ໃນຕອນບ່າຍຂອງ ວັນທີ 30 ກໍລະກົດ 2026, ທີ່ຫ້ອງປະຊຸມພະແນກເຕັກໂນໂລຊີ ແລະ ການສື່ສານ ແຂວງອຸດົມໄຊ, ຄະນະພັກຮາກຖານ ພະແນກເຕັກໂນໂລຊີ ແລະ ການສື່ສານ ໄດ້ຈັດພິທີປາຖະກະຖາ ຫວນຄືນມູນເຊື້ອ ວັນສ້າງຕັ້ງແຂວງອຸດົມໄຊ ຄົບຮອບ 64 ປີ (15 ກໍລະກົດ 1962 – 15 ກໍລະກົດ 2026) ແລະ ວັນເກີດ ປະທານ ສຸພານຸວົງ ຄົບຮອບ 117 ປີ (13 ກໍລະກົດ 1909 – 13 ກໍລະກົດ 2026). ພິທີດັ່ງກ່າວໃຫ້ກຽດເປັນປະທານ ແລະ ປາຖະກະຖາໂດຍ ສະຫາຍ ນາງ ປິ່ນຄຳ ອຸ່ນລະຄອນ, ເລຂາຄະນະພັກຮາກຖານ, ຫົວໜ້າພະແນກເຕັກໂນໂລຊີ ແລະ ການສື່ສານ, ໂດຍມີສະມາຊິກພັກ ແລະ ພະນັກງານ-ລັດຖະກອນ ທົ່ວພະແນກເຂົ້າຮ່ວມຢ່າງພ້ອມພຽງ.
ໃນພິທີ, ສະຫາຍ ນາງ ປິ່ນຄຳ ອຸ່ນລະຄອນ ໄດ້ຍົກໃຫ້ເຫັນເຖິງປະຫວັດສາດແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງ ແຂວງອຸດົມໄຊ ເຊິ່ງໄດ້ຮັບການສ້າງຕັ້ງຂຶ້ນໃນວັນທີ 15 ກໍລະກົດ 1962 ພາຍໃຕ້ຊື່ "ແຂວງລ້ານຊ້າງ" ໃນສະໄໝຕໍ່ສູ້ປົດປ່ອຍຊາດ. ຕະຫຼອດໄລຍະ 64 ປີ ແຫ່ງການປົກປັກຮັກສາ ແລະ ສ້າງສາພັດທະນາ, ແຂວງອຸດົມໄຊ ສາມາດຍາດໄດ້ຜົນສຳເລັດອັນພົ້ນເດັ່ນໃນຫຼາຍດ້ານ ເປັນຕົ້ນແມ່ນເສດຖະກິດທີ່ມີການຂະຫຍາຍຕົວຢ່າງຕໍ່ເນື່ອງ, ໃນ 6 ເດືອນຕົ້ນປີ 2026 ນີ້ GDP ຂະຫຍາຍຕົວໃນລະດັບ 3,3%. ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກມີບາດກ້າວທີ່ດີ, ເຊິ່ງປັດຈຸບັນມີຄອບຄົວພົ້ນທຸກກວມເອົາ 68,66% ຂອງຄອບຄົວທັງໝົດທົ່ວແຂວງ. ພ້ອມນັ້ນ, ວຽກງານພື້ນຖານໂຄງລ່າງ, ການສຶກສາ, ສາທາລະນະສຸກ ແລະ ວຽກງານເຕັກໂນໂລຊີ-ການສື່ສານ ກໍໄດ້ຮັບການພັດທະນາໃຫ້ທັນສະໄໝຂຶ້ນເລື້ອຍໆ.
ພ້ອມກັນນັ້ນ, ພິທີຍັງໄດ້ຫວນຄືນເຖິງຄຸນງາມຄວາມດີ ແລະ ຜົນງານການເຄື່ອນໄຫວປະຕິວັດຂອງ ປະທານ ສຸພານຸວົງ, ຜູ້ນຳທີ່ດີເດັ່ນ ແລະ ເຄົາລົບຮັກຂອງປະຊາຊົນລາວບັນດາເຜົ່າ. ເພິ່ນແມ່ນປັນຍາຊົນຜູ້ຍິ່ງໃຫຍ່ ທີ່ໄດ້ສະລະຖານະເຊື້ອເຈົ້າ ເພື່ອອຸທິດຊີວິດໃຫ້ແກ່ພາລະກິດກູ້ຊາດ. ປະທານ ສຸພານຸວົງ ເປັນສັນຍະລັກແຫ່ງຄວາມສາມັກຄີປອງດອງຊາດ, ເປັນນັກຮົບປະຕິວັດທີ່ທໍລະຫົດອົດທົນ ແລະ ມີແບບແຜນການດຳລົງຊີວິດທີ່ລຽບງ່າຍ, ປະຢັດມັດທະຍັດ ເຊິ່ງເປັນແວ່ນແຍງອັນໃສແຈ້ງໃຫ້ແກ່ພະນັກງານ-ສະມາຊິກພັກທຸກຄົນໄດ້ຮ່ຳຮຽນເອົາ. ນອກຈາກການປາຖະກະຖາແລ້ວ, ໃນວາລະດຽວກັນນີ້ ຄະນະພັກຮາກຖານ ຍັງໄດ້ຖືໂອກາດເຜີຍແຜ່ ຂໍ້ຕົກລົງວ່າດ້ວຍການຂຶ້ນທະບຽນເລກໝາຍໂທລະສັບ ສະບັບເລກທີ 978/ກຕສ, ລົງວັນທີ 2 ເມສາ 2026, ທັງນີ້ ກໍເພື່ອແນໃສ່ສ້າງຄວາມເປັນລະບຽບຮຽບຮ້ອຍໃນການຄຸ້ມຄອງຂໍ້ມູນຜູ້ຊົມໃຊ້ໂທລະສັບ, ຮັບປະກັນຄວາມປອດໄພຂອງສັງຄົມ ແລະ ຊຸກຍູ້ການຫັນເປັນດີຈິຕອນໃນວຽກງານການສື່ສານໃຫ້ມີຄວາມເຂັ້ມງວດ ແລະ ເປັນເອກະພາບກັນໃນທົ່ວປະເທດ.
ໃນຕອນທ້າຍ, ປະທານພິທີ ໄດ້ຮຽກຮ້ອງໃຫ້ສະມາຊິກພັກ ແລະ ພະນັກງານທຸກສະຫາຍ ຈົ່ງພ້ອມກັນເສີມຂະຫຍາຍມູນເຊື້ອຄວາມສາມັກຄີ, ເອົາໃຈໃສ່ຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ ແລະ ສຸມສະຕິປັນຍາເຂົ້າໃນການປະຕິບັດໜ້າທີ່ວຽກງານວິຊາສະເພາະ ເພື່ອປະກອບສ່ວນເຂົ້າໃນການສ້າງສາພັດທະນາແຂວງອຸດົມໄຊ ໃຫ້ມີຄວາມຮຸ່ງເຮືອງສີວິໄລຢ່າງບໍ່ຢຸດຢັ້ງ.
