ເພື່ອເຮັດໃຫ້ການຂຶ້ນທະບຽນເລກໝາຍໂທລະສັບໄດ້ສຳເລັດຕາມເປົ້າໝາຍ, ຫົວໜ້າພະແນກເຕັກໂນໂລຊີ ແລະ ການສື່ສານແຂວງ ຂໍຖືເປັນກຽດ ແຈ້ງມາຍັງບັນດາທ່ານຫົວໜ້າຫ້ອງວ່າການ 7 ເມືອງ ຊ່ວຍອອກແຈ້ງການ ເຖິງນາຍບ້ານຢູ່ພາຍໃນເມືອງຂອງຕົນ ເພື່ອແຈ້ງໃຫ້ພໍ່, ແມ່ ປະຊາຊົນ ຮັບຊາບ ແລະ ໃຫ້ຄວາມຮ່ວມມືໃນການຈັດຕັ້ງປະຕິບັດການປິດທະບຽນເລກໝາຍໂທລະສັບທີ່ມີເລກລະຫັດຂຶ້ນຕົ້ນດ້ວຍ 020 ແລະ ເລກລະຫັດ ບໍລິການຂຶ້ນຕົ້ນດ້ວຍ 030 ທີ່ຕົນເອງນໍາໃຊ້ແລ້ວ ແຕ່ຍັງບໍ່ທັນຂຶ້ນທະບຽນແມ່ນໃຫ້ຮີບຮ້ອນໄປຂຶ້ນທະບຽນຢູ່ສູນໃຫ້ບໍລິການລູກຄ້າຂອງແຕ່ລະເຄືອຂ່າຍໃນໂມງລັດຖະການ ຫຼື ທ່ານສາມາດຂຶ້ນທະບຽນດ້ວຍຕົນເອງດ້ວຍການດາວໂຫຼດ ແອັບພລິເຄຊັນ Lao KYC ( 3 Grab app ) ໄດ້ຕະຫຼອດ 24 ຊົ່ວໂມງ; ຖ້າຫາກວ່າເລກໝາຍໃດບໍ່ຂຶ້ນ ທະບຽນນໍາໃຊ້ຖືກຕ້ອງ ແມ່ນທາງບໍລິສັດຜູ້ໃຫ້ບໍລິການໂທລະຄົມຈະໄດ້ປິດການນໍາໃຊ້ເລກໝາຍດັ່ງກ່າວ ນັບແຕ່ວັນທີ 30 ມັງກອນເປັນຕົ້ນໄປ ຕາມແຈ້ງການຂອງອົງການດັດສົມໂທລະຄົມ ເລກທີ 070/ອດທ, ລົງວັນທີ 23 ມັງກອນ 2024 ແລະ ຖ້າກວດພົບເຫັນບຸກຄົນໃດ ບໍ່ປະຕິບັດຕາມແຈ້ງການສະບັບນີ້ຈະຖືກດໍາເນີນມາດຕະການ ຕາມມາດຕາ 28 ຂໍ້ຕົກລົງວ່າດ້ວຍການຂຶ້ນທະບຽນເລກໝາຍໂທລະສັບເລກທີ 2347/ກຕສ, ລົງວັນທີ 30 ສິງຫາ 2023 ດັ່ງນີ້:
- ຜູ້ນໍາໃຊ້ເລກໝາຍໂທລະສັບ ນໍາໃຊ້ເລກໝາຍໂດຍບໍ່ໄດ້ຂຶ້ນທະບຽນສໍາເລັດ ແລະ ຖືກຕ້ອງຕາມລະບຽບການ ຈະຖືກປັບໃໝ 1.000.000 ກີບ/ເລກໝາຍ;
- ຜູ້ນໍາໃຊ້ນໍາໃຊ້ໝາຍເລກໂທລະສັບ ເພື່ອກໍ່ຄວາມຫວຸ້ນວາຍໃນສັງຄົມ ແລະ ສົ່ງຜົນກະທົບຕໍ່ວຽກງານ ປ້ອງກັນຊາດ, ປ້ອງກັນຄວາມສະຫງົບ ຈະຖືກປັບໃໝ່ 10.000.000ກີບ/ເລກໝາຍ;
- ຜູ້ນໍາໃຊ້ນໍາໃຊ້ໝາຍເລກໂທລະສັບ ມອບ ແລະ ໂອນເລກໝາຍໂທລະສັບຂອງຕົນທີ່ຂຶ້ນທະບຽນແລ້ວ ໃຫ້ບຸກຄົນອື່ນໂດຍບໍ່ຂຶ້ນທະບຽນຄົນໃໝ່ ຈະຖືກປັບໃໝ 1.000.000ກີບ/ເລກໝາຍ;
- ຜູ້ນໍາໃຊ້ເລກໝາຍໂທລະສັບ ບໍ່ໃຫ້ການຮ່ວມມື ໃນການປະຕິບັດວຽກງານຂຶ້ນທະບຽນໝາຍເລກໂທລະສັບ ຈະຖືກປັບໃໝ 1.000.000ກີບ/ເລກໝາຍ;
- ຜູ້ນໍາໃຊ້ເລກໝາຍໂທລະສັບ ປອມແປງເອກະສານ ຫຼື ຂໍ້ມູນ ເພື່ອມາຂຶ້ນທະບຽນເລກໝາຍໂທລະສັບ ຈະ ຖືກປັບໃໝ 1.000.000ກີບ/ເລກໝາຍ;
- ບຸກຄົນ, ນິຕິບຸກຄົນ ຫຼື ການຈັດຕັ້ງ ຮັບຂື້ນທະບຽນເລກໝາຍໂທລະສັບ ໃຫ້ບຸກຄົນ, ນິຕິບຸກຄົນ ຫຼື ການຈັດຕັ້ງອື່ນ ໂດຍບໍ່ໄດ້ຮັບອະນຸຍາດ ຈະຖືກປັບໃໝ 1.000.000ກີບ/ເລກໝາຍ.
ໝາຍເຫດ: ບ້ານໃດທີ່ມີໂທລະໂຄ່ງຂໍຄວາມຮ່ວມມືນໍານາຍບ້ານຊ່ວຍອຳນວຍຄວາມສະດວກປະກາດ ແຈ້ງການສະບັບນີ້ອອກທາງໂທລະໂຄງບ້ານໃຫ້ປະຊາຊົນໃນບ້ານຂອງຕົນຮັບຮູ້ຢ່າງທົ່ວເຖິງ.
ວິທີການກວດເລກໝາຍຂອງທ່ານ: ກົດ *1021# ໂທອອກ (ທຸກເຄືອຂ່າຍ) ເພື່ອກວດເລກໝາຍ ໂທລະສັບຂອງທ່ານດ້ວຍຕົນເອງວ່າ ເບີຂອງທ່ານໄດ້ຂຶ້ນທະບຽນແລ້ວຫຼືຍັງ.
