຝັນເປັນຈິງ” ບໍ່ຄວນຖືກນຳມາໃຊ້ເປັນເຄື່ອງມືເອົາລັດເອົາປຽບພະນັກງານ ຫຼື ຫວັງກອບໂກຍຜົນປະໂຫຍດທາງທຸລະກິດ ຫຼື ຜົນປະໂຫຍຂອງກົມກອງພຽງຝ່າຍດຽວ ແຕ່ຄວນໃຊ້ສົ່ງເສີມຄວາມສາມັກຄີພາຍໃນອົງກອນ ແລະ ສ້າງແຮງຈູງໃຈໃຫ້ພະນັກງານທຸກຄົນເຕັມໃຈທີ່ຈະເຮັດວຽກເປັນທີມດຽວກັນ ເພື່ອຂັບເຄື່ອນເປົ້າໝາຍ ຫຼື ວິໄສທັດຂອງອົງກອນໃຫ້ບັນລຸຜົນສຳເລັດ.
ສະນັ້ນ ການສ້າງ Teamwork ເພື່ອນຳພາອົງກອນໄປສູ່ການສ້າງ Dreamwork ຫຼື ຄວາມສຳເລັດຂອງອົງກອນ ຈຶ່ງຄວນມີອົງປະກອບສຳຄັນທັງໝົດ 7 ຢ່າງ ໄດ້ແກ່ ວິໄສທັດທີ່ຊັດເຈນ, ການມອບໝາຍວຽກທີ່ເໝາະສົມ, ລະບົບສະໜັບສະໜູນທີມທີ່ເຂັ້ມແຂງ, ກິດຈະກຳສ້າງຄວາມສຳພັນໃນທີມ, ການສື່ສານທີ່ຊັດເຈນ ແລະ ເປັນລະບົບ, ການສະໜັບສະໜູນຈາກປັດໄຈພາຍນອກ ແລະ ການໃຫ້ລາງວັນຕອບແທນຄວາມສຳເລັດ. ເພາະການສ້າງ Teamwork ດ້ວຍຄວາມຈິງຈັງ ແລະ ຈິງໃຈ ຖືເປັນການລົງທືນທີ່ຄຸ້ມຄ່າ ເຊີ່ງຈະເຮັດໃຫ້ທັງອົງກອນ ແລະ ພະນັກງານຝ່າຍຕ່າງໆ ເຕີບໃຫຍ່ ແລະ ກ້າວສູ່ຄວາມຝັນທີ່ເປັນຈິງໄປນຳກັນ.
